നടി കവിയൂര്‍ പൊന്നമ്മയെ നിരന്തരം ശല്യംചെയ്യുകയും കാര്‍ അടിച്ചു തകര്‍ക്കുകയും ചെയ്ത രണ്ട് പേര്‍ അറസ്റ്റില്‍. കവിയൂര്‍ പൊന്നമ്മയുടെ മുന്‍ ഡ്രൈവറും സുഹൃത്തും ആണ് പിടിയിലായത്. ആലുവ സ്വദേശികളായ മുന്‍ ഡ്രൈവര്‍ ജിതീഷ് (35), ഇയാളുടെ സുഹൃത്ത് രവി (39) എന്നിവരാണ് വഞ്ചിയൂര്‍ പൊലീസിന്റെ പിടിയിലായത്.
തിരുവനന്തപുരത്ത് പുളിമൂട്ടിലുള്ള സ്വകാര്യ ഹോട്ടലില്‍ താമസിക്കാനെത്തിയ കവിയൂര്‍ പൊന്നമ്മയുടെ കാര്‍ ശനിയാഴ്ച ജിതീഷും രവിയും ചേര്‍ന്നു കല്ലുകൊണ്ടിടിച്ച് തകര്‍ത്തിരുന്നു. കാറിന്റെ പെയിന്റും ഇളക്കിക്കളഞ്ഞിരുന്നു. ഇതേത്തുടര്‍ന്ന് കവിയൂര്‍ പൊന്നമ്മ തന്റെ വാഹനം നശിപ്പിച്ചതും നിരന്തരം ശല്യപ്പെടുത്തുന്നുവെന്നതും ചൂണ്ടിക്കാണിച്ച് വഞ്ചിയൂര്‍ പൊലീസ് സ്‌റ്റേഷനില്‍ പരാതി നല്‍കി.
ഇതിന്റെ അടിസ്ഥാനത്തിലാണ് ജിതീഷിനെയും സുഹൃത്തിനെയും കസ്റ്റഡിയിലെടുത്തത്.സാമ്പത്തിക ക്രമക്കേടുകള്‍ നടത്തിയതിനെ തുടര്‍ന്ന് മാസങ്ങള്‍ക്കു മുമ്പ് ജിതീഷിനെ ഡ്രൈവര്‍ ജോലിയില്‍നിന്ന് പിരിച്ചുവിട്ടിരുന്നു. ഇതിന്റെ വൈരാഗ്യത്തിലായിരുന്നു ആക്രമണം. ജിതീഷ് കവിയൂര്‍ പൊന്നമ്മയുടെ ഷൂട്ടിങ് സ്ഥലങ്ങളിലും അവര്‍ താമസിക്കുന്ന ഹോട്ടലുകളിലുമെത്തി ശല്യപ്പെടുത്താറുണ്ടായിരുന്നു. കേസെടുത്തതായും ഇവര്‍ക്ക് ജാമ്യം നല്‍കി വിട്ടയച്ചതായും വഞ്ചിയൂര്‍ പൊലീസ് അറിയിച്ചു.