ഡികെ'യുടെ കോട്ട് അഴിച്ചുവെച്ച് 'ഹിറ്റ്ലറി'ല് നിന്ന് പടിയിറങ്ങുന്നു!! മിസിസ് ഹിറ്റ്ലറില് ഷനവാസ് ഷാനുവിന് പകരം വരുന്ന പുതിയ ഡികെ ഇതോ... ഹൈറ്റും വെയിറ്റും ഓകെയാണ് എന്ന് ആരാധകര്!!
മലയാളി പ്രേക്ഷകരുടെ പ്രിയപ്പെട്ട പരമ്പരയാണ് മിസിസ് ഹിറ്റ്ലര്. സീ കേരളം സംപ്രേക്ഷണം ചെയ്യുന്ന പരമ്പര റേറ്റിംഗില് ഒന്നാം സ്ഥാനത്താണ്. ഷാനവാസ്, മേഘ്ന, ആലീസ് ക്രിസ്റ്റി, പൊന്നമ്മ ബാബു എന്നിവരാണ് പ്രധാനവേഷത്തില് എത്തുന്നത്. ഈ അടുത്ത കാലത്ത് ആരംഭിച്ച പരമ്പര വളരെ പെട്ടെന്ന് തന്നെ റേറ്റിംഗില് ഒന്നാം സ്ഥാനത്ത് എത്തുകയായിരുന്നു. ഡികെ എന്ന് കഥാപാത്രത്തെ ഷാനവാസ് അവതരിപ്പിക്കുന്നത്. ജ്യോതിയായിട്ടാണ് മേഘ്ന എത്തുന്നത്.
സംഭവബഹുലമായി സീരിയല് മുന്നോട്ട് പോകവെയാണ് ഷാനവസ് മിസിസ് ഹിറ്റ്ലറില് നിന്ന് പിന്മാറുന്നത്. സോഷ്യല് മീഡിയയിലൂടെ ഒരു കുറിപ്പ് പങ്കുവെച്ച് കൊണ്ടാണ് ഇക്കാര്യം വെളിപ്പെടുത്തിയത്. വേറെ വഴിയില്ലാത്തത് കൊണ്ടാണ് മിസിസ് ഹിറ്റ്ലറില് നിന്നും പിന്മാറുന്നത് എന്നാണ് ഷാനവാസ് പറഞ്ഞത്.
സീരിയലില് നിന്നുള്ള പിന്മാറ്റത്തെ കുറിച്ച് ഷാനവാസ് പറഞ്ഞത് ഇങ്ങനെ... ''ഡികെ'യുടെ കോട്ട് അഴിച്ചുവെച്ച് 'ഹിറ്റ്ലറി'ല് നിന്ന് പടിയിറങ്ങുന്നു . കൊടുത്ത വാക്കിന് വിലകല്പിച്ച് നിലപാടില് ഉറച്ച് നില്ക്കുമ്പോള് നമുക്ക് പ്രിയപ്പെട്ട പലതും നഷ്ടപെട്ടെന്നുവരാം എന്നാലും കൊടുത്ത വാക്ക് പാലിച്ചതിലും നിലപാടില് ഉറച്ച് നിന്നതിലും അഭിമാനത്തോടെ നമുക്ക് തല ഉയര്ത്തി നില്ക്കാം. എന്നില് വിശ്വാസം അര്പ്പിച് 'ഡി കെ' എന്ന കഥാപാത്രത്തെ എന്റെ കയ്യില് ഏല്പ്പിച്ച സീ കേരളം ചാനലിന് 100ല് 101% വിശ്വാസം ഇന്നുവരെ തിരിച്ച് കൊടുക്കാന് പറ്റി എന്ന അഭിമാനത്തോടും ചരിതാര്ഥ്യത്തോടുംകൂടി ഞാന് 'ഹിറ്റ്ലറി'നോട് സലാം പറയുന്നു.
ഇതുവരെ എന്റെ കൂടെ നിന്ന ചാനലിനോടും സഹപ്രവര്ത്തകരോടും ഒരുപാട് സ്നേഹവും നന്ദിയും അറിയിക്കുന്നു. 'ഹിറ്റ്ലറി'ന്റെ പ്രേക്ഷകര് ഇതുവരെ എനിക്ക് ('ഡി കെ') തന്ന സ്നേഹവും സപ്പോര്ട്ടും പുതിയ 'ഡികെ'യ്ക്കും 'മിസിസ് ഹിറ്റ്ലറി'നും കൊടുക്കണം. പുതിയ 'ഡികെ'യ്ക്കും 'മിസിസ് ഹിറ്റ്ലറി'നും എല്ലാവിധ ആശംസകളും നേരുന്നു. ഞങ്ങളെ ഇഷ്ടപ്പെടുന്നവര് നിരന്തരം ആവശ്യപെടുന്ന ആഗ്രഹിക്കുന്ന ഒരു പ്രൊജക്റ്റ്മായി ഞങ്ങള് ഉടന് നിങ്ങളുടെ മുന്നില് വരും. അടുത്ത ആഴ്ച തുടങ്ങുന്ന ഷൂട്ടിന്റെ വിശേഷങ്ങളുമായി ഞങ്ങള് വരും... എന്നായിരുന്നു നടന്റെ വാക്ക്.
