നടന്‍ ജയസൂര്യക്കെതിരെ കേസെടുക്കാന്‍ ഉത്തരവ്. കായല്‍ കയ്യേറി വീട് നിര്‍മ്മിച്ച കേസില്‍ നടന്‍ ജയസൂര്യയെ പ്രതിചേര്‍ക്കും. കേസില്‍ എഫ്.ഐ.ആര്‍ രജിസ്റ്റര്‍ ചെയ്യണമെന്ന് മൂവാറ്റുപുഴ വിജിലന്‍സ് കോടതി ഉത്തരവിട്ടു. ഇതു സംബന്ധിച്ച് എറണാകുളം വിജിലന്‍സ് ഡി.വൈ.എസ്.പിക്ക് നിര്‍ദേശം നല്‍കി. കേസില്‍ അഞ്ചാം പ്രതിയാണ് ജയസൂര്യ. കൊച്ചിന്‍ കോര്‍പറേഷന്‍ മുന്‍ സെക്രട്ടറി വി.ആര്‍ രാജുവാണ് ഒന്നാം പ്രതി. മുന്‍ അസി.എക്‌സിക്യൂട്ടീവ് എന്‍ജിനീയര്‍ എന്‍.എം ജോര്‍ജും കേസില്‍ പ്രതിയാകും. ഇവര്‍ക്കെതിരെ പ്രഥമദൃഷ്ട്യ തെളിവുണ്ടെന്ന് ബോധ്യപ്പെട്ടതായും കോടതി വ്യക്തമാക്കി. നിലവിലെ അസി.എക്‌സിക്യുട്ടീവ് എന്‍ജിനീയര്‍ എ.നിസാര്‍, കണയന്നൂര്‍ താലൂക്ക് ഹെഡ് സര്‍വേയര്‍ രാജീവ് ജോസഫ് എന്നിവര്‍ക്കെതിരെ നിലവില്‍ തെളിവു ലഭിച്ചിട്ടില്ലെങ്കിലും അന്വേഷണത്തിനിടെ തെളിവു ലഭിച്ചാല്‍ പ്രതിചേര്‍ക്കാമെന്നും കോടതി അറിയിച്ചു.
ജയസൂര്യ കായല്‍ കയ്യേറ്റം നടത്തിയെന്ന് കണയന്നൂര്‍ താലൂക്ക് സര്‍വേയര്‍ നടത്തിയ പരിശോധനയില്‍ കണ്ടെത്തിയിരുന്നു ബില്‍ഡിംഗ് ഇന്‍സ്‌പെക്ടറും സ്ഥലം സന്ദര്‍ശിച്ച് കായല്‍ കയ്യേറ്റം നടന്നതായി റിപ്പോര്‍ട്ട് നല്‍കി. ഇതേതുടര്‍ന്ന് പതിനാല് ദിവസത്തിനകം സ്വന്തം ചെലവില്‍ കെട്ടിടം പൊളിച്ചുനീക്കാന്‍ 2014 ഫെബ്രുവരി 28ന് നഗരസഭ ഉത്തരവിട്ടിരുന്നു. എന്നാല്‍ ബോട്ടുജെട്ടിയും ചുറ്റുമതിലും പൊളിച്ചുനീക്കാന്‍ ജയസൂര്യ തയ്യാറായില്ല. തുടര്‍ന്നാണ് പരാതിക്കാരന്‍ ഡിസംബര്‍ 19ന് വിജിലന്‍സ് കോടതിയില്‍ ഹര്‍ജി നല്‍കിയത്.
ചിലവന്നൂര്‍ കായല്‍ പുറമ്പോക്ക് കൊച്ചുകടവന്ത്ര ഭാഗത്ത് കയ്യേറി തീരദേശ സംരക്ഷണ നിയമവും മുനിസിപ്പല്‍ കെട്ടിട നിര്‍മ്മാണ ചട്ടവും ലംഘിച്ച് സ്വകാര്യ ബോട്ട്‌ജെട്ടിയും ചുറ്റുമതിലും 3000 ചതുരശ്ര അടി വിസ്തീര്‍ണമുള്ള വീടും നിര്‍മ്മിച്ചുവെന്നാണ് കേസ്. പൊതുപ്രവര്‍ത്തകനായ കളമശേരി സ്വദേശി ഗിരീഷ്‌കുമാറാണ് കോടതിയെ സമീപിച്ചത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha