കേരള മെഡിക്കല്‍ സര്‍വീസസ് കോര്‍പ്പറേഷന്‍ ലിമിറ്റഡ് 7.32 കോടി രൂപ ചെലവിട്ട് ബ്ലീച്ചിങ് പൗഡര്‍ വാങ്ങിയതില്‍ ക്രമക്കേടുണ്ടെന്ന ആരോപണങ്ങള്‍ വിജിലന്‍സ് അന്വേഷിക്കുമെന്ന് ആരോഗ്യമന്ത്രി കെ.മുരളീധരന്‍. ഇക്കാര്യം ആവശ്യപ്പെട്ട് ആഭ്യന്തര മന്ത്രിക്ക് കത്ത് നല്‍കിയെന്നും കെ.മുരളീധരന്‍ അറിയിച്ചു. ആരോഗ്യവകുപ്പ് പ്രിന്‍സിപ്പല്‍ സെക്രട്ടറി പ്രാഥമിക അന്വേഷണം നടത്തി സമര്‍പ്പിച്ച റിപ്പോര്‍ട്ട് അംഗീകരിക്കാന്‍ കഴിയാത്ത സാഹചര്യമാണെന്നും മന്ത്രി വ്യക്തമാക്കി. ഈ റിപ്പോര്‍ട്ടിലുള്ളതിലും കൂടുതല്‍ തെളിവുകള്‍ മാധ്യമങ്ങളിലൂടെ പുറത്തുവന്ന സാഹചര്യത്തിലാണ് ഗൗരവകരമായ ക്രമക്കേടിനെക്കുറിച്ചുള്ള അന്വേഷണം വിജിലന്‍സിനു കൈമാറാന്‍ തീരുമാനിച്ചത്.

2026 മാര്‍ച്ച് 11നും മേയ് ആറിനും ഇടയില്‍ ബ്ലീച്ചിങ് പൗഡര്‍ വാങ്ങിയതില്‍ 7.32 കോടി രൂപയുടെ അനാവശ്യ ചെലവ് ഉണ്ടായെന്ന വാര്‍ത്തകളുടെ പശ്ചാത്തലത്തിലാണ് ജൂലൈ ഏഴിന് മന്ത്രി കെ.മുരളീധരന്‍ അന്വേഷണത്തിന് ആരോഗ്യവകുപ്പ് പ്രിന്‍സിപ്പല്‍ സെക്രട്ടറിയ്ക്ക് നിര്‍ദേശം നല്‍കിയത്. ലഭിച്ച റിപ്പോര്‍ട്ടിന് വിരുദ്ധമായി സ്‌റ്റോര്‍ പര്‍ച്ചേസ് ചട്ടങ്ങള്‍ ലംഘിച്ച് കെഎംഎസ്‌സിഎല്‍ നടത്തിയ പര്‍ച്ചേസിന് പിന്നില്‍ വ്യാപകമായ ക്രമക്കേടുകളും ഗൂഢാലോചനയും നടന്നുവെന്ന പുതിയ ആരോപണങ്ങള്‍ ഉയര്‍ന്നിരുന്നു. കുറ്റക്കാരെ കണ്ടെത്തി പൊതുപണം ധൂര്‍ത്തടിച്ചവരില്‍നിന്ന് ഈടാക്കുമെന്നും മന്ത്രി കെ.മുരളീധരന്‍ പറഞ്ഞു.