ശരീരം തളര്‍ന്ന കാടാമ്പുഴയിലെ കൊണ്ടംകൊടുവത്ത് അരവിന്ദാക്ഷന്‍ എന്ന ബാബുബിന് നടി മഞ്ജു വാരിയരെ നേരില്‍ കാണണമെന്നത് ഏറെക്കാലത്തെ ആഗ്രഹമായിരുന്നു. മഞ്ജു വാരിയരുടെ സിനിമകള്‍ ബാബു കണ്ടിട്ടുണ്ട്. അന്നു തുടങ്ങിയതാണ് നടിയെ ഒരുദിവസം നേരില്‍ കാണണമെന്ന ആഗ്രഹം.

കഴിഞ്ഞദിവസം ആഗ്രഹം നിറവേറിയതിന്റെ സന്തോഷത്തിലാണു ബാബു. കാടാമ്പുഴ ഭഗവതിക്ഷേത്രത്തിലെ ഋഗ്വേദ ലക്ഷാര്‍ച്ചനയുടെ ഭാഗമായി കുച്ചിപ്പുഡി അവതരിപ്പിക്കാനെത്തിയ മഞ്ജു വാരിയരെ ബാബു കാണാനെത്തിയത് സുഹൃത്തിന്റെ കൂടെയായിരുന്നു. ബാബുവിന്റെ കവിതാ സമാഹാരമായ 'രുധിരതാരകം' മഞ്ജു വാരിയര്‍ക്ക് സമ്മാനമായി നല്‍കി. ബാബു കെട്ടിടനിര്‍മാണ ജോലിക്കാരനായിരുന്നു. വീണു പരുക്കേറ്റ് കിടപ്പിലായിട്ട് 16 വര്‍ഷമായി.

പരസഹായത്തോടെയാണു ജീവിതം. ടിവി കണ്ടും പുസ്തകങ്ങള്‍ വായിച്ചും സമയം ചെലവഴിക്കുന്നതിനിടെ മനസ്സില്‍ കോറിയിട്ട അക്ഷരക്കൂട്ടുകള്‍ കവിതകളായി രൂപപ്പെടുകയായിരുന്നു. ബാബുവിന് എഴുതാന്‍ കഴിയില്ലെങ്കിലും വീടിനടുത്തുള്ള ശ്രീഷ്ണയാണു സഹായി. കവിതാ സമാഹാരത്തിന്റെ രണ്ടാം പതിപ്പ് പുറത്തിറങ്ങി. മന്ത്രി കെ.ടി.ജലീലിനെ കണ്ട് സര്‍ക്കാരില്‍നിന്നു സഹായം ലഭിക്കാന്‍ ബാബു നിവേദനം നല്‍കി.