ചെമ്മീനിൽ കറുത്തമ്മയായി സിനിമാ ലോകത്ത് എത്തേണ്ടിയിരുന്നയാളാണ് റാബിയബീവി. എന്നാൽ അന്ന് കൈവിട്ട ഭാഗ്യം 80 വയസ്സിൽ റാബിയബിവിയെ തേടി വീണ്ടും എത്തിയിരിക്കുകയാണ്. സിനിമാ പരസ്യ സംവിധായകനായ ആദിയാണ് റാബിയ ബീഗത്തെ വെ‍ളളിത്തിരയിൽ എത്തിക്കുന്നത്.

ആദിയുടെ രണ്ടാമത്തെ സിനിമയായ പന്തിലെ പ്രധാന കഥാപാത്രമാണ് റാബിയ. ചെമ്മീനിലെ കറുത്തമ്മയാകാന്‍ രാമുകാര്യാട്ടും, നടന്‍ സത്യനും ആദ്യം കണ്ടെത്തിയത് അന്ന് കോഴിക്കോടന്‍ നാടകവേദിയിലെ പ്രതിഭയായ ബീഗം റാബിയബീഗത്തെയായിരുന്നു.

എന്നാല്‍ ചരിത്രത്തിലേക്കുള്ള ആ ക്ഷണം യാഥാസ്ഥിതിക എതിര്‍പ്പുകളെ ഭയന്ന് റാബിയ വേണ്ടെന്ന് വച്ച് ഗായികയും ആകാശവാണി ആര്‍ട്ടിസ്റ്റുമായി കലാ ലോകത്ത് അധികമാരുമറിയാതെ ജീവിച്ചു. എന്നാൽ കോ‍ഴിക്കോട്ടെ ഒരുപരസ്യപരിപാടിയിൽ പങ്കെടുക്കാനെത്തിയ മഞ്ജു വാര്യരെ കെട്ടിപ്പിടിക്കുന്ന ദൃശ്യങ്ങൾ സോഷ്യൽ മീഡിയയിൽ പ്രചരിച്ചതോടെയാണ് റാബിയ വീണ്ടും വാർത്തകളിൽ നിറയുന്നത്.

മഞ്ജു വാര്യരുടെ കടുത്ത ആരാധികയായ റാബിയയുടെ സിനിമാ പ്രേമം മനസ്സിലാക്കിയ സംവിധായകൻ ആദി തന്‍റെ പുതിയ ചിത്രത്തിലേക്ക് അവസരമൊരുക്കുകയായിരുന്നു. ചെറുപ്പത്തിൽ നഷ്ടമായ സൗഭാഗ്യത്തെ ഇപ്പോൾ സന്തോഷത്തോടെ സ്വീകരിക്കുകയാണ് താനെന്ന് റാബിയ പറയുന്നു. ഫുട്ബോളിനെ ഏറെ സ്നേഹിക്കുന്ന കഥാപാത്രമായാണ് റാബിയാ ബീഗം വെളളിത്തിരയിലെത്തുന്നത്.

ആദി രചനയും സംവിധാനവും നിര്‍വഹിക്കുന്ന പന്തിന്റെ ചിത്രീകരണം ഈ മാസം 15 മുതല്‍ പൊന്നാനിയിലും പരിസരപ്രദേശങ്ങളിലും ആരംഭിക്കും. അപ്പോജി ഫിലീംസിന്റെ ബാനറില്‍ ഷാജി ചങ്ങരംകുളമാണ് നിര്‍മാണം.