സുരേഷ് ഗോപി ജയരാജ് കൂട്ടുകെട്ടിലിറങ്ങിയ സൂപ്പര്‍ഹിറ്റ് ചിത്രം ഹൈവേയ്ക്ക് 27 വര്‍ഷങ്ങള്‍ക്ക് ശേഷം രണ്ടാം ഭാഗം വരുന്നു. ഹൈവേ 2 എന്ന് പേരിട്ടിരിക്കുന്ന ചിത്രം ജയരാജ് തന്നെയാണ് സംവിധാനം ചെയ്യുന്നത്. സുരേഷ് ഗോപിയുടെ 254ാമത് ചിത്രമായി പുറത്തിറക്കാനാണ് അണിയറ പ്രവര്‍ത്തകരുടെ ശ്രമം. ടൈറ്റില്‍ പോസ്റ്ററിനൊപ്പം സുരേഷ് ഗോപിയാണ് സോഷ്യല്‍ മീഡിയയിലൂടെ ചിത്രത്തിന്റെ പ്രഖ്യാപനം നടത്തിയത്. ജൂണ്‍ 26 ന് നടന്റെ പിറന്നാള്‍ ആഘോഷമാക്കാന്‍ ഇരിക്കുന്ന ആരാധകര്‍ക്ക് മധുരമേറുന്ന വാര്‍ത്തയാണ് താരം നല്‍കിയിരിക്കുന്നത്.

ഹൈവെ 1995 ലാണ് പുറത്തിറങ്ങുന്നത്. ചിത്രത്തില്‍ റോ ഓഫീസറായാണ് സുരേഷ് ഗോപി പ്രത്യക്ഷപ്പെട്ടത്. 30 നിരപരാധികളായ കോളേജ് വിദ്യാര്‍ത്ഥികളുടെ മരണത്തിനിടയാക്കിയ ബോംബ് സ്‌ഫോടനം അന്വേഷിക്കുന്നതിനായി റിസര്‍ച്ച് ആന്‍ഡ് അനാലിസിസ് വിംഗ് ഓഫീസറായ ശ്രീധര്‍ പ്രസാദ് വരുന്നതാണ് 1990 ല്‍ ഇറങ്ങിയ ഹൈവെയുടെ കഥാസന്ദര്‍ഭം. അന്വേഷണത്തിന്റെ ഭാഗമായി ഉടുമ്ബന്‍ചോലയിലെ ഒരു പ്ലാന്ററായ മഹേഷ് അരവിന്ദായി ചിത്രത്തില്‍ വേഷം മാറി അന്വേഷിക്കുകയും കേസ് തെളിയിക്കുന്നതുമാണ് ഹൈവെ എന്ന ചിത്രം.

കഥാപാത്രങ്ങളുടെ പേരുകള്‍ കൊണ്ടും വസ്ത്രധാരണകള്‍ കൊണ്ടും സിനിമ വ്യത്യസ്തത പുലര്‍ത്തി. ചിത്രത്തില്‍ ഉപയോഗിച്ചിരിക്കുന്ന വാഹനങ്ങള്‍ അക്കാലത്ത് ഏറെ ശ്രദ്ധിക്കപ്പെട്ടിരുന്നു. സുരേഷ് ഗോപി ഉപയോഗിക്കുന്ന മാല്‍ബ്രോ എന്നെഴുതിയ മഞ്ഞ ജിപ്‌സി വാഹനപ്രേമികളുടെ ആവേശമായിരുന്നു.

പശ്ചാത്തല സംഗീതവും ഗാനങ്ങളും അതുവരെ മലയാള സിനിമയില്‍ കണ്ടിട്ടില്ലാത്ത തരത്തിലുള്ളവയായിരുന്നു. കൗബോയ് സിനിമകളെ അനുസ്മരിക്കുന്ന തരത്തിലുള്ള ചിത്രമായിരുന്നു തൊണ്ണൂറുകളില്‍ തരംഗമായ ഹൈവെ. ഇതിനെല്ലാംമുപരി മലയാള ഭാഷയ്ക്കപ്പുറം അതിര്‍ത്തികള്‍ ഭേദിച്ച് ആന്ധ്രാപ്രദേശിലും തമിഴ്‌നാട്ടിലുമടക്കം ചിത്രം വമ്ബന്‍ വിജയം നേടി. ഈ ചിത്രത്തോട് കൂടി തെലുങ്ക് സിനിമാ പ്രേമികള്‍ക്കിടയില്‍ സൂപ്പര്‍സ്റ്റാറായി മാറി സുരേഷ്‌ഗോപി.