സിനിമാ സമരം നടി കീര്ത്തി സുരേഷിന് വേണ്ടി : ലിബര്ട്ടി ബഷീര്
തീയറ്റര് ഉടമകള് തുടങ്ങിവച്ച സമരം സിനിമ മേഖലയില് കനത്ത പ്രതിസന്ധി സൃഷ്ടിച്ച് മുന്നോട്ടു പോകുകയാണ്. തീയറ്റര് ഉടമകളുടെ ആവശ്യം അംഗീകരിക്കാനാകില്ല എന്ന കടുത്ത നിലപാടില് തന്നെയാണ് നിര്മാതാക്കളുടെയും വിതരണക്കാരുടേയും സംഘടന. അതേസമയം പ്രൊഡ്യൂസേഴ്സ് അസോസിയേഷന് പ്രസിഡന്റ് സുരേഷ് കുമാറിന്റെ മകള് നായികയായ തമിഴ് ചിത്രത്തെ സഹായിക്കാനാണ് സമരം തുടരാന് അദ്ദേഹം താല്പ്പര്യം കാട്ടുന്നതെന്ന് എക്സിബിറ്റേഴ്സ് ഫെഡറേഷന് പ്രസിഡന്റ് ലിബര്ട്ടി ബഷീര്.
ജനുവരിയില് റിലീസ് ചെയ്യുന്ന വിജയ് ചിത്രം ഭൈരവയില് സുരേഷ്കുമാറിന്റെ മകള് കീര്ത്തി സുരേഷാണ് നായിക. സിനിമ സമരം തീര്ന്നാല് ഭൈരവ എന്ന ചിത്രത്തിന് 75 തീയറ്ററുകള് മാത്രമേ റിലീസിന് ലഭിക്കൂ. സമരം മുന്നോട്ടുകൊണ്ടുപോയാല് ഭൈരവ 225 തീയറ്ററുകളില് റിലീസ് ചെയ്യാന് കഴിയുമെന്നും അതിന്റെ ഗുണം മകള്ക്ക് ലഭിക്കുമെന്ന് ചിന്തയോടെയാണ് സുരേഷ്കുമാര് പ്രവര്ത്തിക്കുന്നതെന്നും ലിബര്ട്ടി ബഷീര് ആരോപിച്ചു. സ്വന്തം താത്പര്യത്തിന് വേണ്ടി സുരേഷ്കുമാര് സംഘടനയെ വഞ്ചിക്കുകയാണെന്നും അദ്ദേഹം പറഞ്ഞു.
നിര്മാതാക്കളുടെയും വിതരണക്കാരുടെയും സംഘടനയില് പെട്ട പലരും ചിത്രം റിലീസ് ചെയ്യാന് തയാറായി നില്ക്കുകയാണ്. തങ്ങളുമായി സഹകരിക്കുന്നവരുടെ ചിത്രങ്ങള് പ്രദര്ശിപ്പിക്കുമെന്നും ലിബര്ട്ടി ബഷീര് പറഞ്ഞു.
https://www.facebook.com/Malayalivartha
