ബന്ദിന്റെ മകനാണ് ഹര്ത്താല്... ഹര്ത്താലിനെതിരെ ആഞ്ഞടിച്ച് നടന് മുരളി ഗോപി
എല്ലാ വിഷയങ്ങളിലും തന്റെതായ അഭിപ്രായങ്ങളുണ്ടെന്ന് തെളിയിച്ച നടനാണ് മുരളി ഗോപി. തെറ്റെന്ന് കണ്ടാല് തുറന്ന് പറയാന് മടിയില്ലാത്ത നടന് കൂടിയാണ് മുരളി. അടുത്തിടെ ഡി ജി പി സെന്കുമാര് പ്രേമം സിനിമയ്ക്കെതിരെ വിമര്ശനവുമായി എത്തിയപ്പോള് സെന്കുമാറിനോട് മുരളി ഗോപി ചോദിച്ച ചോദ്യങ്ങള് ഫേസ് ബുക്കില് നമ്മള് എല്ലാവരും കണ്ടതാണ്. ഗാന്ധി സിനിമ കണ്ടിട്ട് എല്ലാവരും ഗാന്ധിയായല്ലോ എന്നായിരുന്നു അന്ന് മുരളി ഗോപി തുറന്നടിച്ചത്.
മറ്റൊരു വിവാദ ഫെയ്സ്ബുക്ക് പോസ്റ്റുമായാണ് മുരളി ഗോപി രംഗത്തെത്തിയിരിക്കുന്നത്. കേരളത്തെ നിശ്ചലമാക്കിയ പണിമുടക്കിന് നേരെയാണ് മുരളി ഗോപിയുടെ അടുത്ത വിമര്ശനം. തന്റെ വിഹാരരംഗമായ സിനിമയുമായി ബന്ധിപ്പിച്ചാണ് മുരളി ഗോപി ബന്ദിനെയും പണിമുടക്കിനെയും കളിയാക്കുന്നത്. ഫേസ്ബുക്കില് മുരളി ഗോപിയുടെ പോസ്റ്റിന് വന് സ്വീകരണമാണ് ലഭിക്കുന്നത്. ബാഹുബലിയെ പോലെ തന്നെ വ്യവസ്ഥിതിയാല് കൊല്ലപ്പെട്ടവനാണ് ബന്ദ്. എന്നാല് ബന്ദിന്റെ മകന് ഇപ്പോഴും തെരുവുകളില് അലയുകയാണ്.
അവന്റെ പേരാണ് ഹര്ത്താല് ഇതാണ് ഹര്ത്താലിനെതിരെയുള്ള മുരളി ഗോപിയുടെ ഭാവന. ബാഹുബലിയുടെ അച്ഛനെ കണ്ടവര്ക്ക് അവന് അച്ഛന്റെ തനി പകര്പ്പാണ് എന്നറിയാം. അതുപോലെ തന്നെ ബന്ദിനെ കണ്ടിട്ടുള്ളവര്ക്ക് ഹര്ത്താല് ബന്ദിന്റെ തനിപ്പകര്പ്പാണ് എന്നും അറിയാമെന്നും മുരളി പറയുന്നു. ഹര്ത്താല് ദിവസം റോളര്സ്കേറ്റില് ജോലിക്ക് പോകുന്ന നവീന് എന്ന യുവാവിന്റെ ചിത്രം മാതൃഭുമി പ്രസിദ്ധീകരിച്ചത് മുരളി ഗോപി മറ്റൊരു പോസ്റ്റില് ഷെയര് ചെയ്യുന്നു.
ഒരെസമയം നടക്കുകയും വാഹനത്തില് പോകുകയും ചെയ്യുന്ന നവീന് ഒരു പ്രതികരണമാര്ഗമാണ് എന്നും താരം എഴുതുന്നു. മഗിഴ്മതിയുടെ തെരുവുകളില് അലയുന്ന ഹര്ത്താലിന്റെ കണ്ണില് പ്രതികാരമാണ് ഉള്ളതെന്നും മുരളി ഗോപി പറയുന്നു. 1997 ലാണ് കോടതി ബന്ദ് നിരോധിച്ചത്. എന്നാല് അതിന് ശേഷം ഹര്ത്താല് എന്ന് പേരിട്ടാണ് ഈ അക്രമം നടക്കുന്നത്. സോഷ്യല് മീഡിയയിലും അല്ലാതെയും മുരളി ഗോപി നടത്തുന്ന ഇടപെടലുകളെ സംഘി എന്ന് മുദ്രകുത്തി നിശബ്ദമാക്കാനാണ് എതിരാളികള് ശ്രമിക്കാറുള്ളത്. എന്നാല് താന് ഒരു പാര്ട്ടിയുടെയും ആളല്ല എന്നാണ് മുരളി ഗോപിക്ക് പറയാനുള്ളത്.
ബുധനാഴ്ചത്തെ പണിമുടക്കിന് നേതൃത്വം നല്കിയത് ഇടതുസംഘടനകളാണ്. ബി ജെ പി സംഘടനയായ ബി എം എസ് പണിമുടക്കിന് എതിരായിരുന്നു. വാജ്പേയി ഭരണകാലത്ത് ബി ജെ പിയിലെത്തിയ ഭരത് ഗോപി അത്തവണ ലോക്സഭ തിരഞ്ഞെടുപ്പില് മത്സരിക്കുകയും ചെയ്തിരുന്നു. എന്നാല് തോറ്റുപോയി. ഭരത് ഗോപിയുടെ മകനാണ് മുരളി ഗോപി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
