കഴിഞ്ഞ ദിവസങ്ങള്‍ക്ക് മുന്‍പാണ് ഇരുപത്തിയഞ്ചുകാരിയായ ഗായിക സെലേന ഗോമസിന്റെ ഇന്‍സ്റ്റഗ്രാം അക്കൗണ്ടില്‍ നിന്നും മുന്‍ കാമുകന്‍ ജസ്റ്റിന്‍ ബീബറുടെ നഗ്‌ന ചിത്രങ്ങള്‍ പോസ്റ്റു ചെയ്തത്. ഇതിന് പിന്നില്‍ ഹാക്കര്‍മാരാണെന്ന കുറ്റസമ്മതമാണ് ഫെയ്‌സ്ബുക്കിന് കീഴിലെ ഇന്‍സ്റ്റഗ്രാം അധികൃതര്‍ നടത്തിയിരിക്കുന്നത്.

ജസ്റ്റിന്‍ ബീബറുടെ നഗ്‌ന ചിത്രങ്ങള്‍ പ്രത്യക്ഷപ്പെട്ടതിന് പിന്നാലെ പോപ് താരം സെലേനയുടെ ഇന്‍സ്റ്റഗ്രാം അക്കൗണ്ട് അപ്രത്യക്ഷമായിരുന്നു. സെലേനയുടെ ഇന്‍സ്റ്റഗ്രാം അക്കൗണ്ട് നോക്കുന്നവരാണ് ഇങ്ങനെയൊരു നീക്കം നടത്തിയത്. ഹാക്കര്‍മാര്‍ പ്രധാനപ്പെട്ട ഇന്‍സ്റ്റഗ്രാം അക്കൗണ്ടുകള്‍ ലക്ഷ്യം വെക്കുന്നുവെന്ന് ഇതിന് പിന്നാലെയാണ് ഇന്‍സ്റ്റഗ്രാം വ്യക്തമാക്കിയിരിക്കുന്നത്. പ്രധാനമായും ഇ-മെയില്‍ വിലാസവും ഫോണ്‍ നമ്പറുകളും ഉപയോഗിച്ചാണ് ഇവര്‍ ഇന്‍സ്റ്റഗ്രാമില്‍ മാല്‍വെയറുകളെ കടത്തിവിടുന്നതെന്നും അധികൃതര്‍ പറയുന്നു.

അതേസമയം, ഹാക്കര്‍മാര്‍ക്ക് ഇതുവരെ അക്കൗണ്ടുകളുടെ പാസ്‌വേഡുകള്‍ ചോര്‍ത്താനായിട്ടില്ല. എങ്കിലും ഒന്നിലേറെ പ്രധാനപ്പെട്ട അക്കൗണ്ടുകളിലേക്ക് നുഴഞ്ഞുകയറാന്‍ ഹാക്കര്‍മാര്‍ക്ക് കഴിഞ്ഞിട്ടുണ്ട്. ദുഷ്ടപ്രോഗ്രാമിനെ നിയന്ത്രിക്കാനായെന്നും സംഭവത്തില്‍ അന്വേഷണം ആരംഭിച്ചിട്ടുണ്ടെന്നുമാണ് ഇന്‍സ്റ്റഗ്രാം അധികൃതര്‍ അറിയിക്കുന്നത്. അക്കൗണ്ടുകളുടെ സ്വകാര്യതയ്ക്ക് വലിയ പ്രാധാന്യമാണ് നല്‍കുന്നതെന്നും വെരിഫൈ ചെയ്യപ്പെട്ട എല്ലാ അക്കൗണ്ടുകളും സുരക്ഷാ പരിശോധനക്ക് വിധേയമാക്കുമെന്നും ഇന്‍സ്റ്റഗ്രാം വ്യക്തമാക്കുന്നു.

പ്രധാനപ്പെട്ട അക്കൗണ്ടുകള്‍ക്ക് നേരെയാണ് ആക്രമണമെന്ന് പറയുമ്പോഴും ഓരോരുത്തരും അക്കൗണ്ടുകളില്‍ പ്രാഥമിക പരിശോധന നടത്തുന്നത് നല്ലതാണെന്ന മുന്നറിയിപ്പും ഇന്‍സ്റ്റഗ്രാം നല്‍കുന്നുണ്ട്. പരിചിതമല്ലാത്ത അക്കൗണ്ടുകളില്‍ നിന്നുള്ള ഇ-മെയില്‍ സന്ദേശങ്ങളോ കോളുകളോ മെസേജുകളോ ലഭിച്ചാല്‍ സൂക്ഷിക്കണമെന്നും മുന്നറിയിപ്പിലുണ്ട്.

ഇന്‍സ്റ്റഗ്രാമില്‍ ഏറ്റവു കൂടുതല്‍ ഫോളോവേഴ്‌സുള്ള അക്കൗണ്ടാണ് സെലേന ഗോമസിന്റേത്. 125 ദശലക്ഷം ഫോളോവേഴ്‌സാണ് സെലേനക്കുള്ളത്. ഈ അക്കൗണ്ടിലേക്ക് തന്നെ ഹാക്കര്‍മാര്‍ക്ക് നുഴഞ്ഞുകയറാനായത് ചെറുതല്ലാത്ത മുന്നറിയിപ്പാണ് ഇന്‍സ്റ്റഗ്രാമിന് നല്‍കുന്നത്. 2015-ല്‍ ബോറബോറയില്‍ അവധിക്കാലം ചെലവഴിക്കുന്നതിനിടെ പാപ്പരാസികള്‍ പകര്‍ത്തിയ ബീബറുടെ നഗ്‌നചിത്രമാണ് സെലേനയുടെ അക്കൗണ്ടില്‍ പ്രത്യക്ഷപ്പെട്ടത്. സെലേനയും ബീബറും ബന്ധത്തിലായിരുന്ന സമയത്തെ ചിത്രമാണിത്. പിന്നീട് സെലേന ഗോമസിന്റെ ഇന്‍സ്റ്റഗ്രാം അക്കൗണ്ട് നോക്കുന്ന സംഘം ട്വിറ്ററിലൂടെയാണ് നടന്ന സംഭവത്തെക്കുറിച്ച് വ്യക്തമാക്കിയത്.