കൊണ്ടോട്ടിയില്‍ കെഎസ്ആര്‍ടിസി ബസില്‍ വിദ്യാര്‍ഥിനിയോട് ലൈംഗികാതിക്രമം നടത്തിയ കേസിലെ പ്രതി പിടിയില്‍. പ്രതിയുടെ ഫോട്ടോ കേന്ദ്രീകരിച്ച് നടത്തിയ അന്വേഷണത്തിന് ഒടുവിലാണ് ഇയാള്‍ പിടിയിലായത്. വയനാട് പെരുംതട്ട വാരിക്കോട്ട് മീത്തല്‍ വിനീത് കുമാറിനെ(45) ആണ് കോഴിക്കോട് കെഎസ്ആര്‍ടിസി ബസ് സ്റ്റാന്‍ഡില്‍നിന്ന് പുലര്‍ച്ചെ കൊണ്ടോട്ടി പൊലീസ് അറസ്റ്റ് ചെയ്തത്. പ്രതിയെ കൊണ്ടോട്ടി പൊലീസ് സ്‌റ്റേഷനില്‍ എത്തിച്ച് ചോദ്യം ചെയ്ത ശേഷം അറസ്റ്റ് രേഖപ്പെടുത്തി കോടതിയില്‍ ഹാജരാക്കി.

കഴിഞ്ഞ വെള്ളിയാഴ്ച പാലക്കാട് കോഴിക്കോട് സൂപ്പര്‍ ഫാസ്റ്റ് ബസ് കൊണ്ടോട്ടി പൊലീസ് സ്‌റ്റേഷന്‍ പരിധിയില്‍ പോകുമ്പോഴാണ് കേസിന് ആസ്പദമായ സംഭവം ഉണ്ടായത്. സമീപത്തെ സീറ്റിലിരുന്ന പ്രതി ദേഹത്ത് സ്പര്‍ശിക്കുകയും ലൈംഗികാതിക്രമം നടത്തുകയും ആയിരുന്നു എന്ന് വിദ്യാര്‍ഥിനി കൊണ്ടോട്ടി പൊലീസിനു നല്‍കിയ പരാതിയില്‍ പറയുന്നു.

പ്രതി ബുധനാഴ്ച പുലര്‍ച്ചെ കോഴിക്കോട് കെഎസ്ആര്‍ടിസി ബസ് സ്റ്റാന്‍ഡില്‍ എത്തിയെന്ന രഹസ്യ വിവരം ലഭിച്ചതിനെ തുടര്‍ന്ന് കൊണ്ടോട്ടി പൊലീസ് സ്ഥലത്തെത്തി ഇയാളെ കസ്റ്റഡിയില്‍ എടുക്കുകയായിരുന്നു. പ്രതിയെ കണ്ടെത്തുന്നതിനായി പൊലീസ് നേരത്തെ ലുക്കൗട്ട് നോട്ടിസും പുറപ്പെടുവിച്ചിരുന്നു.