അമ്മ കേരള സ്ട്രൈക്കേഴ്സിനെ മോഹന്ലാല് നയിക്കും
താരങ്ങള് തമ്മിലുള്ള ക്രിക്കറ്റ് പോരാട്ടത്തിന്റെ ആവേശവുമായി ജനുവരി 23ന് ആരംഭിക്കുന്ന ആറാമത് സെലിബ്രിറ്റി ക്രിക്കറ്റ് ലീഗി (സിസിഎല്)നുള്ള അമ്മ കേരള സ്ട്രൈക്കേഴ്സ് ടീമിനെ പ്രഖ്യാപിച്ചു. ആറാം സീസണിലും മോഹന്ലാല് നയിക്കുന്ന ടീമിന്റെ പ്ലേയിങ് ഇലവന് ക്യാപ്റ്റനെ പിന്നീട് തീരുമാനിക്കും. ആസിഫ് അലി, ഉണ്ണി മുകുന്ദന്, നിവിന് പോളി, ബാല, റിയാസ് ഖാന്, രാജീവ്പിള്ള, ബിനീഷ് കോടിയേരി തുടങ്ങിയവര് ഇത്തവണയും സ്ട്രൈക്കേഴ്സിന്റെ ഭാഗമായി കളത്തിലിറങ്ങും. ഇടവേള ബാബു ടീം മാനേജരും ചന്ദ്രസേനന് ടീം അഡൈ്വസറായും പ്രവര്ത്തിക്കും. ഫിറോസ് വി റഷീദാണ് കോച്ച്. ജനുവരി ഒമ്പതിന് സ്ട്രൈക്കേഴ്സിന്റെ പരിശീലനക്യാമ്പ് കലൂര് സ്റ്റേഡിയത്തില് തുടങ്ങുമെന്ന് ടീം ഭാരവാഹികള് വാര്ത്താസമ്മേളനത്തില് അറിയിച്ചു.
ജനുവരി 24ന് രാത്രി ഏഴിന് കഴിഞ്ഞ സീസണിലെ ഫൈനലിസ്റ്റുകളായ ചെന്നൈ റൈനോസുമായി ബംഗളൂരു ചിന്നസ്വാമി സ്റ്റേഡിയത്തിലാണ് കേരളത്തിന്റെ ആദ്യമത്സരം. 31ന് കൊച്ചിയില് നടക്കുന്ന രണ്ടാംമത്സരത്തില് കര്ണാടക ബുള്ഡോസേഴ്സുമായും ഫെബ്രുവരി ഏഴിന് ചെന്നൈയില് കഴിഞ്ഞതവണത്തെ ജേതാക്കളായ തെലുഗു വാരിയേഴ്സുമായും കേരള സ്ട്രൈക്കേഴ്സ് ഏറ്റുമുട്ടും. ഫെബ്രുവരി 13ന് ഹൈദരാബാദ് ഉപ്പല് സ്റ്റേഡിയത്തില് രണ്ട് സെമിഫൈനലുകളും 14ന് ഇതേ വേദിയില് ഫൈനലും അരങ്ങേറും. 23ന് മുംബൈയില് നടക്കുന്ന ഉദ്ഘാടനമത്സരത്തില് മുംബൈ ഹീറോസ് പഞ്ചാബ് ദേ ഷേറിനെ നേരിടും. ശനി, ഞായര് ദിവസങ്ങളിലാണ് എല്ലാമത്സരങ്ങളും. രണ്ട് പൂളിലായി എട്ടുടീമുകളാണ് ടൂര്ണമെന്റില് മാറ്റുരയ്ക്കുന്നത്.
മോഹന്ലാല്, ശ്രീപ്രിയ സേതുപതി, രാജ്കുമാര് സേതുപതി, ജയ്സണ് പുലിക്കോട്ടില് എന്നിവരുടെ ഉടമസ്ഥതയിലുള്ള എംഎസ്എല് സ്ട്രൈക്കേഴ്സ് എന്റര്ടെയ്ന്മെന്റ് ആണ് കേരള ടീമിന്റെ ഉടമകള്. ഹോട്ടല് ക്രൌണ് പ്ലാസയില് നടന്ന വാര്ത്താസമ്മേളനത്തില് രാജ്കുമാര് സേതുപതി, ഇടവേള ബാബു, ആസിഫ് അലി എന്നിവര് പങ്കെടുത്തു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
