മലയാള സിനിമ ഉറ്റുനോക്കുന്ന ദിവസമാണ് ഈ മാസം 28. മഞ്ജുവാര്യരും മുന്‍ഭര്‍ത്താവ് ദിലീപും കേന്ദ്രകഥാപാത്രങ്ങളാകുന്ന സിനിമകള്‍ റിലീസ് ചെയ്യുന്നത് 28നാണ്. എന്നാൽ സെപ്റ്റംബര്‍ 29 ബിജുമേനോന്റെ ജീവിതത്തിലെ വലിയ മാസ് സിനിമ റിലീസ് ചെയ്യപ്പെടുകയാണ്. കല്യാണരാമന്‍, പുലിവാല്‍ കല്യാണം, തൊമ്മനും മക്കളും, മായാവി, ചോക്ലേറ്റ്, ചട്ടമ്പിനാട്, മേരിക്കുണ്ടൊരു കുഞ്ഞാട്, ടു കണ്‍ട്രീസ് തുടങ്ങി സംവിധാനം ചെയ്ത 13 സിനിമകളും സൂപ്പര്‍ ഹിറ്റാക്കിയ ഷാഫിയുടെ ഷെര്‍ലക് ടോംസ് 29ന് തിയറ്ററിലെത്തും. നായകന്‍ ബിജുമേനോനാണ്. 2010ല്‍ മേരിക്കുണ്ടൊരു കുഞ്ഞാടിലൂടെ മറ്റൊരു ബിജുമേനോനെ കണ്ടെത്തിയ അതേ ഷാഫി.

2012ല്‍ ഓര്‍ഡിനറിയിലെ പാലക്കാടന്‍ ഡ്രൈവറിലൂടെ ബിജുമേനോന്‍ മലയാളിയുടെ അതീവ പ്രിയങ്കരനായി. പിന്നീട് രണ്ടു വര്‍ഷം കഴിഞ്ഞ് വെള്ളിമൂങ്ങ ബിജുമേനോന്റെ നായകത്വം ഉറപ്പിച്ചു. അപ്പോഴും ഒട്ടും ധൃതിയില്ലാതെ ബിജു കാത്തിരുന്നു. 2010 മുതലുള്ള ഏഴാണ്ടിന്റെ സാവകാശത്തിനൊടുവില്‍ ബിജുമേനോന്‍ മറ്റു നായകരുടെ കൂട്ടില്ലാതെ ഷെര്‍ലക് ടോംസാവുകയാണ്.

വിനോദ വ്യവസായത്തിലേയ്ക്ക് 1991ല്‍ ഹോട്ടല്‍ റിസപ്ഷനിലിസ്റ്റിന്റെ വേഷത്തില്‍ ഈഗിള്‍ എന്ന സിനിമയിലൂടെ വന്ന ബിജുവിന്റെ ഏറ്റവും പുതിയ തുടക്കമാണ് ഷാഫിയുടെ സിനിമ. 1995ല്‍ മാന്നാര്‍ മത്തായിയിലെ സുന്ദര വില്ലന്‍ മുതല്‍ മനസില്‍ പതിഞ്ഞ മുഖം പിന്നീട് പലതുമായി.

മേഘമല്‍ഹാറിലും മധുരനൊമ്പരക്കാറ്റിലും സംയുക്തയും ബിജുവും പ്രേമിച്ചു. പിന്നീടത് ജിവീതത്തിലേയ്ക്ക് തുടര്‍ന്നു. അഴികിയ രാവണനില്‍ മുതല്‍ അനേകം വില്ലന്മാര്‍. കൃഷ്ണഗുഡിയിലെ പ്രണയകാലത്തിലും പ്രണയവര്‍ണ്ണങ്ങളിലും നൊമ്പരപ്പെടുത്തി. ലാല്‍ജോസ് കത്തിക്കയറുന്ന കാലത്താണ് രണ്ടാം ഭാവത്തിലെ ഇരട്ട വേഷം. പക്ഷെയത് വിജയിച്ചില്ല.

പിന്നീട് അത്തരത്തിലൊരു വലിയ പരീക്ഷണം ആരും നടത്തിയിട്ടില്ല. രണ്ടാം ഭാവത്തോടെ മലയാളത്തിലെ സൂപ്പര്‍ സ്റ്റാര്‍ ശ്രേണിയിലേയ്ക്കുള്ള ബിജുവിന്റെ പ്രവേശനമാകും ഷെര്‍ലക് ടോംസ് എന്നു തന്നെയാണ് പ്രതീക്ഷ.