കെഎസ്എഫി ചിട്ടിയില്‍ ചേര്‍ന്ന് പറ്റിക്കപ്പെട്ടു എന്ന് പറഞ്ഞ് സിനിമ - സീരിയല്‍ താരം ലക്ഷ്മിപ്രിയ രംഗത്ത്. കോടികളുടെ മൂല്യമുള്ള വസ്തു ജാമ്യമായി നല്‍കിയിട്ടും വാഗ്ദാനം നല്‍കിയ തുക നല്‍കിയില്ല എന്ന് ലക്ഷ്മി പ്രിയ പറയുന്നു. അതീവ ദുഃഖ അവസ്ഥയിലൂടെയാണ് താന്‍ കടന്ന് പോകുന്നത് എന്നും 37 വര്‍ഷത്തെ ജീവിതത്തിന് ഇടയില്‍ ഇത്രയും മോശം അനുഭവം ആദ്യമായിട്ടാണെന്നും നടി ഫേസ്ബുക്കില്‍ കുറിച്ചു.

താരത്തിന്റ ഫെയ്‌സ്ബുക്ക് പോസ്റ്റ് വായിക്കാം;

പ്രിയമുള്ളവരെ അതീവ ദുഃഖകരമായ അവസ്ഥയിലൂടെയാണ് ഞാന്‍ കടന്ന് പോകുന്നത്. 37 വയസ്സ് ജീവിതത്തിന് ഇടയില്‍ ഇത്രയും മോശം സാഹചര്യം ആദ്യമായിട്ടാണ് അനുഭവിയ്ക്കുന്നത്. ഓരോരുത്തരുടെയും ജീവിതത്തില്‍ ഓരോ സ്വപ്‌നങ്ങളുണ്ടാവും.

ആ സ്വപ്‌നം സാക്ഷാത്കരിക്കാന്‍ നമ്മളെ പോലെയുള്ള സാധാരണക്കാര്‍ ലോണ്‍ എടുക്കുകയോ ചിട്ടി കൂടുകയോ ചെയ്യും. അത്തരത്തിലുള്ള എന്റെ ഒരു സ്വപ്‌ന സാക്ഷാത്കാരത്തിനായി തൃപ്പൂണിത്തുറയിലുള്ള കെ എസ് എഫ് ഇ മെയിന്‍ ബ്രാഞ്ചില്‍ ഒരു ചിട്ടി വയ്ക്കുന്നതിനെ കുറിച്ച് വിശദമായി അന്വേഷിക്കാന്‍ ഞാന്‍ ചെല്ലുന്നു.

അവിടെ എത്തിയ എന്നെ അവര്‍ ഹൃദയപൂര്‍വ്വം സ്വീകരിയ്ക്കുകയും ഉടനെ തുടങ്ങാന്‍ പോകുന്ന വലിയ ചിട്ടി (50 x 200000) യെ കുറിച്ച് പറഞ്ഞ് മനസ്സിലാക്കുകയും ചെയ്യുന്നു. ഒരു ചിട്ടി ചേരാം എന്ന ഉറപ്പില്‍ ഞാന്‍ മടങ്ങുന്നു. എന്നാല്‍ അവര്‍ക്ക് ഏതാനും ടിക്കറ്റ് കൂടെ പോകാനുണ്ട് നമ്മുടെ പരിചയത്തില്‍ ആരെങ്കിലും ഉണ്ടോ എന്ന് ചോദിച്ച് വിളിക്കുന്നു. ഞാന്‍ സമ്മതിച്ച ഒരു കുറിയുടെ രണ്ട് ലക്ഷം രൂപ അടയ്ക്കുവാനായി ചെല്ലുമ്പോള്‍, ഞാന്‍ എന്റെ വലിയ ഒരു ആഗ്രഹം സാധിയ്ക്കുവാന്‍ ഒരു വലിയ ഫണ്ടിന്റെ ആവശ്യം ഉണ്ട് എന്നും അതിനാല്‍ നാല് നറക്കുകളില്‍ ചേരാന്‍ സമ്മതമാണ് എന്നും അവരെ അറിയിച്ചു.

