എന്തായാലും ദുല്‍ഖര്‍ സല്‍മാന്‍ അമല്‍ നീരദ് ചിത്രം ഉപേക്ഷിച്ചിട്ടില്ല. ചിത്രത്തിന്റെ മൂന്നാം ഘട്ട ഷെഡ്യൂള്‍ ലാറ്റിന്‍ അമേരിക്കയില്‍ ആരംഭിയ്ക്കാന്‍ പോകുകയാണ്. മെക്‌സിക്കോയിലുള്ള രണ്ടാം ഘട്ട ഷെഡ്യൂള്‍ പൂര്‍ത്തിയാക്കി കഴിഞ്ഞു.

ഈ ക്രിസ്മസിന് ചിത്രം റിലീസ് ചെയ്യാനായിരുന്നു നേരത്തെ പദ്ധതിയിട്ടിരുന്നത്. പുതിയ റിപ്പോര്‍ട്ടുകള്‍ പ്രകാരം മാര്‍ച്ച് 23 ന് ചിത്രം റിലീസ് ചെയ്യുമെന്നാണ് അറിയുന്നത്.

ചില സാങ്കേതിക തടസ്സങ്ങളാല്‍ ചിത്രത്തിന്റെ ഷൂട്ടിങ് മുടങ്ങിപ്പോകുകയായിരുന്നു. ആദ്യ ഘട്ട ഷൂട്ടിങ് കൊച്ചിയില്‍ വിജയകരമായി പൂര്‍ത്തിയാക്കി, രണ്ടാം ഘട്ട ഷൂട്ടിങിനായി വിദേശത്ത് പോകുന്നതിന് വിസ തടസ്സമുണ്ടായി. അതാണ് ഷൂട്ടിങ് തടസ്സപ്പെടാന്‍ കാരണം.

രാഷ്ട്രീയവും പ്രണയവുമൊക്കെയാണ് ഇനിയും പേരിട്ടിട്ടില്ലാത്ത ഈ ചിത്രത്തിന്റെ കഥാപശ്ചാത്തലം എന്നാണ് വിവരം. നവാഗതയായ കാര്‍ത്തിക മുരളീധരനാണ് ചിത്രത്തിലെ നായിക.

അജി മാത്യു എന്ന കഥാപാത്രത്തെയാണ് ദുല്‍ഖര്‍ ചിത്രത്തില്‍ അവതരിപ്പിയ്ക്കുന്നത്. സൗബിന്‍ ഷഹീര്‍ ചിത്രത്തില്‍ ഒരു പ്രധാന കഥാപാത്രത്തെ അവതരിപ്പിയ്ക്കുന്നു.

അമല്‍ നീരദും അന്‍വര്‍ റഷീദും ചേര്‍ന്ന് നിര്‍മിയ്ക്കുന്ന ചിത്രത്തിന് വേണ്ടി സംഗീതമൊരുക്കുന്നത് ഗോപി സുന്ദറാണ്. നവാഗതനായ റാണാദീവാണ് ഛായാഗ്രഹണം.