മലയാളത്തിലെ ബ്രഹ്മാണ്ഡചിത്രം പുലിമുരുകന്റെ നിര്‍മാതാവില്‍ നിന്ന് ഫൈന്‍ ഈടാക്കാന്‍ പ്രൊഡ്യൂസേഴ്‌സ് അസോസിയേഷനിലെ ചിലരുടെ നീക്കം. തുടക്കം മുതലേ പല നിര്‍മാതാക്കള്‍ക്കും മറ്റ് സിനിമാ പ്രവര്‍ത്തകര്‍ക്കും പുലിമുരുകനോട് അസൂയയുണ്ടായിരുന്നു. പത്രപ്പരസ്യങ്ങള്‍ക്ക് നിര്‍മാതാക്കളുടെ സംഘടന നല്‍കുന്ന അളവ് മറികടന്ന്, റിലീസ് ദിവസത്തില്‍ പത്രങ്ങളില്‍ ഫുള്‍പേജ് പരസ്യം നല്‍കിയതിനാണ് ഫൈന്‍ അടപ്പിക്കാന്‍ നീക്കം നടക്കുന്നത്. ചിത്രം ഇത്രയും വല്യഹിറ്റായതിന്റെ അസൂയയാണ് ഇതിന് പിന്നിലെല്ല് പരസ്യമായ രഹസ്യമാണ്. അതേസമയം മോഹന്‍ലാല്‍ ചിത്രത്തിന്റെ നിര്‍മാതാവിനെതിരെ തിരിയാന്‍ പലര്‍ക്കും പേടിയാണ്. 

20 കോടിയിലധികം മുതല്‍മുടക്കുള്ള ചിത്രമാണ് പുലിമുരുകന്‍ എന്ന് അനൗണ്‍സ് ചെയ്തപ്പോഴേ പല സിനിമാക്കാര്‍ക്കും ചൊറിച്ചില്‍ തുടങ്ങിയിരുന്നു. എന്തിനാണ് വൈശാഖിന് വേണ്ടി ഇത്രയും തുക മുടക്കുന്നത്, ചിത്രം ഉപേക്ഷിക്കണമെന്ന് പലരും നിര്‍മാതാവിനെയും ലൈന്‍പ്രൊഡ്യൂസറായ നോബിളിനോടും നിര്‍ദ്ദേശിച്ചിരുന്നു. എന്നാല്‍ അവരിതൊന്നും ശ്രദ്ധിച്ചില്ല. അവര്‍ക്ക് വൈശാഖില്‍ വിശ്വാസമുണ്ടായിരുന്നു. ടോമിച്ചന്‍ മുളക്പാടവും വീണ്ടും ഒന്നിച്ചാല്‍ ഒരു വമ്പന്‍ ഹിറ്റുണ്ടാകുമെന്ന് ഒരു ജ്യോല്‍സ്യന്‍ വൈശാഖിനോട് പറഞ്ഞിരുന്നു. അത് വലിയ ആശ്വാസമായിരുന്നു. ടോമിച്ചന്‍ മുളക് പാടം കഥ പോലും കേള്‍ക്കാതെയാണ് ഇത്രയും തുക മുടക്കിയത്. 

അതേസമയം ചെറിയ ചിത്രങ്ങള്‍ക്കും അതിന്റെ നിര്‍മാതാക്കള്‍ക്കും എതിരേ മാത്രമാണ് സംഘടന നടപടി എടുക്കൂ എന്ന് വ്യാപക ആക്ഷേപമുണ്ട്. അത് ഏറെക്കുറേ ശരിയുമാണ്. അസേസിയേഷന്‍ ഭാരവാഹികളുടെ കാലാവധി കഴിഞ്ഞിട്ടും തെരഞ്ഞെടുപ്പ് നടത്താതെ നിര്‍മാതാക്കളായ സുരേഷ് കുമാറും രജപുത്ര രഞ്ജിത്തും ഒളിച്ചുകളി നടത്തുകയാണെന്ന് വിനയന്‍ അടക്കമുള്ള നിര്‍മാതാക്കള്‍ പറയുന്നു. തങ്ങളുടെ ഇഷ്ടക്കാരെ മാത്രം സംരക്ഷിക്കുന്ന നിലപാടാണ് ഇരുവരും സ്വീകരിക്കുന്നതെന്നും വിനയന്‍ ആരോപിച്ചു.