മിന്നൽ മുരളി എന്ന സിനിമ മലയാളികൾക്ക് ഒരു പുത്തൻ അധ്യായമാണ് നൽകിയിരിക്കുന്നത്. ഇതുവരെ കണ്ടിട്ടില്ലാത്ത ഒരു അനുഭവം നമ്മുടെ പ്രേക്ഷകർക്ക് നൽകുകയായിരുന്നു അണിയറപ്രവർത്തകർ. ഇതിലൂടെ മലയാളത്തിന് പുതിയൊരു സൂപ്പർ ഹീറോയെ കൂടെ ലഭിച്ചിരിക്കുകയാണ്. സൂപ്പർ ഹീറോയായുള്ള ടൊവിനോയുടെയും നായകനോട് കട്ടയ്ക്ക് നിൽക്കുന്ന ഗുരു സോമസുന്ദരത്തിന്റെയും പ്രകടനങ്ങളെ സിനിമാ ലോകം നെഞ്ചേറ്റിക്കഴിഞ്ഞിരിക്കുന്നു. ഇതിനിടയിലും ആരാലും അധികം ശ്രദ്ധിക്കപ്പെടാതെ പോയ ഒരു സൂപ്പർ നായികയെക്കുറിച്ച് സോഷ്യൽ മീഡിയ മനസു തുറക്കുകയാണ്.

അതായത് സൂപ്പർ ഹീറോ പോലും അറിയാതെ പതിയിരുന്ന വലിയൊരു അപകടത്തെ ഇല്ലാതാക്കി സൂപ്പർ ഹീറോയെയും അവിടെ ഉള്ള ജനങ്ങളെ മുഴുവനും രക്ഷിച്ച ബിജിയെന്ന കഥാപാത്രത്തെയാണ് വാനോളം പുകഴ്ത്തുന്നത്. സിനിമ സൗഹൃദ കൂട്ടായ്മയായ മൂവി സ്ട്രീറ്റിലാണ് ബ്രൂസ്ലീ ബിജിയെ അവതരിപ്പിച്ച ഫെമിനയെ സിനിമാ പ്രേമികൾ അഭിനന്ദനങ്ങൾക്ക് വഴിവച്ചിരിക്കുന്നത്.

വിന്നി വിൻസെന്റ് പങ്കുവച്ച കുറിപ്പ്:

There Will be A woman Behind Every Man's Success..
അത് 100% ശരി വെച്ച കുറുക്കൻമലയിലെ ആരും ശ്രദ്ധിക്കപ്പെടാതെ പോയ ഒരു Super Woman.. സൂപ്പർ ഹീറോ പോലും അറിയാതെ പതിയിരുന്ന വലിയൊരു അപകടത്തെ ഇല്ലാതാക്കി സൂപ്പർ ഹീറോയെയും അവിടെ ഉള്ള ജനങ്ങളെ മുഴുവനും രക്ഷിച്ചവൾ.. ആരവവും അമ്പാരിയുമില്ലാതെ ആരാലും കൊട്ടിഘോഷിക്കപ്പെടാതെ അവൾ അവിടെ ഉണ്ടായിരുന്നു.. Without any Super powers She Saved The whole People..

കഥ അവളുടേതാവാത്തതിനാൽ ഇനിയും ആരും അവളെ പറ്റി പറഞ്ഞു കേട്ടില്ല. ഇത്പോലെ ആളുകൾ അറിയാതെ പോയ, ചരിത്രം രേഖപെടുത്താതെ പോയ നിരവധി സ്ത്രീകൾ ഈ ഭൂമുഖത്തു ജീവിച്ചു മരിച്ചിരിക്കാം.. ചരിത്രം നീതികാണിക്കാത്ത പോയ ഒരുപാട് പേരുടെ പ്രതിനിധി കൂടിയാണ് ഇവൾ... സ്ത്രീകളെ ഉയർത്തികൊണ്ട് വരുന്നു സ്ത്രീകളുടെ ഉന്നമനത്തിനായി പ്രവർത്തിക്കുന്നു എന്ന് പറയുന്ന so called ബുദ്ധിജീവികളെക്കാളും ഉച്ചത്തിൽ, സ്ത്രീയും ഈ സമൂഹത്തിന്റെ നിലനിൽപിന് തന്റെതായ രീതിയിൽ ശക്തമായി പ്രവർത്തിക്കുന്നുണ്ട് എന്നുള്ളത് ഏവരെയും ബോധ്യപ്പെടുത്തിയ സംവിധായകന് പ്രത്യേകം നന്ദി..

എന്നും നായകന്റെ കീഴിൽ നിൽക്കുന്ന നായികമാരെയാണ് സമൂഹം കാണാൻ ആഗ്രഹിക്കുന്നത്. എന്നാൽ അതിൽ നിന്നും വ്യത്യസ്തമായി ശക്തമായ നിലപാടുകളും പ്രവർത്തികളും ആയി നിന്ന സൂപ്പർ വുമണേയും നാം ചർച്ച ചെയ്യേണ്ടിയിരിക്കുന്നു. മാറ്റങ്ങൾ തുടങ്ങി വെച്ചിട്ടുണ്ട്.. അതിനിയും തുടരട്ടെ..
©Vinny Vincent K

മെറീന സെബാസ്റ്റ്യൻ പങ്കുവച്ച കുറിപ്പ്:

#MinnalMurali
#spoileralert
ഞങ്ങൾ പെണ്ണുങ്ങൾക്ക് എന്താ സൂപ്പർ ഹീറോ ആകാൻ പാടില്ലേ ..
തുടക്കം മുതൽ ഒടുക്കം വരെ സിനിമയിൽ സത്യത്തിനൊപ്പം മാന്യതക്കൊപ്പം ചങ്കൂറ്റത്തിനൊപ്പം നിലനിന്ന ഒരേ ഒരു ഹീറോയെ ആ സിനിമയിൽ ഞാൻ കണ്ടുള്ളു ...

സ്വന്തമായി അധ്വാനിച്ചു ജീവിക്കുന്ന,പ്രണയിച്ചു വഞ്ചിച്ചവനോട് പ്രതികാരം ചെയ്യാനോ ,കരഞ്ഞു കാലുപിടിക്കാനോ പോകാത്ത,നിയമപാലകരെ തല്ലുന്ന ആളെ തടയാൻ ചെല്ലുന്ന ഏറ്റവും ഒടുവിൽ തന്റെ ബുദ്ധിയും ശക്തിയും ഉപയോഗിച്ച് തന്റെ നാടിനെ ഒന്നാകെ വലിയ ദുരന്തത്തിൽ നിന്നും രക്ഷിച്ച യാതൊരു അമാനുഷിക കഴിവും ഇല്ലാത്ത .. യാതൊരു ക്രെഡിറ്റും ഏറ്റു വാങ്ങാത്ത യഥാർത്ഥ ഹീറോ ..!! ഇടിവെട്ട് ബിജി ..!