സിനിമയില്‍ നിന്നും സീരിയലിലേക്കെത്തിയ താരമാണ് ദേവിക നമ്പ്യാര്‍. അഭിനയത്തിന് പുറമെ പാടാനുള്ള കഴിവുമുണ്ട് ദേവികയ്ക്ക്. രാക്കുയിലില്‍ തുളസിയെ അവതരിപ്പിച്ച് വരികയാണ് താരമിപ്പോള്‍. രാക്കുയിലില്‍ ഗാനം ആലപിക്കാനായി വന്നപ്പോഴായിരുന്നു ഇരുവരും അടുത്ത സുഹൃത്തുക്കളായി മാറിയത്. അഭിനയം പോലെ അത്ര കംഫര്‍ട്ട് അല്ലെങ്കിലും വിജയിനൊപ്പമായി ഗാനം ആലപിച്ചിരുന്നു ദേവിക. പരമ്പരയില്‍ അതിഥിയായും വിജയ് മാധവ് പ്രത്യക്ഷപ്പെട്ടിരുന്നു.

രണ്ട് ആഴ്ച മുന്‍പ് ആണ് നടി ദേവിക നമ്പ്യാരുടെയും ഗായകനും സംഗീത സംവിധായകനുമായ വിജയ് മാധവന്റെയും വിവാഹം കഴിഞ്ഞത്. ഗുരുവായൂര്‍ വച്ച് ആയിരുന്നു താലികെട്ട്. കൊവിഡ് മാനദണ്ഡങ്ങള്‍ എല്ലാം പാലിച്ച് കല്യാണവും റിസപ്ഷനും കഴിഞ്ഞു. എന്നാല്‍ പിന്നീട് ഇരുവരുടെയും യാതൊരു വിവരവും ഇല്ല. അതിന്റെ കാരണം ഇതാ ദേവിക നമ്പ്യാര്‍ തന്നെ പറയുന്നു.

കല്യാണത്തിന്റെ ചില വീഡിയോകളും ഫോട്ടോകളും ദേവിക ഇന്‍സ്റ്റഗ്രാമില്‍ പങ്കുവച്ചിരുന്നു. എന്നാല്‍ പുതുമോടിയില്‍ മറ്റ് താരദമ്പതികള്‍ പങ്കുവയ്ക്കുന്ന സ്ഥിരം ഫോട്ടോ ഒന്നുമില്ല. കല്യാണം കഴിഞ്ഞുള്ള ആദ്യത്തെ രണ്ടാഴ്ചയെ കുറിച്ചും വിചിത്രമായ ആദ്യരാത്രിയെ കുറിച്ചുമെല്ലാം ഒരു യുട്യൂബ് ചാനലിന് നൽകിയ അഭിമുഖത്തിൽ ദേവിക സംസാരിച്ചു.

ഗുരുവായൂര്‍ അമ്പലത്തില്‍ വച്ചായിരുന്നു വിവാഹം. തിരിച്ച് നാട്ടിലെത്തിയത് പാതിരാത്രിയാണ്. പിറ്റേന്ന് വെളുപ്പിലാണ് ഭര്‍തൃവീട്ടില്‍ വധു പ്രവേശിക്കേണ്ട മുഹൂര്‍ത്തം കുറിച്ചു തന്നത്. അതുകൊണ്ട് തൊട്ടടുത്ത റിസോട്ടിലാണ് അന്നത്തെ ദിവസം താമസിച്ചത്. അവര്‍ ബെഡ് റൂം നന്നായി അലങ്കരിക്കുകയൊക്കെ ചെയ്തിരുന്നു. പഴങ്ങളും കൊണ്ടു വച്ചിട്ടുണ്ട്. പാതി രാത്രി ആര് കഴിക്കാനാണ് ഇതൊക്കെ എന്നായിരുന്നു എന്റെ ചിന്ത.

രണ്ട് ആഴ്ച ഞങ്ങള്‍ക്ക് ഹണിമൂണ്‍ വീട്ടിലെ ബെഡ് റൂമില്‍ തന്നെയായിരുന്നു. പിറ്റേ ദിവസം തന്നെ വിജയ്ക്ക് കൊവിഡ് പോസിറ്റീവ് ആയി. അതുകൊണ്ട് രണ്ട് ആഴ്ചയും ഞങ്ങള്‍ വീട്ടിനകത്ത്, ബെഡ് റൂമില്‍ തന്നെയായിരുന്നു.

എനിക്ക് വയ്യാതെ ആയാല്‍ അമിത ശ്രദ്ധ തരുന്നത് എനിക്ക് ഇഷ്ടമല്ല. അതുപോലെ തന്നെയാണ് ഞാന്‍ മറ്റുള്ളവരെയും ചിലപ്പോള്‍ ട്രീറ്റ് ചെയ്യുന്നത്. പക്ഷെ ഭര്‍ത്താവ് അല്ലേ, കല്യാണ കഴിഞ്ഞതല്ലേ ഉള്ളൂ എന്നൊക്കെ കരുതി ഞാന്‍ മരുന്നു ഭക്ഷണവും എല്ലാം കൊടുത്തിട്ടും മാഷ് കഴിച്ചില്ല. രണ്ട് ദിവസം ഉപവാസം കിടന്നു. പക്ഷെ ഞാന്‍ നന്നായി ഭക്ഷണം കഴിച്ചു - ദേവിക പറഞ്ഞു.