ഇത് മത്സരപരീക്ഷകളുടെ കാലമാണല്ലോ. ഉയർന്ന ഐക്യൂ ‌ഉണ്ടായതുകൊണ്ട് ഒരാൾ മൽസര പരീക്ഷയിൽ മുൻനിരയിൽ എത്തണമെന്നില്ല. സാമാന്യബുദ്ധിയും കഠിനാധ്വാനവും കൂടിച്ചേരുമ്പോഴാണു ലക്ഷ്യപ്രാപ്തി ഉണ്ടാവുക എന്നതാണ് സത്യം. എന്ത് എപ്പോൾ എങ്ങനെ ഈ ചോദ്യങ്ങൾക്കുള്ള ഉത്തരം കാണുകയാണ് ആദ്യം വേണ്ടത്. അതായത് ഒരു ദിവസം എത്ര മണിക്കൂർ പഠി‌‌ക്കണം, എത്ര ചോദ്യങ്ങൾ പഠിക്കണം, ഏതെല്ലാം വിഷയങ്ങളിൽ നിന്നുള്ള ‌ചോദ്യങ്ങൾ ഉൾപ്പെടുത്തണം ഇവയെല്ലാം ഉൾപ്പെടുത്തി ഒരു പ്ലാൻ തയ്യാറാക്കുക. പഠിക്കാനുള്ള ടൈം ടേബിൾ തയ്യാറാക്കുമ്പോൾ പ്രത്യേകം ശ്രദ്ധിക്കണം. പഠിക്കുന്നതിനിടയ്ക് ചില അസൗകര്യങ്ങൾ വന്നേക്കാം. അതായത് തലവേദന പോലുള്ള അസുഖങ്ങളോ അത്യാവശ്യമായി മാറി നിൽക്കേണ്ടി വരികയോ ഒക്കെ വന്നു ഭവിച്ചേക്കാം. അതുകൊണ്ട് അതുംകൂടി മുന്നിൽ കണ്ടുകൊണ്ടു വേണം ടൈം ടേബിൾ തയ്യാറാക്കാൻ.
കഴിവതും അതിരാവിലെ എണീറ്റ് പഠിക്കാൻ സമയം കണ്ടെത്തുക. കാരണം നിങ്ങളുടെ മസ്തിഷ്കം ഏറ്റവും ഊർജസ്വലവും പ്രവർത്തനക്ഷമവുമായ ആൽഫ ലവലിലായിരിക്കും പുലർകാലത്ത്. അക്കാരണത്താൽ പഠിക്കുവാനുള്ള ഏറ്റവും നല്ല സമയം വെളുപ്പാങ്കാലമാണ്. മനസ്സ് പൂർണമായും ഏകാഗ്രമാക്കി പഠനത്തിനായി മാറ്റിവയ്ക്കുന്ന സമയത്തെ പരമാവധി പ്രയോജനപ്പെടുത്തുക. ശീർഷകങ്ങൾ, പ്രധാന ഭാഗങ്ങൾ, ഹൈലൈറ്റ് ചെയ്‌തിട്ടുള്ള ഭാഗങ്ങൾ എല്ലാം കേന്ദ്രീകരിച്ചു നിങ്ങളുടെ ചിന്തയിൽ ഒരു സ്പാർക്ക് ഉണ്ടാകുന്നു. ആ തീപ്പൊരിയിൽ സ്വയം ഉരുത്തിരിയുന്നതാണു ചോദ്യങ്ങൾ. മുൻവർഷത്തെ ചോദ്യപേപ്പറുകൾ കൂടുതലായി ചെയ്തു പഠിക്കാൻ ശ്രമിക്കുക. എന്തെന്നാൽ പലപ്പോഴും പി.എസ് .സി. പരീക്ഷയിൽ ചോദ്യങ്ങൾ ആവർത്തിച്ച് കാണാറുണ്ട്.
പ്രധാന ഭാഗങ്ങൾ അടിവരയിടുക. ഓരോ അധ്യായത്തിലെയും പ്രധാന പോയിന്റ് മനസ്സിരുത്തി വായിക്കുക. ആവര്‍ത്തനമാണു വിവരങ്ങള്‍ മനസ്സിലുറപ്പിക്കാനുള്ള പ്രധാന തന്ത്രം. പഠിച്ച കാര്യങ്ങൾ ഉരുവിടുക. എഴുതി നോക്കുക. മറ്റുള്ളവരുമായി പങ്കു വയ്ക്കുക ഇതെല്ലം ഓർമ്മശക്തി കൂട്ടാൻ സഹായിക്കും. പഠിച്ച കാര്യങ്ങൾ മനസ്സിൽ ക്രമമായി അടുക്കുക. ക്രമമായി അടുക്കുന്നതെന്തും കൃത്യമായി എടുക്കുവാന്‍ പറ്റും. ഇതിനുവേണ്ടി സ്വയം ചില സൂത്രവാക്യങ്ങളൊക്കെ ഉണ്ടാക്കാവുന്നതാണ്. വസ്തുതകളെ പരസ്പരം ബന്ധിപ്പിച്ചു പഠിക്കുന്ന കീവേഡ്. അസോസിയേറ്റിങ് മെത്തേഡും മൈൻഡ് മാപ്പിങ് രീതികളും റാങ്ക് പട്ടിക‌യിൽ മുൻനിരയിലെത്താൻ സഹായിക്കും. ചിട്ടയോടെയുള്ള പഠനം ലക്ഷ്യത്തെ പൂർത്തീകരിക്കുക തന്നെ ചെയ്യും.