പത്തനാപുരത്തെ നിയസഭാ തെരഞ്ഞെടുപ്പ് വിവാദങ്ങള്‍ക്ക് പിന്നാലെ കെ.ബി ഗണേഷ്‌കുമാര്‍ എം.എല്‍.എയും യു.ഡി.എഫ് സ്ഥാനാര്‍ത്ഥിയുമായിരുന്ന ജഗദീഷും സൈരാഭാനുവില്‍ അഭിനയിച്ചു. പടം ഹിറ്റായി ഓടിക്കൊണ്ടിരിക്കുമ്പോഴും പലരും ഇക്കാര്യം ശ്രദ്ധിച്ചില്ല. മഞ്ജുവാര്യര്‍ നായികയായ കേറോഫ് സൈരാഭാനു എന്ന ചിത്രത്തിലാണ് ഗണേഷ് പൊലീസ് ഓഫീസറായും ജഗദീഷ് വക്കീലായും അഭിനയിച്ചത്. രണ്ട് പേര്‍ക്കും ഇപ്പോള്‍ സിനിമയില്‍ അവസരങ്ങള്‍ കുറവാണ്. ജഗദീഷ് ടി.പി പരിപാടികള്‍ക്ക് പിന്നാലെയാണ്. ഗണേഷിന് എം.എല്‍.എ എന്ന നിലയിലുള്ള തെരക്കുകളുണ്ട്. 

പത്തനാപുരം നിയമസഭാ തെരഞ്ഞെടുപ്പിനിടെ ഇരുവരും നടത്തിയ വാഗ്വാദങ്ങളാണ് വിവാദങ്ങള്‍ക്ക് തുടക്കമായത്. താന്‍ വായില്‍ വെള്ളിക്കരണ്ടിയുമായല്ല ജനിച്ചതെന്നും അതുകൊണ്ട് സാധാരണക്കാരുടെ പ്രശ്‌നങ്ങള്‍ മനസിലാക്കാനാവും എന്ന് പറഞ്ഞ് ജഗദീഷായിരുന്നു വിവാദത്തിന് തിരികൊളുത്തിയത്. ഗണേഷിന്റെ ദാമ്പത്യ തകര്‍ച്ചയും തെരഞ്ഞെടുപ്പ് ചര്‍ച്ചയായി. എന്നാല്‍ സ്വന്തം പിതാവ് മരിച്ചിട്ടും വീട്ടില്‍ പോകാതെ വിദേശത്ത് സ്‌റ്റേജ്‌ഷോ കളിച്ച് നടന്നയാളാണ് ജഗദീഷ് എന്നും അങ്ങനെയുള്ളവര്‍ക്ക് എങ്ങനെ മനുഷ്യത്വം ഉണ്ടാകുമെന്നും ഗണേഷ് തിരിച്ചടിച്ചു. എന്നാല്‍ സംഭവം ശരിയാണെന്നും സ്‌പോണ്‍സറുമായുള്ള കരാര്‍ പാലിക്കുന്നതിനായാണ് അച്ഛന്‍ മരിച്ചിട്ടും നാട്ടില്‍ വരാഞ്ഞതെന്നും വന്നാല്‍ തന്നെ സംസ്‌കാരം കഴിയുമായിരുന്നു. നടന്‍ ശ്രീനിവാസന് ഇക്കാര്യം അറിയാമെന്നും ജഗദീഷ് വ്യക്തമാക്കിയിരുന്നു.

വിവാദങ്ങള്‍ക്ക് പിന്നാലെ ജഗദീഷിന്റെ അടുത്ത സുഹൃത്തുക്കളായ പ്രിയദര്‍ശനും മോഹന്‍ലാലും ഗണേഷിന്റെ തെരഞ്ഞെടുപ്പ് പ്രചരണത്തിനെത്തി. അതും വിവാദമായി. സലിംകുമാര്‍ അടക്കമുള്ളവര്‍ മോഹന്‍ലാലിന്റെ നടപടിയെ ചോദ്യം ചെയ്ത് രംഗത്തെത്തി. താരങ്ങള്‍ മല്‍സരിക്കുന്ന പത്തനാപുരത്ത് സഹപ്രവര്‍ത്തകര്‍ തെരഞ്ഞെടുപ്പിന് പോകില്ലെന്നായിരുന്നു അമ്മയുടെ തീരുമാനം. ഈ വിവാദങ്ങളെ തുടര്‍ന്ന് ജഗദീഷ് സുഹൃത്തുക്കളുമായി മാനസികമായി അകല്‍ച്ചയിലാണ് ഇപ്പോഴും. അതിനിടയില്‍ ഗണേഷുമൊത്ത് അഭിനയിച്ചത് പ്രേക്ഷകര്‍ക്ക് കൗതുകമായി.