ബോളീവുഡ് താരവും മുന്‍ നീലച്ചിത്ര നായികയുമായ സണ്ണി ലിയോണ്‍ ഒരു ഐറ്റം ഡാന്‍സിനായി മലയാള സിനിമയില്‍ എത്തുന്നു. ബി.ഉണ്ണികൃഷ്ണന്‍ മോഹന്‍ലാല്‍ ടീമിന്റെ ഏറ്റവും പുതിയ ചിത്രമായ വില്ലനിലെ പതിനഞ്ച് മിനിറ്റ് നീണ്ടു നില്‍ക്കുന്ന ഐറ്റം ഡാന്‍സിനായാണ് സണ്ണി ലിയോണ്‍ മലയാളത്തിലേയ്ക്കു എത്തുന്നത്. വനിതാ ഫിലിം അവാര്‍ഡിനായി കഴിഞ്ഞ വര്‍ഷം കേരളത്തില്‍ എത്തിയപ്പോഴാണ് ബി. ഉണ്ണികൃഷ്ണന്‍ സണ്ണി ലിയോണുമായി ആദ്യ ഘട്ട ചര്‍ച്ച നടത്തിയിരുന്നത്. ഇതേ തുടര്‍ന്നാണ് വില്ലനിലെ ഐറ്റം ഡാന്‍സിനു വേണ്ടി സണ്ണി ലിയോണ്‍ സന്നദ്ധത അറിയിച്ചത്. അഞ്ചു കോടി രൂപ പ്രതിഫലത്തിനൊപ്പം, വിമാന ചാര്‍ജും, ഹോട്ടല്‍ റെന്റും നിര്‍മാതാവ് വഹിക്കണമെന്നാണ് ഇപ്പോഴുണ്ടായിരിക്കുന്ന ധാരണ.

അധോലോകത്തിന്റെ കഥ പറയുന്ന ചിത്രത്തില്‍ അധോലോക സംഘങ്ങളുമായി ബന്ധമുള്ള ഹോളിവുഡ് ഐറ്റം ഡാന്‍സറായി തന്നെയാണ് സണ്ണി ലിയോണ്‍ എത്തുന്നതെന്നാണ് പ്രാഥമിക സൂചന ലഭിക്കുന്നത്. ചിത്രത്തിലെ കഥ വികസിക്കുന്നതില്‍ ഈ ഐറ്റം ഡാന്‍സിനു നിര്‍ണായക സ്വാധീനമുണ്ടെന്നാണ് സൂചന. സണ്ണി ലിയോണിന്റെ ശരീര സൗന്ദര്യം നന്നായി ഉപയോഗിക്കാന്‍ സാധിക്കുന്ന രീതിയിലാണ് ഡാന്‍സിന്റെ ചിത്രീകരണം നടത്താനൊരുങ്ങുന്നതെന്നാണ് സൂചന. 

ചിത്രത്തിന്റെ അണിയറ പ്രവര്‍ത്തകര്‍ കഴിഞ്ഞ ദിവസം സണ്ണി ലിയോണുമായുള്ള ആദ്യഘട്ട ചര്‍ച്ച പൂര്‍ത്തിയാക്കിയിട്ടുണ്ട്. എന്നാല്‍, അന്തിമ ഉറപ്പ് ഇനിയും ലഭിച്ചിട്ടില്ലെന്നാണ് സൂചന. ചിത്രത്തിന്റെ അവസാന ഷെഡ്യൂളില്‍ സണ്ണിയുടെ പാട്ടും ഉള്‍പ്പെടുത്താനാണ് ധാരണയുണ്ടായിരിക്കുന്നത്. സണ്ണി ലിയോണിന്റെ ഡേറ്റ് നോക്കിയ ശേഷം ആവശ്യമെങ്കില്‍ മുംബെയില്‍ വച്ചും പാട്ട് ചിത്രീകരിക്കുന്നതിനാണ് അണിയറ പ്രവര്‍ത്തകര്‍ ഒരുങ്ങുന്നത്.