സീത പരമ്പരയുടെ രണ്ടാം ഭാഗത്തിന് വേണ്ടിയാണ് ഷാനവാസ് മിസിസ് ഹിറ്റ്ലറില് നിന്ന് പിന്മാറിയത്.വനിതയ്ക്ക് നല്കിയ അഭിമുഖത്തിലായിരുന്നു ഇക്കാര്യം പറഞ്ഞത്.''ഞാനും സ്വാസികയും ഒന്നിച്ച 'സീത'യുടെ രണ്ടാം ഭാഗം വരുന്നു. അതിനു വേണ്ടിയാണ് 'മിസ്റ്റര് ഹിറ്റ്ലറി'ല് നിന്നു പിന്മാറുന്നത്. രണ്ടും ഒന്നിച്ചു കൊണ്ടു പോകണമെന്നായിരുന്നു താല്പര്യം. ആദ്യം അങ്ങനെയായിരുന്നു പ്ലാന്. പിന്നീട് അതിലെ ചില സാങ്കേതിക ബുദ്ധിമുട്ടുകള് ഹിറ്റ്ലറിന്റെ ടീം വ്യക്തമാക്കിയപ്പോള് പിന്മാറാം എന്നു തീരുമാനിക്കുകയായിരുന്നു.സീതയുടെ രണ്ടാം ഭാഗത്തിനു ഞാന് നേരത്തേ വാക്കു കൊടുത്തിരുന്നതാണ്. ഞാന് പിന്മാറിയാല് ചിലപ്പോള് ആ പ്രൊജക്ട് മുടങ്ങും. ഒടുവില് ഡി.കെയെ കൈവിടാന് തീരുമാനിച്ചു. അതിലപ്പുറം മറ്റു യാതൊരു പ്രശ്നങ്ങളുമില്ല''.- എന്നായിരുന്നു ഒരു അഭിമുഖത്തിൽ താരം പറഞത്.
എന്നാൽ, ഷാനവാസിന് പകരം ആര് ഇനി ഡികെ ആയി എത്തും എന്നതാണ് മിസിസ് ഹിറ്റ്ലര് സീരിയലിന്റെ പ്രേക്ഷകരുടെ ആവലാതി. മീശ പിരിച്ച ലുക്കും, ഹൈറ്റും വെയിറ്റും എല്ലാമാണ് ഡികെ എന്ന കഥാപാത്രത്തെ പൂര്ണമാക്കുന്നത്. ഷാനവാസ് തന്നെ ആ കഥാപാത്രം ചെയ്യണം എന്ന നിര്ബന്ധം സംവിധായകന് ഉള്ളത് കൊണ്ട് മാസങ്ങളോളം കാത്തിരുന്ന് ആണ് മിസിസ് ഹിറ്റ്ലര് ആരംഭിച്ചത് പോലും. ഈ സാഹചര്യത്തില് ആര് പകരക്കാരനായി എത്തും എന്ന ചോദ്യം പ്രസക്തമാണ്. പുതിയ ഡികെയെ കുറിച്ചുള്ള ചർച്ചകളാണ് സമൂഹമാധ്യമങ്ങളിൽ നടക്കുന്നത്.
പൂക്കാലം വരവായി, ഭാര്യ, സ്ത്രീപഥം, കാണാകണ്മണി, എന്റെ മാതാവ് തുടങ്ങിയ സീരിയലുകളിലൂടെ ശ്രദ്ധേയനായ അരുണ് ജി രാഘവ് ഡി കെ എന്ന കഥാപാത്രമായി എത്തുന്നു എന്ന തരത്തിലാണ് ഇപ്പോള് വാര്ത്തകള് പുറത്ത് വരുന്നത്. ഡി കെ എന്ന കഥാപാത്രത്തിന് വേണ്ട ഹൈറ്റും വെയിറ്റും എല്ലാം അരുണിന് ഉണ്ട് എന്ന തരത്തിലാണ് ചര്ച്ചകള്.
എന്നാല് ഡി കെ ആയി എത്തുന്ന് അരുണ് ജി രാഘവ് തന്നെയാണന്ന വാര്ത്തയില് ഔദ്യോഗിക സ്ഥിരീകരണം ഇതുവരെ വന്നിട്ടില്ല. വാര്ത്തകളോട് അരുണ് ഇതുവരെ പ്രതികരിച്ചിട്ടുമില്ല. അരുണിന്റെ പ്രതികരണത്തിനായി കാത്തിരിയ്ക്കുകയാണ് ആരാധകരും. എന്നാല് ആരൊക്കെ ഡി കെ ആയി വന്നാലും ഷാനവാസിന് പകരം ആകില്ല എന്നുള്ള അഭിപ്രായവും ശക്തമാണ്.
https://www.facebook.com/Malayalivartha
