ഉപ്പും മുളകും എന്ന ഹാസ്യ പരമ്പരയില്‍ നിന്ന് ലച്ചു ആയി എത്തുന്ന ജൂഹി റുസ്തഗി പിന്മാറിയതോടെയാണ് സത്യത്തില്‍ ആ പരമ്പരയും പതിയെ പിന്നോട്ട് പോകാന്‍ തുടങ്ങിയത്. ഉപ്പും മുളകിനും സമാനമായി പല സീരിയലുകളും വന്നെങ്കിലും ബാലുവിന്റെയും നീലുവിന്റെയും കുടുംബത്തിനൊപ്പം എത്താന്‍ അതിനൊന്നും കഴിഞ്ഞില്ല.

പുതിയ രൂപത്തിലും ഭാവത്തിലും, ഉപ്പും മുളകും ടീം വീണ്ടും ഒന്നിയ്ക്കുന്ന പരമ്പരയാണ് എരിവും പുളിയും. സീ കേരളത്തില്‍ സംപ്രേക്ഷണം ചെയ്യുന്ന എരിവും പുളിവും എന്ന പരമ്പരയിലൂടെ ജൂഹി റുസ്തകിയും തിരിച്ചെത്തുന്നു. ഇപ്പോഴിതാ, തനറെ ജീവിതത്തി കുറിച്ചും പുതിയ സീരിയലിനെയും കുറിച്ച് സംസാരിക്കുകയാണ് ജൂഹി. ഒരു യുട്യൂബ് ചാനലിന് നൽകിയ അഭിമുഖത്തിലാണ് പുതിയ വിശേഷങ്ങളെ കുറിച്ച് പറഞ്ഞിരിക്കുന്നത്.

താരത്തിന്റെ വാക്കുകൾ ഇങ്ങനെ...

ഉപ്പും മുളകും ടീം വീണ്ടും ഒന്നിയ്ക്കും എന്ന് ഒരിക്കലും കരുതിയില്ല. എരിവും പുളിവും എന്ന പരമ്പരയിലേക്ക് വിളിയ്ക്കുമ്പോള്‍ അധികം ആലോചിക്കേണ്ടി വന്നില്ല എന്ന് ജൂഹി പറയുന്നു. ഞങ്ങളുടെ കുടുംബവുമായി വളരെ അധികം ഇന്റിമസിയുണ്ട്. എനിക്ക് ഇഷ്ടമാണ്. അതുകൊണ്ട് തിരിച്ചുവരുമ്പോള്‍ വളരെ അധികം സന്തോഷമായികുന്നു.

മേക്കപ്പിനോട് തുടക്കം മുതലേ താത്പര്യം ഇല്ല എന്ന് ജൂഹി പറയുന്നു. എവിടെയും പോകുമ്പോള്‍ മേക്കപ്പ് ഇടാറില്ല. ഫോട്ടോ ഷൂട്ടിനോ മറ്റോ മേക്കപ്പ് വേണം എന്ന് പറഞ്ഞാല്‍ മാത്രമാണ് ഇടുന്നത്. എന്നെ കാണുന്നവരും പറയും മേക്കപ്പ് ഇടാതെയാണ് നല്ലത് എന്ന്. എനിക്കും അതാണ് ഇഷ്ടം.

പുറത്തിറങ്ങിയാല്‍ അധികമാളുകളും പറയുന്നത് എന്റെ കണ്ണുകളെ കുറിച്ചാണ്. മാസ്‌ക് ധരിച്ച് പോയാലും കണ്ണ് കണ്ട് ആളുകള്‍ തിരിച്ചറിയും. കുറച്ച് ഉള്ളോട്ട് പോയ കണ്ണ്, വെള്ളി മൂങ്ങയെ പോലെയാണെന്നാണ് പറയാറുള്ളത്. ആദ്യമൊക്കെ വെള്ളിമൂങ്ങ എന്ന് ചിലര്‍ വിളിക്കുമായിരുന്നു. അന്നൊന്നും എനിക്ക് എന്റെ കണ്ണുകള്‍ ഇഷ്ടമായിരുന്നില്ല. ഇപ്പോള്‍ ഇത് എന്റെ ഐഡന്റിറ്റിയാണ്. അതുകൊണ്ട് ഇഷ്ടമാണ്.

സിനിമയിലേക്ക് പോകുന്നു എന്ന ഗോസിപ്പുകളെ കുറിച്ചും ജൂഹി പ്രതികരിച്ചു. ഉപ്പും മുളകും എന്ന സീരിയല്‍ ചെയ്യുന്ന സമയത്ത് അവസരങ്ങള്‍ വന്നിരുന്നു. ചെയ്യാന് താത്പര്യം ഉണ്ടായിരുന്നുവെങ്കിലും, ഡേറ്റിന്റെ പ്രശ്‌നം ഉള്ളത് കൊണ്ട് ഒഴിവാക്കി.

ചെയ്യാത്തതില്‍ വിഷമം ഒന്നും തോന്നിയിട്ടില്ല. വിധിച്ചതേ കിട്ടു എന്ന് ചിന്തിക്കാന്‍ എനിക്ക് ഇപ്പോള്‍ കഴിയുന്നുണ്ട്. സിനിമയില്‍ അവസരം വന്നാല്‍ എരിവും പുളിയും എന്ന സീരിയലിനെ ബാധിക്കാതെ ചെയ്യാന്‍ താത്പര്യം ഉണ്ട് എന്നും നടി പറഞ്ഞു.

എന്റെ വിവാഹത്തെ കുറിച്ചും മറ്റുമൊക്കെ കമന്റുകള്‍ വരാറുണ്ട്. കല്യാണം കഴിഞ്ഞു എന്നൊക്കെയാണ് കമന്റുകള്‍. പക്ഷെ അതൊന്നും എനിക്ക് അറിയില്ല. എന്നെ ബാധിക്കാത്ത കമന്റുകളോട് പ്രതികരിക്കാറില്ല. ഒരു മോര്‍ഫിങ് വീഡിയോയ്ക്ക് എതിരെ മാത്രമാണ് കേസ് കൊടുത്തത്.

മറ്റ് മോശം കമന്റുകളോട് പ്രതികരിക്കാറില്ല. മനക്കട്ടി കൊണ്ട് ഒന്നുമല്ല. ശീലിച്ചു. അത്രയ്ക്ക് മനക്കട്ടി ഒന്നും എനിക്കില്ല. ആദ്യമൊക്കെ ഒരുപാട് കരഞ്ഞിട്ടുണ്ട്. പക്ഷെ ഇപ്പോള്‍ ശീലമായി. നിങ്ങള്‍ എന്ത് വേണമെങ്കിലും പറഞ്ഞോ, ഞാന്‍ മൈന്റ് ചെയ്യില്ല എന്ന അവസ്ഥയാണ് ഇപ്പോള്‍- ജൂഹി റുസ്തഗി പറഞ്ഞു.