ജനതാഗ്യാരേജിന്റെയും പുലിമുരുകന്റെയും വിജയത്തിലൂടെ മോഹന്‍ലാലിന് തെലുങ്കിലും തമിഴിലും ലഭിച്ച മാര്‍ക്കറ്റ് ബിസിനസ് ആക്കുക എന്ന വ്യക്തമായ തന്ത്രത്തോടെയാണ് ബി. ഉണ്ണികൃഷ്ണന്‍ വില്ലനുമായി എത്തുന്നത്. തമിഴില്‍ നിന്ന് വിശാലിനെയും തെലുങ്കില്‍ നിന്ന് ശ്രീകാന്തിനെയും കാസ്റ്റ് ചെയ്ത് ബിസിനസ് കൂടുതല്‍ സേഫ് ആക്കിയിരിക്കുകയാണ് ഉണ്ണികൃഷ്ണന്‍. മഞ്ജുവാര്യര്‍ നായികയായതോടെ കേരളത്തിലും വിദേശമലയാളികള്‍ക്കിടയിലും ചിത്രത്തിന്റെ മൂല്യം വര്‍ദ്ധിച്ചു. പടം തിയേറ്ററില്‍ മോശമായാലും നിര്‍മാതാവിന് നഷ്ടം സംഭവിക്കില്ലെന്ന് ഉറപ്പിക്കാനാണ് ഇത്തരംനീക്കം നടത്തിയത്. ജനതാഗ്യാരേജ് എന്ന തെലുങ്ക് പടം സൂപ്പര്‍ഹിറ്റായതോടെ തെലുങ്കില്‍ മോഹന്‍ലാല്‍ ചിത്രങ്ങള്‍ക്ക് പ്രേക്ഷകരുണ്ട്. പുലിമുരുകന്റെ തെലുങ്ക് ഡബ്ബിംഗ് പതിപ്പ് നല്ല കഌക്ഷന്‍ നേടിയത് അതിന് ഉദാഹരണമാണ്. അതിന്റെ ചുവട് പിടിച്ച് ഒപ്പവും തെലുങ്ക് പതിപ്പില്‍ ഇറക്കിയിരുന്നു. മോശമല്ലാത്ത കളക്ഷനും നേടി. 

ഇപ്പോഴൊരു മോഹന്‍ലാല്‍ ചിത്രം ഇറങ്ങിയാല്‍ സൗത്തിന്ത്യയില്‍ മുഴുവന്‍ ബിസിനസ് നടക്കും. മുമ്പ് അന്യസംസ്ഥാനങ്ങളില്‍ മലയാളി പ്രേക്ഷകര്‍മാത്രമാണ് താരത്തിനുണ്ടായിരുന്നത്. തെന്നിന്ത്യയിലെ ഏറ്റവും വലിയ നിര്‍മാണ കമ്പിനികളിലൊന്നായ റോക്ക് ലൈന്‍ ഇന്റര്‍നാഷണലാണ് ചിത്രം നിര്‍മിക്കുന്നത്. പുലിമുരുകന് ശേഷം മോഹന്‍ലാല്‍ അഭിനയിക്കുന്ന ബിഗ് ബജറ്റ് ചിത്രം കൂടിയാണിത്. തമിഴിലും തെലുങ്കിലും മോഹന്‍ലാല്‍ തന്നെ ഡബ്ബ് ചെയ്യും എന്ന പ്രത്യേകതയുമുണ്ട്. ഇന്‍വെസ്റ്റിഗേറ്റീവ് ത്രില്ലറാണെങ്കിലും തന്റെ മുന്‍ ചിത്രങ്ങളില്‍ നിന്ന് വ്യത്യസ്തമായിരിക്കും വില്ലനെന്ന് ബി. ഉണ്ണികൃഷ്ണന്‍ പറയുന്നു. വിഷ്വല്‍ എഫ്‌സിന്റെ സഹായത്തോടെയാണ് സംഘട്ടനരംഗങ്ങള്‍ ചിത്രീകരിച്ചിരിക്കുന്നത്. അതിന് മാത്രം കോടികള്‍ ചെലവഴിച്ചിട്ടുണ്ട്. 

എന്നും എപ്പോഴും എന്ന ചിത്രത്തിന് ശേഷം മോഹന്‍ലാലും മഞ്ജുവാര്യരും ഒന്നിക്കുന്ന സിനിമയെന്നതാണ് മലയാളി പ്രേക്ഷകരെ പ്രധാനമായും വില്ലനിലേക്ക് ആര്‍ഷിപ്പിക്കുന്നത്. പിന്നെ മോഹന്‍ലാലിന്റെ , ഇതുവരെ കണ്ടിട്ടില്ലാത്ത സാള്‍ട്ട് ആന്റ് പെപ്പര്‍ ലുക്കും സ്റ്റൈലും ആരാധകരെ ത്രില്ലടിപ്പിച്ചിരിക്കുകയാണ്. ഒരു മുന്‍ എ.ഡി.ജി.പി കൊലപാതകത്തില്‍ പെടുന്നതാണ് ചിത്രത്തിന്റെ ഇതിവൃത്തം. മോഹന്‍ലാല്‍ നെഗറ്റീവ് ഷെയ്ഡുള്ള കഥാപാത്രത്തെ അവതരിപ്പിക്കുന്നു എന്നതും ശ്രദ്ധേയമാണ്. ഈമാസം 27ന് കേരളത്തില്‍ മാത്രം 300ലധികം കേന്ദ്രങ്ങളിലാണ് ചിത്രം പ്രദര്‍ശനത്തിനെത്തുക.