പുതിയചിത്രങ്ങളുടെ ഷൂട്ടിംഗുമായി ബന്ധപ്പെട്ട് തമിഴ്‌നാട്ടിലായിരുന്ന മമ്മൂട്ടിയും മോഹന്‍ലാലും കഴിഞ്ഞയാഴ്ച കേരളത്തിലെത്തി. അങ്കിള്‍ എന്ന സിനിമയുടെ ഷൂട്ടിംഗിനാണ് നീണ്ട ഇടവേളയ്ക്ക് ശേഷം മമ്മൂട്ടി ഊട്ടിയിലെത്തിയത്. അവസാനം വെനീസിലെ വ്യാപാരിയില്‍ അഭിനയിക്കാനാണ് ഊട്ടിയിലെത്തിയിരുന്നത്. പൂനംബജ്‌വയും മമ്മൂട്ടിയും ഒത്തുള്ള ഗാനമായിരുന്നു അന്ന് ചിത്രീകരിച്ചത്. എന്നാല്‍ അങ്കിള്‍ എന്ന സിനിമയിലെ കൂടുതല്‍ സീനുകളും റോഡിലാണ് നടക്കുന്നത്. ഊട്ടിയിലെ റോഡുകളും അതിന് ഇരുവശവുമുള്ള പ്രദേശങ്ങളും മനോഹരമായതിനാലാണ് ഷൂട്ടിംഗ് അവിടെ തുടങ്ങിയത്. നടനും സംവിധായകനുമായ ജോയി മാത്യു തിരക്കഥ എഴുതിയ അങ്കിള്‍ നവാഗതനായ ഗിരീഷ് ദാമോദറാണ് സംവിധാനം ചെയ്യുന്നത്. 

ഊട്ടിയിലെ ചിത്രീകരണം പുരോഗമിക്കുന്നതിനിടെയാണ് നവരാത്രി എത്തിയത്. അതോടെ ആഘോഷങ്ങളും മറ്റുമായി ബന്ധപ്പെട്ട് റോഡില്‍ നല്ല തിരക്കായി. തെന്നിന്ത്യയുടെ മുഴുവന്‍ താരമായ മമ്മൂട്ടിയെ കാണാന്‍ ജനംതിക്കിത്തിരക്കി. അതോടെ അണിയറപ്രവര്‍ത്തകര്‍ ലൊക്കേഷന്‍ ഷിഫ്റ്റ് ചെയ്ത് വയനാട്ടിലെത്തി. ബത്തേരിയിലും കല്‍പ്പറ്റയിലും മറ്റുമായിരുന്നു ചിത്രീകരണം. വയനാട് അധികം ജനവാസമില്ലാത്ത പ്രദേശമായതിനാല്‍ ആളുകളുടെ ശല്യമുണ്ടായില്ല. മമ്മൂട്ടിയെ കാണാന്‍ ജനം എത്തിയെങ്കിലും ആരും ശല്യം ഉണ്ടാക്കിയില്ല. ഒരു സെല്‍ഫിയെടുക്കാന്‍ പോലും ആരും എത്തിയില്ല എന്നത് കൗതുകമുണര്‍ത്തിയെന്ന് ജോയിമാത്യു പറഞ്ഞു. സാധാരണ വയനാട്ടില്‍ ചിത്രീകരിച്ച സിനിമകള്‍ ഓടില്ലെന്നൊരു അന്ധവിശ്വാസം മലയാളസിനിമയിലുണ്ട്. അങ്കിള്‍ തിയേറ്ററുകളിലെത്തുന്നതോടെ അത് മാറുമെന്ന് പ്രതീക്ഷിക്കാം.

തെങ്കാശിയിലെ ഒടിയന്റെ ലൊക്കേഷന്‍ കഴഞ്ഞയാഴ്ചയാണ് വാളയാറിലേക്ക് ഷിഫ്റ്റ് ചെയ്തത്. ക്‌ളൈമാക്‌സ് അടക്കമുള്ള ഭാഗങ്ങള്‍ തെങ്കാശിക്ക് അടുത്തുള്ള മറ്റൊരു സ്ഥലത്താണ് ചിത്രീകരിച്ചത്. വാളയാറില്‍ മോഹന്‍ലാലും കുട്ടികളും പ്രകാശ് രാജും തമ്മിലുള്ള സംഘട്ടനമാണ് ചിത്രീകരിച്ചത്. പീറ്റര്‍ഹെയിനാണ് ആക്ഷന്‍ ഡയറക്ടര്‍. പാലക്കാട്ടെ ഗ്രാമങ്ങളില്‍ പണ്ടുണ്ടായിരുന്ന ഒടിയന്‍മാരുടെ കഥയാണ് ഒടിയന്‍ മാണിക്യനിലൂടെ ആവിഷ്‌ക്കരിക്കുന്നത്. വാളയാറിലെ ചിത്രീകരണ ശേഷം പത്ത് ദിവസം ബ്രേക്കാണ്. രഞ്ജിത്ത് മണിയന്‍പിള്ള രാജുവിന്റെ മകനെ നായകനാക്കി ഒരുക്കുന്ന ബിലാത്തി വിശേഷങ്ങളില്‍ മോഹന്‍ലാല്‍ പ്രധാനപ്പെട്ട ഒരു വേഷം ചെയ്യുന്നുണ്ട്. അതിനിടെ വില്ലന്റെ പ്രമോഷന്‍ പരിപാടികളിലും മോഹന്‍ലാല്‍ പങ്കെടുക്കും.