ആദ്യത്തെ രണ്ട് നറുക്കിന്റെ തുക എനിക്ക് റോളിങിനായി ആവശ്യമുണ്ട് എന്നും അവരോട് പറഞ്ഞിരുന്നു. ആദ്യത്തെ നറുക്കുകള്‍ മുപ്പത് ശതമാനം ലേലക്കിഴിവിലാണ് പോകുന്നത് എന്നും എഴുപത് ലക്ഷം മാഡത്തിന് സുഖമായി എടുക്കാം എന്നും വളരെ സന്തോഷത്തോടെ അവര്‍ അറിയിച്ചു. അങ്ങനെ ഞാന്‍ നാല് കുറിയും ഒരു സുഹൃത്തിനെ കൊണ്ട് ഒരു കുറിയും വെപ്പിച്ചു. ട്ടോട്ടല്‍ 5 കുറി.

എനിക്ക് എഴുപത് ലക്ഷം വേണ്ട എന്നും 50 ലക്ഷം മതി എന്നും 20 ലക്ഷം കെഎസ്എഫ്ഇയില്‍ നിക്ഷേപിയ്ക്കാം എന്നും സമ്മതിക്കുന്നു. ആ ഉറപ്പില്‍ എന്റെ അക്കൗണ്ടില്‍ ഉണ്ടായിരുന്ന പണം ആദ്യ തവണ 8 ലക്ഷം, പിന്നീട് 30 ശതമാനം കിഴിവില്‍ ആറ് ലക്ഷം വീതം മൂന്ന് മാസവും അടച്ചു. മൂന്നാമ്തതെ നുക്ക് എനിക്ക് വീണു. തൃശ്ശൂരിലുള്ള ഞങ്ങളുടെ പ്രോപ്പര്‍ട്ടിയാണ് ജാമ്യം കൊടുക്കുന്നത്. ആ പ്രോപ്പര്‍ട്ടിയുടെ മാര്‍ക്കറ്റ് വാല്യു ഒരു കോടി 15 ലക്ഷമാണ്. എന്നാല്‍ കെഎസ്എഫ്ഇ തൃപ്പൂണിത്തുറ മാനേജരും വാലുവേറ്ററും ആ

പ്രോപ്പര്‍ട്ടിയ്ക്ക് 76 ലക്ഷം രൂപ മാത്രമാണ് അതിന് വാല്യു ഇട്ടത്. അതിന്റെ പകുതിയായ 38 ലക്ഷം രൂപ മാത്രമേ എനിക്ക് തരാന്‍ പറ്റുകയുള്ളൂ. ആ തുക കെഎസ്എഫ്ഇയില്‍ നിക്ഷേപിക്കണം എന്നുമാണ് പറയുന്നത്. മാസം ആറ് ലക്ഷം രൂവ വച്ച് അടച്ചിട്ടും (ഫണ്ടിന്റെ അടക്കം 7.5 ലക്ഷം) 38 ലക്ഷം വേണ്ട ആ തുക കിട്ടിയിട്ട് ഞങ്ങള്‍ക്ക് ഒന്നിനും തികയില്ല എന്ന് അവരെ അറിയിക്കുന്നു.

ശേഷം ഒന്നര ലക്ഷം രൂപ കൂടെ അടച്ചു. പിന്നീടുള്ള തുകകള്‍ ഒന്നും അടയ്ക്കാന്‍ സാധിയ്ക്കുന്നില്ല. വേറെ ഏതെങ്കിലും പ്രോപ്പര്‍ട്ടി കൂടെ വച്ചാല്‍ 70 ലക്ഷം തരാം എന്ന് പറഞ്ഞത് അനുസരിച്ച് തിരുവനന്തപുരത്ത്, ജയേഷേട്ടന്റെ ഒരു സുഹൃത്തിന്റെ പ്രോപ്പര്‍ട്ടി കാണുകയും അദ്ദേഹം മുന്‍കൂര്‍ കാശ് വാങ്ങാതെ ഞങ്ങളുടെ പേരില്‍ രജിസ്റ്റര്‍ ചെയ്തു നല്‍കാം, കെഎസ്എഫ്ഇ തുക കിട്ടുമ്പോള്‍ കാശ് തന്നാല്‍ മതി എന്ന് പറയുകയും ചെയ്യുന്നു.

