മലയാളത്തിന്റെ വരദാനമാണ് മെഗാസ്റ്റാര്‍ മമ്മൂട്ടി. ഇപ്പോഴുള്ള യൂത്തന്മാരായ നടന്മാരേക്കാള്‍ യൂത്തായി ചിന്തിക്കുകയും പെരുമാറുകയും ചെയ്യുന്ന താരം എഴുപതില്‍ എത്തി നില്‍ക്കുകയാണ്. പക്ഷെ ഇപ്പോഴും മമ്മൂട്ടിക്ക് പ്രായമായി എന്നത് സിനിമാപ്രേമികള്‍ വിശ്വസിക്കാന്‍ തയ്യാറായിട്ടില്ല. അദ്ദേഹം ചെയ്ത് വെച്ചിരിക്കുന്നതും ചെയ്തുകൊണ്ടിരിക്കുന്നതുമായ കഥാപാത്രങ്ങള്‍ ഒരു എഴുപതുകാരന്റെതല്ല എന്നതാണ് അതിന് കാരണം.

റോഷാക്കാണ് മമ്മൂട്ടിയുടെ ഏറ്റവും പുതിയ സിനിമ. ചിത്രം ഉടന്‍ പ്രേക്ഷകരിലേക്ക് എത്തും. കെട്ട്യോളാന്റെ മാലാഖ സിനിമയുടെ സംവിധായകനാണ് റോഷാക്കും ഒരുക്കിയിരിക്കുന്നത്. സിനിമയുടെ പ്രമോഷനുമായി ബന്ധപ്പെട്ട് കഴിഞ്ഞ രണ്ട് ദിവസങ്ങളായി തിരക്കിലാണ് മമ്മൂട്ടി. മമ്മൂട്ടിയുടെ റോഷാക്ക് പ്രേക്ഷകര്‍ക്ക് വളരെ പ്രതീക്ഷയുള്ള സിനിമയാണ്.

മലയാളത്തില്‍ സമീപകാലത്ത് ഇറങ്ങിയ ഏറ്റവും കൗതുകമുണര്‍ത്തിയ പ്രൊമോഷണല്‍ മെറ്റീരിയലുകള്‍ ഈ ചിത്രത്തിന്റേതായിരുന്നു. ടൈറ്റില്‍ ലുക്ക് മുതല്‍ പ്രീ റിലീസ് ടീസര്‍ വരെ പ്രേക്ഷകരില്‍ ആ കൗതുകം നിലനിര്‍ത്താന്‍ അണിയറക്കാര്‍ക്ക് സാധിച്ചു. ഡാര്‍ക് ത്രില്ലര്‍ ഗണത്തില്‍പ്പെടുന്ന ചിത്രത്തില്‍ മമ്മൂട്ടി അവതരിപ്പിക്കുന്ന കഥാപാത്രത്തിന്റെ പേര് ലൂക്ക് ആന്റണി എന്നാണ്. ശേഷം നിസാം ബഷീര്‍ ഒരുക്കുന്ന ചിത്രമാണ് റോഷാക്ക്.

ക്ലീന്‍ യു/എ സര്‍ട്ടിഫിക്കറ്റാണ് ചിത്രത്തിന് ലഭിച്ചിരിക്കുന്നത്. മമ്മൂട്ടി കമ്ബനി നിര്‍മ്മിക്കുന്ന ചിത്രത്തിന്റെ ഓവര്‍സീസ് വിതരണം നിര്‍വഹിച്ചിരിക്കുന്നത് ട്രൂത്ത് ഗ്ലോബല്‍ ഫിലിംസാണ്. ദുല്‍ഖര്‍ സല്‍മാന്റെ ഉടമസ്ഥതയിലുള്ള വേഫെറര്‍ ഫിലിംസാണ് ചിത്രം തീയറ്ററുകളില്‍ എത്തിക്കുന്നത്. മമ്മൂട്ടിയെ കൂടാതെ ഷറഫുദ്ദീന്‍, ജഗദീഷ്, ഗ്രേസ് ആന്റണി, ബിന്ദു പണിക്കര്‍, സഞ്ജു ശിവറാം, കോട്ടയം നസീര്‍, ബാബു അന്നൂര്‍, മണി ഷൊര്‍ണ്ണൂര്‍ തുടങ്ങിയവരും ചിത്രത്തില്‍ അഭിനയിക്കുന്നുണ്ട്.