മലയാളകളുടെ പ്രിയപ്പെട്ട നടി മഞ്ജു വാര്യരുടെ തിരിച്ചുവരവിനെ ആവേശത്തോടെയാണ് മലയാള സിനിമ സ്വീകരിച്ചത്. സിനിമയില്‍ സജീവമല്ലാതിരുന്നിട്ടും മലയാളികള്‍ക്ക് മഞ്ജുവിനോടുള്ള ഇഷ്ടം തെല്ലും കുറഞ്ഞട്ടില്ല. പലവിധത്തില്‍ മഞ്ജു വാര്‍ത്തകളില്‍ നിറഞ്ഞുതന്നെ നില്‍ക്കുന്നു. അനുകൂലവും പ്രതികൂലവുമായ ഈ വാര്‍ത്തകളോടൊന്നും പ്രതികരിക്കാന്‍ പക്ഷേ, മഞ്ജു ഒരുക്കമല്ല. ഇതിനൊക്കെ വേണ്ടി എന്തിന് വെറുതെ സമയം കളയുന്നു എന്നാണ് മഞ്ജു ചോദിക്കുന്നത്.

ഗൃഹലക്ഷ്മിക്ക് നല്‍കിയ അഭിമുഖത്തിലാണ് മഞ്ജു മനസ്സു തുറന്നത്. താന്‍ എന്ത് കൊണ്ട് ജീവകാരുണ്യ പ്രവര്‍ത്തനങ്ങളില്‍ സജീവമാവുന്നുവെന്നും മഞ്ജു പറയുന്നുണ്ട്. സ്വന്തം ജീവിതം തന്നെയാണ് മറ്റുള്ളവരുടെ മനസ്സറിയാന്‍ തന്നെ പ്രാപ്തയാക്കിയതെന്ന് മഞ്ജു അഭിമുഖത്തില്‍ പറയുന്നു.

'ഞാന്‍ പരിചയപ്പെട്ട പല കുട്ടികളും അനുഭവിക്കുന്ന ദു:ഖം കാണുമ്പോള്‍ നമ്മുടെ ജീവിതമൊക്കെ എത്ര സിസ്സാരമാണെന്ന് തോന്നിയിട്ടുണ്ട്. എന്റെ കുട്ടിക്കാലത്ത് എനിക്കിത്രയും ബുദ്ധിമുട്ടുകള്‍ ഉണ്ടായിട്ടില്ല. ഒരുപക്ഷെ അച്ഛനും അമ്മയും എന്നെ അറിയിക്കാഞ്ഞിട്ടാവും. അച്ഛന്‍ ചിട്ടി പിടിച്ചും കടം വാങ്ങിയുമൊക്കെയാണ് എന്നെ നൃത്തം പഠിപ്പിച്ചത്.

എനിക്കുവേണ്ടി ഒരുപാട് പിശുക്കി ജീവിച്ചു അച്ഛന്‍. അമ്മയുടെ സ്വര്‍ണമൊക്കെ പണയത്തിലായിരുന്നു. കുറെക്കഴിഞ്ഞാണ് എനിക്കിതൊക്കെ മനസ്സിലായത്. ഈ അടുത്ത കാലത്താണ് അച്ഛനും അമ്മയും ഒരു മോതിരമെങ്കിലും ഇട്ടു ഞാന്‍ കാണുന്നത്. പിന്നെ ഒരു വാടക വീടാണെങ്കിലും ഞങ്ങള്‍ക്ക് കയറിക്കിടക്കാന്‍ ഒരിടമുണ്ടായിരുന്നു.'മഞ്ജു പറഞ്ഞു.


തന്നെക്കുറിച്ച് കുറച്ചുകാലമായി ചില ഓണ്‍ലൈന്‍ മാധ്യമങ്ങളില്‍ പ്രചരിക്കുന്ന വാര്‍ത്തകളെക്കുറിച്ചും മഞ്ജു തുറന്നുപറയന്നുണ്ട്. മഞ്ജു ആത്മഹത്യ ചെയ്യാനൊരുങ്ങി, അടുത്ത വര്‍ഷം വിവാഹിതയാകാന്‍ പോകുന്നു എന്നിവയൊക്കെയായിരുന്നു അതില്‍ ഭൂരിഭാഗവും. പലതും പ്രതികരിക്കാന്‍ പോലും അര്‍ഹതയില്ലാത്ത വാര്‍ത്തകളാണ്. അതുകൊണ്ടാണ് ഞാന്‍ മിണ്ടാതിരിക്കുന്നത്. നമ്മള്‍ എന്തിന് അനാവശ്യമായി സമയം പാഴാക്കണം?മഞ്ജു പറയുന്നു.