നടനാകാന് യോഗ്യതയൊന്നും വേണ്ട; ശ്രീനിവാസന്
സംസ്ഥാന സ്കൂള് കലോത്സവത്തിന്റെ ഭാഗമായി സംഘടിപ്പിച്ച സംസ്കാരികോത്സവ വേദിയിലെത്തിയ മലയാളിയെ ചിരിക്കുകയും ചിന്തിപ്പിക്കുകയും ചെയ്ത നടനും തിരക്കഥാകൃത്തും സംവിധായകനുമായ നടന് ശ്രീനിവാസനോട് ചോദ്യവുമായി ഒരു മിടുമിടുക്കന് എഴുന്നേറ്റു. 'നടനാവാന് വേണ്ട യോഗ്യതയെന്താ?'
ഉദയനാണ് താരത്തിലെ സൂപ്പര് സ്റ്റാര് സരോജ് കുമാറിനെപ്പോലെ ഉടന് വന്നു ഉരുളയ്ക്ക് ഉപ്പേരി പോലെ മറുപടി. 'എന്നെ കണ്ടപ്പോള് മനസ്സിലായില്ലേ യോഗ്യതയൊന്നും വേണ്ടെന്ന്.' പിന്നെ ഗൗരവത്തില് പറഞ്ഞു: 'നടനു വേണ്ടത് അഭിനയം തന്നെയാണ്.' അതിനുശേഷം അഭിനയത്തെക്കുറിച്ചും സിനിമയെകുറിച്ചും ചിന്താവിഷ്ടയായ ശ്യാമളയിലെ വിജയനെപ്പോലെ ഗൗരവത്തില് ചില കാര്യങ്ങള്.
പുതിയ നടന്മാര് വന്ന് ജനങ്ങളുടെ മനസ്സു കീഴടക്കുമ്പോഴാണ് താരങ്ങളാകുന്നത്. ജീവിത സന്ദര്ഭങ്ങളില് പെരുമാറുന്നത് ക്യാമറയ്ക്കു മുന്നില് പ്രകടിപ്പിക്കുന്നതാണ് അഭിനയം. അല്ലാതെ താരമാവാമെന്നു കരുതി മുന്കൂട്ടി ആസൂത്രണം ചെയ്തു വരുന്നതല്ല.
കൂടുതല് പേര് കാണുന്ന സിനിമയെടുക്കാന് കഴിയുന്നത് കൂടുതല് പേരുടെ മനസ്സ് കാണാന് കഴിയുന്നവര്ക്കാണെന്ന് ശ്രീനിവാസന് പറഞ്ഞു. തിയേറ്ററില് ആള് കൂടിയാല് ആ സിനിമയ്ക്ക് എന്തോ പ്രശ്നമുണ്ടെന്നു ചിന്തിക്കുന്ന സംവിധായകരെയും തനിക്ക് അറിയാമെന്ന് ശ്രീനിവാസന് കൂട്ടിച്ചേര്ത്തു.
https://www.facebook.com/Malayalivartha
