രാജാവിന്റെ മകനില്‍ മോഹന്‍ലാലിന്റെ കഥാപാത്രമായ വിന്‍സന്റ് ഗോമസ് ഉപയോഗിച്ച ഫോണ്‍ നമ്പര്‍ അദ്ദേഹം അടുത്തിടെ വാങ്ങിയ കാറിന്റെ നമ്പരായി. വലിയ വില നല്‍കി ലേലത്തിലാണ് ഈ നമ്പര്‍ കാറിനായി സംഘടിപ്പിച്ചത്. രാജാവിന്റെ മകന്‍ എന്ന് കേള്‍ക്കുമ്പോള്‍ തന്നെ ഏവരുടേയും മനസ്സില്‍ ഓടിയെത്തുന്ന ഒരു ഡയലോഗുണ്ട് 'മൈ ഫോണ്‍ നമ്പര്‍ ഈസ് 2255'.

വിന്‍സന്റ് ഗോമസ് നാന്‍സി എന്ന കഥാപാത്രത്തോട് പറയുന്ന ഡയലോഗാണിത്. എന്നാല്‍ ചിത്രം ഇറങ്ങി മുപ്പത് വര്‍ഷങ്ങള്‍ക്ക് ശേഷം വീണ്ടും ആ നമ്പര്‍ വാര്‍ത്തയാകുന്നത്. രണ്ടു മാസം മുമ്പ് മോഹന്‍ലാല്‍ സ്വന്തമാക്കിയ ലാന്‍ഡ് ക്രൂസറിന്റെ നമ്പര്‍ KL-07-CJ-2255 എന്നാണ്.

ആന്റണി പെരുമ്പാവൂരിന്റെ പേരില്‍ രജിസ്റ്റര്‍ ചെയ്തിരിക്കുന്ന ലാന്‍ഡ് ക്രൂസറിന്റെ വില ഒരു കോടി 36 ലക്ഷമാണ്. ഏഴ് കോടി മുടക്കിയാണ് മോഹന്‍ലാല്‍ കുറേനാള്‍ മുമ്പ് കാരവന്‍ സ്വന്തമാക്കിയത്. ഈ കാരവന്‍ കോയമ്പത്തൂരില്‍ പ്രത്യേകം പറഞ്ഞ് നിര്‍മിച്ചതായിരുന്നു. മോഹന്‍ലാലിന് വാഹനങ്ങളോട് വലിയ കമ്പമൊന്നുമില്ല. എന്നാലും ബി.എം.ഡബല്‍യൂ അടക്കമുള്ള പുതിയ വാഹനങ്ങള്‍ താരത്തിന്റെ ഭാര്യയുടെ ഇഷ്ടപ്രകാരം വാങ്ങിയിട്ടുണ്ട്.

ഓട്ടോയില്‍ വരെ സഞ്ചരിക്കുന്നത് മോഹന്‍ലാലിന് ഇഷ്ടമാണ്. ഗുരു എന്ന സിനിമയുടെ ലൊക്കേഷന്‍ സേലത്തായിരുന്നു. അവിടെ നിന്ന് 30 കിലോമീറ്റര്‍ ദൂരത്തേക്ക് തിരക്കഥാകൃത്ത് രാമചന്ദ്രബാബു ഓട്ടോയിലാണ് പോകാനൊരുങ്ങിയത്. ആ ഓട്ടോയില്‍ മോഹന്‍ലാലും ചാടിക്കയറി. നമുക്ക് പാര്‍ക്കാം മുന്തിരിത്തോപ്പുകളുടെ ചിത്രീകരണം നടക്കുമ്പോള്‍ ക്യാമറാമാന്‍ വേണുവും മോഹന്‍ലാലും രാത്രി കാലങ്ങളില്‍ മൈസൂര്‍ നഗരത്തിലൂടെ കുതിരസവാരി നടത്തിയിരുന്നു.