ബോളിവുഡിന്റെ ഒരു കാലത്തെ സൗന്ദര്യതാരമായിരുന്ന ഷക്കില അന്തരിച്ചു. 82 വയസ്സായിരുന്നു. ഹൃദയാഘാതത്തെത്തുടര്‍ന്ന് മുംബൈയിലെ വീട്ടില്‍ ബുധനാഴ്ച രാത്രിയോടെയായിരുന്നു അന്ത്യം. അന്‍പതുകളിലും അറുപതുകളിലും ഹിന്ദി ചലച്ചിത്രലോകത്തെ മിന്നും നായികമാരിലൊരാളായിരുന്നു ഷക്കില.

1954ലിറങ്ങിയ 'ആര്‍ പാറിലെ' നര്‍ത്തകിയുടെ വേഷമാണ് ഷക്കിലയെ ഹിന്ദി ചലച്ചിത്രലോകത്ത് പ്രശസ്തയാക്കിയത്. തുടര്‍ന്നാണ് പ്രശസ്തമായ 'സിഐഡി' എന്ന ചിത്രത്തിലും അഭിനയിക്കുന്നത്. 1962ലിറങ്ങിയ ഹിറ്റ് ചിത്രം 'ചൈന ടൗണി'ല്‍ ഷമ്മി കപൂറിനൊപ്പം അഭിനയിച്ചിരുന്നു. 1960ലിറങ്ങിയ 'ശ്രീമാന്‍ സത്യവതി'യില്‍ രാജ്കപൂറിനൊപ്പവും അഭിനയിച്ചു.

14 വര്‍ഷത്തെ അഭിനയ ജീവിതത്തിനിടയില്‍ അന്‍പതിലേറെ സിനിമകള്‍- ദാസ്താന്‍, സിന്ദ്ബാദ് ദ് സെയ്‌ലര്‍, ആഘോഷ്, ഷഹന്‍ഷാ, രാജ് മഹല്‍, അര്‍മാന്‍, ബാബുജി ദീരേ ചല്‍ന, ടവര്‍ ഹൗസ്, ലാല്‍പാരി, രൂപ്കുമാരി, പോസ്റ്റ് ബോക്‌സ് നമ്പര്‍ 999 തുടങ്ങിയവയാണ് പ്രശസ്ത ചിത്രങ്ങള്‍.

1963ല്‍ പുറത്തിറങ്ങിയ 'ഉസ്താദോം കേ ഇസ്താദ്' ആണ് നായികയായി അഭിനയിച്ച അവസാന ചിത്രം. 1935 ജനുവരി ഒന്നിനായിരുന്നു ഷക്കിലയുടെ ജനനം. ബാദ്ഷാ ബീഗം എന്നായിരുന്നു ആദ്യകാലത്തെ പേര്. ഷക്കിലയ്‌ക്കൊപ്പം സഹോദരിമാരായ നൂര്‍, നസ്‌റീന്‍ എന്നിവരും ചലച്ചിത്ര മേഖലയിലുണ്ടായിരുന്നു.

1963ല്‍ വിവാഹിതയായ ശേഷം യുകെയിലായിരുന്നു ഷക്കിലയുടെ ജീവിതം. പിന്നീട് മുംബൈയിലേക്ക് തിരിച്ചെത്തിയ ഇവര്‍ 'ഹം ഇന്തസാര്‍ കരേംഗേ'(1989)യിലും രാജ്‌ദ്രോഹി (1993)യിലും അഭിനയിച്ചു.