പുലിമുരുകന്‍ സൂപ്പര്‍ഹിറ്റായി ഓടുമ്പോള്‍ പലരും ചോദിക്കുന്ന ചോദ്യമുണ്ട്, ഫൈറ്റ് സീനുകളില്‍ മോഹന്‍ലാലിന്റെ ഡ്യൂപ്പ് ആര്? ഏതൊക്കെ രംഗങ്ങളിലാണ് ഡ്യൂപ്പ് ഉപയോഗിച്ചത്? തുടങ്ങിയ നൂറ് ചോദ്യങ്ങളാണ് പലരും ഉപയോഗിക്കുന്നത്. എന്നാല്‍ ഡ്യൂപ്പിനെ ഉപയോഗിക്കേണ്ട എന്നാണ് ആദ്യമേ മോഹന്‍ലാല്‍ സംഘട്ടന സംവിധായകന്‍ പീറ്റര്‍ഹെയ്‌നോട് പറഞ്ഞത്. അത് അദ്ദേഹത്തെ ഞെട്ടിച്ചു. കാരണം തമിഴിലും തെലുങ്കിലും ഉള്ള ഹീറോകള്‍ സംഘട്ടനരംഗങ്ങളില്‍ ഡ്യൂപ്പിനെ ഉപയോഗിക്കാറുണ്ട്. എന്നാലും ഷൂട്ടിംഗിന് മുമ്പ് ഒരാഴ്ചത്തെ ക്യാമ്പ് പീറ്റര്‍ നടത്താന്‍ തീരുമാനിച്ചു. തമിഴിലും തെലുങ്കിലും ഒക്കെ അങ്ങനെയാണ്.
എന്നാല്‍ പരിശീലന ക്യാമ്പിന്റെ ആദ്യദിവസം പീറ്ററിന് തൃപ്തിയായി. പീറ്റര്‍ കാണിക്കുന്ന നമ്പരുകള്‍ മോഹന്‍ലാല്‍ തന്‍മയിത്വത്തോടെ ചെയ്തു. അതോടെ അന്ന് തന്നെ ക്യാമ്പിന് കര്‍ട്ടനിട്ടു. പിന്നീട് ഷൂട്ട് സമയത്ത് എല്ലാ മുന്‍കരുതലുകളും എടുത്താണ് ആക്ഷന്‍ സീക്വന്‍സ് എടുത്തത്. മോഹന്‍ലാലിന്റെ കൈകളുടെയും കാലുകളുടെയും ടൈറ്റ് ഷോട്ടുകള്‍, ലോംഗ് ഷോട്ടുകള്‍ എന്നിവയില്‍ മാത്രമാണ് ഡ്യൂപ്പിനെ ഉപയോഗിച്ചത്. ആ ഡ്യൂപ്പാകട്ടെ സംവിധായകന്‍ വൈശാഖ് ആയിരുന്നു. ബാക്കിയെല്ലാം താന്‍ തന്നെ ചെയ്യണമെന്ന് മോഹന്‍ലാലിന് നിര്‍ബന്ധമായിരുന്നു. സംസ്ഥാന ഗുസ്തി ചാമ്പ്യനായിരുന്ന മോഹന്‍ലാലിന് ഇതൊക്കെ പെട്ടെന്ന് വഴങ്ങുമെന്ന് നടന്‍ മണിയന്‍പിള്ള രാജു പറഞ്ഞു.
മുമ്പ് സംഘട്ടനരംഗങ്ങളില്‍ ഗ്ലാസുകള്‍ പൊട്ടിച്ച് വീഴുന്നത് മോഹന്‍ലാല്‍ തന്നെയാണ് അഭിനയിച്ചിരുന്നത്. ഓടിവന്ന് ഗ്ലാസില്‍ ശരീരം കൊണ്ട് ഇടിക്കുന്നതിനൊപ്പം കയ്യില്‍ കരുതിയിരിക്കുന്ന കല്ല് കൊണ്ട് ഇടിച്ചാണ് പൊട്ടിക്കുന്നത്. ഒരിക്കല്‍ ഇത് കണ്ട് സ്റ്റണ്ട്മാസ്റ്റര്‍ ത്യാഗരാജന്‍മാസ്റ്റര്‍ വിലക്കി. ഒരിക്കലും ഇത് ചെയ്യരുതെന്ന് പറഞ്ഞു. അതോടെ ആ പരിപാടി മോഹന്‍ലാല്‍ ഉപേക്ഷിച്ചു. കാസനോവയുടെ ലൊക്കേഷനില്‍ വച്ച് ബൈക്കില്‍ നിന്ന് വീണ് മോഹന്‍ലാലിന് പരിക്കേറ്റിരുന്നു. അതോടെ അത്തരം അഭ്യാസപ്രകടനങ്ങള്‍ നടത്തരുതെന്ന് പലരും ഉപദേശിച്ചിരുന്നു.