ഓർമകളിലൂടെ; മോഹന്‍ലാല്‍ ജനിച്ച് വളര്‍ന്ന വീട്ടിലെത്തി
ജനിച്ച് വളര്‍ന്ന വീട്ടില്‍ മോഹന്‍ലാലെത്തി. ബന്ധുവും സംവിധായകനുമായ ബി.ഉണ്ണികൃഷ്ണനൊപ്പമാണ് ഇലന്തൂരിലെ വീട്ടിലേക്ക് കഴിഞ്ഞ ദിവസം താരം എത്തിയത്. അതും 32 വര്‍ഷങ്ങള്‍ക്ക് ശേഷം. ഇലന്തൂരിലുള്ള പുന്നയ്ക്കല്‍ വീട്ടിലാണ് മോഹന്‍ലാല്‍ ജനിച്ചത്. പുതിയ ചിത്രമായ 'വില്ലന്റെ' ചിത്രീകരണത്തിനിടയിലെ ഇടവേളയിലായിരുന്നു സന്ദര്‍ശനം.
അടുത്ത ബന്ധുക്കളെ മാത്രം അറിയിച്ച ശേഷമായിരുന്നു വരവ്. അതിരാവിലെ ഇലന്തൂരിലെത്തിയ മോഹന്‍ലാല്‍ ഒരു മണിക്കൂറോളം ജന്മവീട്ടില്‍ ചിലവഴിച്ചു. അടുത്ത ചില ബന്ധുക്കളുടെ വീടുകളും സന്ദര്‍ശിച്ച ശേഷമാണ് മടങ്ങിയത്. മോഹന്‍ലാലിന്റെ അമ്മാവന്റെ വീടാണ് പുന്നയ്ക്കലേത്. ബാല്യകാലത്ത് മോഹന്‍ലാല്‍ കളിച്ചു വളര്‍ന്നത് ഇവിടെയായിരുന്നു.
അച്ഛന്‍ വിശ്വനാഥന്‍നായര്‍ ജോലി സൗകര്യാര്‍ഥം തിരുവനന്തപുരത്ത് മുടവന്‍മുകളിലേക്ക് താമസം മാറ്റിയതോടെയാണ് മോഹന്‍ലാലിന്റെ സന്ദര്‍ശനം നിലച്ചത്.തുടര്‍ന്ന് സിനിമയിലെ തിരക്കുകള്‍ കൂടി ആയതോടെ ഇലന്തൂരിലേക്കുള്ള സന്ദര്‍ശനം ഇല്ലാതായി. സംവിധായകന്‍ ബി. ഉണ്ണികൃഷ്ണന്‍ തന്റെ ഫെയ്‌സ്ബുക്കില്‍ ഇലന്തൂരിലെ വീട്ടില്‍ ലാലിനൊന്നിച്ചു നില്‍ക്കുന്ന ചിത്രം പോസ്റ്റ് ചെയ്തതോടെയാണ് സന്ദര്‍ശനം പരസ്യമായത്.
https://www.facebook.com/Malayalivartha
