കുടുംബവിളക്ക് സീരിയലിൽ സഞ്ജനയായി വന്ന് പ്രേക്ഷകരുടെ ഇടയിൽ സ്ഥാനം നേടിയ നടിയാണ് രേഷ്മ എസ് നായര്‍. പ്രതീഷും സഞ്ജനയും തമ്മിലുള്ള വിവാഹവും പിന്നീടുള്ള ജീവിതവുമൊക്കെ രസകരമായി സീരിയലില്‍ കാണിച്ചിരുന്നു.

അതേ സമയം യഥാര്‍ഥ ജീവിതത്തില്‍ രേഷ്മയ്ക്ക് പ്രണയമുണ്ടോ എന്ന് ചോദിച്ചാല്‍ തമാശയോടെയുള്ള മറുപടിയാണ് നടി നല്‍കുക. അടുത്തിടെ സ്വാസിക വിജയ് അവതാരകയായിട്ടെത്തുന്ന റെഡ് കാര്‍പെറ്റ് എന്ന പരിപാടിയില്‍ രേഷ്മ അതിഥിയായി എത്തിയിരുന്നു.

മൗനരാഗം സീരിയലിലെ കേന്ദ്രകഥാപാത്രത്തെ അവതരിപ്പിക്കുന്ന നടന്‍ കല്യാണ്‍ ഖന്നയും രേഷ്മയ്‌ക്കൊപ്പം എത്തിയിരുന്നു. ചെറിയ പ്രായം മുതലേ അടുത്ത് അറിയുന്ന സുഹൃത്തുക്കളാണ് കല്യാണും രേഷ്മയും. സ്വാസികയുടെ ചോദ്യത്തിന് തന്റെ ആദ്യ പ്രണയത്തെ കുറിച്ചും അത് നഷ്ടപ്പെടാനുണ്ടായ കാരണത്തെ കുറിച്ചുമൊക്കെ രേഷ്മ തുറന്ന് പറഞ്ഞിരുന്നു. അതേ സമയം ആത്മാര്‍ഥമായി തനിക്ക് പ്രണയങ്ങളൊന്നും ഉണ്ടായിട്ടില്ലെന്നാണ് കല്യാണ്‍ പറയുന്നത്.

പ്രണയത്തെകുറിച്ചുള്ള സ്വാസികയുടെ ചോദ്യത്തിന് ഇരുവരുടെയും മറുപടി ഇങ്ങനെയായിരുന്നു. ആദ്യ പ്രണയം നാലാം ക്ലാസില്‍ പഠിക്കുമ്പോഴായിരുന്നു. പ്രണയം ഒന്നുമല്ല, ഒരു ക്രഷ് ഉണ്ടായിരുന്നു എന്ന് പറയാം. അഞ്ചാം ക്ലാസില്‍ എത്തിയപ്പോഴെക്കും ആ കുട്ടി സ്‌കൂള്‍ മാറി പോയി.

അതിന് ശേഷം അഞ്ചാം ക്ലാസ് മുതല്‍ താന്‍ ഗേള്‍സ് സ്‌കൂളിലേക്ക് മാറി. അങ്ങനെ എന്റെ ആദ്യ പ്രണയം പോയി എന്നാണ് രേഷ്മ പറയുന്നത്. ഇത്രയും കാലത്തിനിടയില്‍ എത്ര പ്രണയമുണ്ടായിട്ടുണ്ട് എന്ന സ്വാസികയുടെ ചോദ്യത്തിന് ആത്മാര്‍ഥമായി ഒരു പ്രണയം ഉണ്ടായിട്ടുണ്ടെന്ന് രേഷ്മ സൂചിപ്പിച്ചു.

ബോയിസ്-ഗേള്‍സ്് മിക്‌സ്ഡ് സ്‌കൂളില്‍ പഠിക്കുന്നതാണ് എന്ത് കൊണ്ടും നല്ലത് എന്നാണ് നടിയുടെ അഭിപ്രായം. അതിന്റെ ഒരു വൈബ് വേറെയാണ്. ഗേള്‍സ് സ്‌കൂള്‍ ആവുമ്പോള്‍ നമ്മുക്ക് എന്തും കാണിക്കാം എന്ന രീതിയിലാണ്. ബോയിസ് സ്‌കൂളിലും അങ്ങനെയാണ്. മിക്‌സഡ് ആവുമ്പോള്‍ ഗേള്‍സ് ഇങ്ങനെയാണ്, അല്ലെങ്കില്‍ ബോയിസ് ഇങ്ങനെയാണ് എന്നൊക്കെ നമുക്ക് മനസിലാക്കാന്‍ പറ്റും. അങ്ങോട്ടും ഇങ്ങോട്ടും ബഹുമാനം കൊടുക്കാന്‍ പറ്റുമെന്നും രേഷ്മ വ്യക്തമാക്കുന്നു.

ആത്മാര്‍ഥമായി കല്യാണ്‍ പ്രണയിച്ചിട്ടുണ്ടോ എന്ന ചോദ്യത്തിന് താനിത് വരെ അങ്ങനെ പ്രണയിച്ചിട്ടില്ലെന്നാണ് താരം പറയുന്നത്. തേപ്പ് കൊടുക്കുകയും കിട്ടിയിട്ടുമുണ്ട്. അതിലൊരു സീരിയസ്‌നെസ് ഒന്നും തോന്നിയിട്ടില്ലെന്ന് കല്യാണ്‍ പറയുമ്പോള്‍ ഇവന് അങ്ങനത്തെ ഒരു സെന്റിമെന്‍സും ഇല്ലെന്നാണ് രേഷ്മയുടെ അഭിപ്രായം.

ബോളിവുഡിലെ താരങ്ങള്‍ക്ക് ഉള്ളത് പോലെ കല്യാണിന്റെ പേരിനൊപ്പം ഖന്ന എന്നത് വന്നത് എങ്ങനെയാണെന്നും സ്വാസിക ചോദിച്ചിരുന്നു. അച്ഛനാണ് അങ്ങനൊരു പേരിടുന്നത്. തന്റെ ചേട്ടന്റെ പേര് കലേഷ് ഖന്ന എന്നാണ്. മക്കളുടെ പേരിനൊപ്പം ഖന്ന എന്ന് കൂടി ചേര്‍ത്തത് മറ്റുള്ളവരില്‍ നിന്നും വ്യത്യസ്തത ഉണ്ടാവാന്‍ വേണ്ടിയാണെന്ന് അച്ഛന്‍ മുന്‍പൊരിക്കല്‍ പറഞ്ഞിട്ടുണ്ട്.

ഒരു സ്‌കൂളില്‍ ചേര്‍ക്കുമ്പോഴും, കലാപരമായി ഇവര്‍ എന്തെങ്കിലും ആവുകയാണെങ്കില്‍ പേരിനൊരു ഗും ഇരിക്കട്ടേ എന്ന് കരുതി ഇട്ടതാണ് ഈ പേരെന്ന് കല്യാണ്‍ പറയുന്നു. എന്തായാലും അച്ഛന്റെയും അമ്മയുടെയും ആ ദീര്‍ഘ വീഷണത്തെ സമ്മതിച്ചേ പറ്റുകയുള്ളു എന്നാണ് സ്വാസിക പറയുന്നത്.