ഗുണ്ടാ ആക്രമണത്തില് സിനിമാ നിര്മാതാവിനു പരുക്ക്; സംഭവം കൊച്ചിയില്
പ്രമുഖ നടിയെ തട്ടിക്കൊണ്ടു പോയി ആക്രമിച്ചതിന്റെ ഞെട്ടല് മാറും മുമ്പ് കൊച്ചിയില് വീണ്ടും ഗുണ്ടാവിളയാട്ടം. ഇത്തവണ ഗുണ്ടാ ആക്രമണത്തിനു സമാനമായി മദ്യലഹരിയില് കൊച്ചിയിലെ ഹോട്ടലില് അഴിഞ്ഞാടിയ യുവാക്കളുടെ ആക്രമണത്തില് ചലച്ചിത്ര നിര്മാതാവിനും പ്രൊഡക്ഷന് കണ്ട്രോളര്ക്കും ഹോട്ടലിലെ സെക്യൂരിറ്റി ജീവനക്കാരനും പരുക്ക്. പതിനഞ്ചോളം വരുന്ന യുവാക്കളുടെ ആക്രമണത്തില് നിര്മാതാവ് മഹാ സുബൈര്, പ്രൊഡക്ഷന് കണ്ട്രോളര് ബാദുഷ, തമ്മനം ഇടശ്ശേരി മാന്ഷന് ഹോട്ടലിലെ സെക്യൂരിറ്റി ജീവനക്കാരന് കൊല്ലം സ്വദേശി പ്രകാശ് എന്നിവര്ക്കാണു പരുക്കേറ്റത്.
തലയ്ക്കും വലതു ചെവിയ്ക്കും പരുക്കേറ്റ സുബൈറിനെയും തലയ്ക്കു മാരകമായി ക്ഷതമേറ്റ പ്രകാശിനെയും മെഡിക്കല് ട്രസ്റ്റ് ആശുപത്രിയില് പ്രവേശിപ്പിച്ചു. രാത്രി പത്തോടെയാണു സംഭവം. വിവരമറിഞ്ഞ് നടന് ജയറാം ഉള്പ്പെടെയുള്ളവര് ആശുപത്രിയിലെത്തി. അസിസ്റ്റന്റ് കമ്മിഷണറുടെ നേതൃത്വത്തിലുള്ള പൊലീസ് സംഘവും സ്ഥലത്തെത്തി.
ഹോട്ടലിലെ ബീയര് പാര്ലറിലിരുന്നു മദ്യപിക്കുകയായിരുന്ന യുവാക്കള് അക്രമാസക്തരാവുകയും സെക്യുരിറ്റി ജീവനക്കാരനെ മര്ദിക്കുകയുമായിരുന്നുവെന്നാണ് വിവരം. 'ആകാശ മുട്ടായി' സിനിമയുടെ പ്രൊഡക്ഷന് സംഘം താമസിക്കുന്ന ഹോട്ടലിലേക്ക് കാറില് വന്നിറങ്ങിയ സുബൈറിനെ നോ പാര്ക്കിങ് ബോര്ഡ് ഉപയോഗിച്ചാണു തലയ്ക്ക് അടിച്ചത്. പ്രതികളില് ഒരാളെ പോലീസ് കസ്റ്റഡിയില് എടുത്തിട്ടുണ്ട്.അനീഷ് എന്നയാളാണ് പോലീസ് പിടിയിലുള്ളത് എന്നാണ് സൂചന.
സംഭവം അറിഞ്ഞ ശേഷം നടന് ജയറാമടക്കം സിനിമയിലെ മറ്റു പ്രവര്ത്തകര് ആശുപത്രിയിലെത്തി. അസിസ്റ്റന്റ് കമ്മീഷണറുടെ നേതൃത്വത്തിലുള്ള പോലീസ് സ്ഥലത്ത് എത്തിയിട്ടുണ്ട്. നിര്മാതാവ് സിയാദ് കോക്കറും ആശുപത്രിയില് പരിക്കേറ്റവരെ സന്ദര്ശിച്ചിരുന്നു.
മലയാളത്തിലെ നിരവധി ഹിറ്റ് സിനികളുടെ നിര്മാതാവ് കൂടിയാണ് മഹാ സുബൈര്. ദിലീപ് നായകനായ ബ്ലോക്ബസ്റ്റര് സിനിമ മീശമാധവന്റെ നിര്മാതാവായി തുടങ്ങിയ സുബൈര് പിന്നീട് മനസ്സിനക്കരെ, തിരക്കഥ, പാലേരിമാണിക്യം, പെണ്പട്ടണം, ക്രിസ്റ്റ്യന് ബ്രദേഴ്സ്, സലാം കാശ്മീര് തുടങ്ങിയ സിനിമകളും നിര്മ്മിച്ചു.
https://www.facebook.com/Malayalivartha
