വിവാദങ്ങളുടെ തോഴന്‍ പി സി ജോര്‍ജ് മുഖ്യമന്ത്രിയാകുന്നുവെന്ന് പറഞ്ഞാല്‍ ആരെങ്കിലും വിശ്വാസിക്കുമോ. അതേ, ജീവിതത്തിലല്ല മറിച്ച് സിനിമയിലാണെന്ന് മാത്രം. സലിം കുമാര്‍ ജയറാമിനെ നായകനാക്കി സംവിധാനം ചെയ്യുന്ന ചിത്രത്തിലാണ് പിസി മുഖ്യമന്ത്രിയായി അഭിനയിക്കുന്നത്. പിസിയുടെ മണ്ഡലത്തില്‍ ഉള്‍പ്പെട്ട ഈരാട്ടുപ്പേട്ടയിലാണ് ചിത്രീകരണം നടക്കുക.

ഷൂട്ടിംഗ് തുടങ്ങുന്നതിന് മുമ്പ് തന്നെ പിസിയെ ജയറാമും സലീം കുമാറും പോയി കണ്ടിരുന്നു. തന്റെ എല്ലാം സഹകരണവും ചിത്രത്തില്‍ ഉണ്ടാകുമെന്ന് പിസി ജോര്‍ജ് പറഞ്ഞു.തന്റെ ചിത്രത്തില്‍ ഒരു പ്രധാന റോളുണ്ടെന്നും അതില്‍ അഭിനയിക്കാന്‍ പറ്റുമോയെന്നും സലീംകുമാര്‍ തന്നോട് ചോദിച്ചുവെന്നും പിസി പറഞ്ഞു. 

അതിനെന്താ സന്തോഷമല്ലെയുള്ളൂവെന്ന് സലീമിനോട് പറയുകയാണ് ചെയ്തതെന്ന് പിസി പറഞ്ഞു. ദൈവമേ കൈ തൊഴാം എന്നാണ് ചിത്രത്തിന്റെ പേര്. ചിത്രീകരണം ഉടന്‍ തുടങ്ങുമെന്നാണ് അറിയുന്നത്.