ഇതനുസരിച്ച് തിരുവനന്തപുരം ശാസ്തമംഗലം കെഎസ്എഫ്ഇ മാനേജര്‍ സെന്റിന് 17.5 ലക്ഷം വീതമുള്ള സ്ഥലത്തിന് എട്ട് ലക്ഷം മാത്രമേ വിലയിടുകയുള്ളൂ എന്ന് പറഞ്ഞു. അദ്ദേഹത്തെ ഞാന്‍ നേരിട്ട് കണ്ടപ്പോള്‍ പറഞ്ഞത്, ശാസ്തമംഗലം ബ്രാഞ്ചില്‍ ഞാന്‍ രണ്ട് ലക്ഷം വീതം മൂന്ന് നറുക്കില്‍ ചേര്‍ന്നാല്‍ മാത്രം എനിക്ക് മാന്യമായ തുക ഇട്ട് നല്‍കാം എന്നാണ്. എന്റെ നിസ്സഹായതയ്ക്ക്, ഒരു കുറി പോലും എനിക്ക് അടയ്ക്കാന്‍ പറ്റില്ല എന്ന് അറിഞ്ഞിട്ടും ഒപ്പിട്ട് കൊടുക്കേണ്ടി വന്നു.

ഈ വിവരങ്ങള്‍ എല്ലാം അറിയിച്ചുകൊണ്ട് എറണാകുളം റീജണല്‍ ബ്രാഞ്ചില്‍ ഞാന്‍ വിളിച്ച് പരാതി അറിയിക്കുകയും ചെയ്തു. നാളിതുവരെ ഒരു പരിഹാരവും ഉണ്ടായിട്ടില്ല. പകരം കിട്ടിയത് മുടങ്ങിയ ചിട്ടിയ്ക്ക് പലിശ അറുപതിനായിരം അടക്കണം എന്ന ലെറ്റര്‍ ആണ്. അങ്ങനെ എങ്കില്‍ ആ 38 ലക്ഷം എടുത്ത് തത്കാലമുള്ള പ്രശ്‌നത്തില്‍ നിന്ന് തലയൂരാം എന്ന് കരുതിയപ്പോള്‍ അവര് പറയുന്നത് 18 ലക്ഷം തരാം ബാക്കി അവിടെ ഡെപ്പോസിറ്റ് ചെയ്യണം എന്നാണ്. ബാക്കി 52 ലക്ഷം അവിടെ ഡെപ്പോസിറ്റ് ചെയ്യണം പോലും

പ്രിയമുള്ളവരെ മൂന്ന് കോടി രൂപ മാര്‍ക്കറ്റ് വാല്യു ഉള്ള ഒരു പ്രോപ്പര്‍ട്ടി നിങ്ങള്‍ക്ക് ഉണ്ടെങ്കില്‍ കെഎസ്എഫ്ഇ അതിന് രണ്ട് കോടി രൂപ വിലയിടും. എന്നിട്ട് അതിന്റെ പകുതി ഒരു കോടി രൂപ തരും എന്ന് പറയും. അതെടുക്കാന്‍ ചെല്ലുമ്പോള്‍ നമുക്ക് മനസ്സിലാവാത്ത കണക്കുകള്‍ പറഞ്ഞ് നമ്മുടെ ക്യാഷ് അവിടെഡെപ്പോസിറ്റ് ചെയ്യിപ്പിയ്ക്കും.

ലോകത്തില്‍ ഉള്ളതില്‍ ഏറ്റവും കുറഞ്ഞ പലിശ തരും. ചിട്ടി തുക മാസമാസം അങ്ങോട്ട് അടയ്ക്കുകയും വേണം. തമ്പാനൂര്‍ ജംഗ്ഷനിലോ തൃപ്പൂണിത്തുറ ജംഗ്ഷനിലോ പ്രോപ്പര്‍ട്ടി കൊടുത്താലോ കെഎസ്എഫ്ഇ അതിന് വില കാണില്ല. അല്ലെങ്കില്‍ കിലോ കണക്കിന് സ്വര്‍ണം കൊടുത്താല്‍ പവന് 24000/ വച്ച് തരും. എന്നായിരുന്നു താരത്തിന്റെ വാക്കുകൾ.