കൊച്ചിയിൽ നടിയെ ആക്രമിച്ച കേസന്വേഷിക്കുന്ന അന്വേഷണ ഉദ്യോഗസ്ഥരെ അപായപ്പെടുത്താനുള്ള ഗൂഢാലോചന നടത്തിയെന്ന കേസ് രജിസ്റ്റര്‍ ചെയ്തതിനു പിന്നാലെ നടൻ ദിലീപടക്കം നാലുപ്രതികള്‍ സമർപ്പിച്ചിരിക്കുന്ന ജാമ്യാപേക്ഷയിൽ ഹൈക്കോടതി വിധി വരുന്നത് കാത്തിരിക്കുകയാണ് എല്ലാവരും. ചാനലുകളിൽ ഇതു സംബന്ധിച്ച ചർച്ചകളും സജീവമാണ്. പലരും നടൻ ദിലീപിന് പിന്തുണയുമായി എത്തിയിട്ടുണ്ട്. അതിലെ പ്രമുഖരിലൊരാളാണ് നടൻ ആദിത്യൻ ജയൻ.

സംഭവവികാസങ്ങൾക്കൊക്കെ ഇടയ്ക്ക് നടൻ ദിലീപ് നിരപരാധിയാണ് എന്നും ഇപ്പോൾ സംവിധായകൻ ബാലചന്ദ്ര കുമാർ ഉന്നയിച്ചിരിക്കുന്ന ആരോപണങ്ങളെല്ലാം തെറ്റാണെന്നും വാദിച്ച് ആദിത്യൻ നേരത്തേ രംഗത്തെത്തിയിരുന്നു. തൻ്റെ ഫേസ്ബുക്കിലൂടെയാണ് ആദിത്യൻ ജയൻ തൻ്റെ നിലപാട് വ്യക്തമാക്കുന്നത്.

ഇപ്പോഴിതാ ആദിത്യൻ തൻ്റെ സോഷ്യൽ മീഡിയയിലൂടെ പങ്കുവെച്ച ഒരു വീഡിയോ ആണ് ശ്രദ്ധ നേടുന്നത്. ദിലീപ് അഭിനയിച്ച റൺവേ എന്ന സിനിമയിലെ ഒരു രംഗമാണ് ആദിത്യൻ പങ്കുവെച്ചിരിക്കുന്നത്. നിരവധി പേരാണ് വീഡിയോയോട് പ്രതികരിച്ചിരിക്കുന്നത്. നിരവധി പേരാണ് ആദിത്യൻ പങ്കുവെക്കുന്ന പോസ്റ്റുകൾ പങ്കുവെക്കുകയും ലൈക്ക് ചെയ്യുകയും കമൻ്റ് ചെയ്യുകയും ചെയ്യുന്നത്.

'വിഡ്ഢിത്തം കാണിക്കല്ലേ ബാലൻ സാറേ, ഫയർ എഞ്ചിൻ്റെയൊക്കെ പിന്നാലെ പിടിക്കാൻ നമ്മടെ ഈ സർക്കാർ ജീപ്പിന് കഴിയോ? വെല്ലുവിളികളാവാം, പക്ഷേ അത് നിന്നേക്കാൾ നാലഞ്ചോണം കൂടുതൽ ഉണ്ടവരോടാവരുത്, വരട്ടേ'; ദിലീപിൻ്റെ വാക്കുകൾ പങ്കിട്ട് ആദിത്യൻ ഫേസ്ബുക്കിൽ ഇങ്ങനെ കുറിച്ചു. 'വെല്ലുവിളിക്കുമ്പോൾ ശ്രദ്ധവേണം'.

ബാലചന്ദ്ര കുമാറിനെതിരെ ഉയരുന്ന വിമർശനങ്ങളുടെ വീഡിയോയും ആദിത്യൻ പങ്കുവെച്ചിരുന്നു. ചാനൽ ചർച്ചയിൽ ബാലചന്ദ്രകുമാർ പറഞ്ഞ ആരോപണങ്ങളൊക്കെ തെറ്റാണെന്ന് ചൂണ്ടിക്കാട്ടി നേരത്തേ ആദിത്യൻ രംഗത്ത് വന്നിരുന്നു. ഒപ്പം നടൻ ദിലീപിന് നിരുപാധിക പിന്തുണയും ആദിത്യൻ വ്യക്തമാക്കിയിട്ടുണ്ട്.