” ആാകശമായവളെ” എന്ന പാട്ട് പാടുന്ന ഒരു കൊച്ച് കുട്ടിയുടെ വീഡിയോ അടുത്തിടെ സമൂഹമാദ്ധ്യമങ്ങളിൽ വൈറലായിരുന്നു. മിലൻ എന്ന വിദ്യാർത്ഥി ക്ലാസ്മുറിയിൽ സഹപാഠികൾക്ക് മുന്നിലാണ് ഈ പാട്ട് പാടിയത്. വെള്ളം എന്ന സിനിമയിൽ ഷഹബാസ് അമൻ ആലപിച്ച ഗാനം ക്ലാസിൽ പാടിയ മിലന്റെ വീഡിയോ എടുത്ത് അദ്ധ്യാപകനാണ് ഫേസ്ബുക്ക് പോസ്റ്റ് ചെയ്ത്.

കുട്ടിയുടെ വീഡിയോ വൈറലായതോടെ കൊച്ചുമിടുക്കന്റെ കഴിവിനെ പ്രശംസിച്ച് നിരവധി പേർ രംഗത്തെത്തി. ഇപ്പോഴിതാ ഈ മിടുക്കന് സിനിമയിലും പാടാൻ അവസരം ലഭിച്ചിരിക്കുകയാണ്. സംവിധായകൻ പ്രജേഷ് സെന്നാണ് തന്റെ അടുത്ത ചിത്രത്തിൽ പാടാൻ മിലന് അവസരം നൽകുമെന്ന് അറിയിച്ചത്.

കൊടകര, മറ്റത്തൂർ ശ്രീകൃഷ്ണ ഹൈസ്‌കൂളിലെ എട്ടാംക്ലാസ് വിദ്യാർത്ഥിയാണ് മിലൻ. കുഞ്ഞു മിലന്റെ പാട്ട് വല്ലാതങ്ങ് കണ്ണു നനയിച്ചുവെന്നാണ് പ്രജേഷ് ഫേസ്ബുക്കിൽ കുറിച്ചത്. പാട്ട് കേട്ടയുടൻ മിലന്റെ അദ്ധ്യാപകനെയും മിലനെയും വിളിച്ചു. സന്തോഷം അറിയിച്ചു.അടുത്ത സിനിമകളിൽ മിലന് പാട്ട് പാടാൻ അവസരം നൽകുമെന്ന് അറിയിച്ചു. അപ്പോൾ മിലന്റെ സന്തോഷത്തിന് അതിരില്ലായിരുന്നുവെന്നും പ്രജേഷ് പറഞ്ഞു

ഫേസ്ബുക്ക് പോസ്റ്റ്

ക്ലാസ് മുറിയിൽ മനോഹരമായി
പാട്ട് പാടുന്ന കുട്ടി കൂട്ടുകാരുടെ വീഡിയോ പലതും കാണാറുണ്ട്.
അത്തരത്തിൽ കണ്ണൂരിൽ നിന്നുള്ള ഒരു വിഡിയോ ശ്രദ്ധയിൽ പെടുത്തിയത് സുഹൃത്തും മാധ്യമ പ്രവർത്തകയുമായ വിനിതയാണ്. അങ്ങനെയാണ് അന്ധതയെ അതിജീവിച്ച അനന്യക്കുട്ടിയെക്കൊണ്ട് വെള്ളത്തിലെ പുലരിയിലച്ഛന്റെ…

എന്ന പാട്ട് പാടിക്കുന്നത്. എല്ലാവരും നെഞ്ചേറ്റിയ ഒരു പാട്ടായിരുന്നു അത്.
കഴിഞ്ഞ ദിവസം അതുപോലെ ക്ലാസ് മുറിയിൽ പാട്ട് പാടുന്ന മിലൻ എന്ന കുട്ടിയുടെ വിഡിയോ അധ്യാപകൻ പ്രവീൺ ഷെയർ ചെയ്തത് ശ്രദ്ധയിൽ പെട്ടു .

ആകാശമായവളേ പാടി പലരും അയച്ചു തരാറുണ്ട് .ഷഹബാസിന്റെ ശബ്ദത്തിന് പകരം വയ്‌ക്കാനാവില്ലെങ്കിലും എല്ലാവരും ആ പാട്ട് മൂളി നടക്കുന്നതിൽ പരം സന്തോഷമെന്താണ്.
നിധീഷിന്റെ വരികളിൽ ബിജിബാൽ ഈണമിട്ട് ആദ്യം പാടി തന്ന ആ നിമിഷത്തിൽ തന്നെ എനിക്കേറ്റവും പ്രിയപ്പെട്ടതായി ആകാശമായവളേ… മാറിയിരുന്നു.

സത്യത്തിൽ കുഞ്ഞു മിലന്റെ പാട്ട് വല്ലാതയങ്ങ് കണ്ണു നനയിച്ചു.
മിലന്റെ അധ്യാപകനെയും മില നെയും വിളിച്ചു. സന്തോഷം അറിയിച്ചു.
അടുത്ത സിനിമകളിൽ മിലന് പാട്ട് പാടാൻ അവസരം നൽകുമെന്ന് അറിയിച്ചു, മിലന്റെ സന്തോഷത്തിന് അതിരില്ലായിരുന്നു.
ഇനിയും പാടട്ടെ ആഹ്ലാദിച്ചു പഠിച്ച് വളരെട്ടെ നമ്മുടെ കുട്ടികൾ…
എല്ലാം നന്നായി വരുമെന്ന് പ്രതീക്ഷിക്കുന്നു.
മിലന് ആശംസകൾ.