തന്റെ സിനിമ ജീവിതത്തിലെ വ്യത്യസ്തമായ കഥാപാത്രമായി മോഹൻലാൽ എത്തുന്നു.മോഹൻലാൽ-ഭദ്രൻ ചിത്രത്തിൽ ആനപ്പാപ്പാനായാണ് മോഹൻലാൽ വേഷമിടുന്നത്. നീണ്ട കാലത്തിനു ശേഷമാണ് മോഹൻലാൽ ഭദ്രൻ ടീം ഒന്നിക്കുന്നത്. മോഹൻലാലിൻറെ ബിഗ് ബജറ്റ് ചിത്രം രണ്ടാമൂഴത്തിനു മുൻപ് ഭദ്രൻ ചിത്രം ആരംഭിക്കും എന്നാണ് റിപ്പോർട്ട്.

നാലു മാസം മുമ്പ് തിരുവനന്തപുരത്ത് വെളിപ്പാടിന്‍റെ പുസ്തകത്തിന്‍റെ ചിത്രീകരണ സമയത്താണ് ഭദ്രൻ കഥ പറഞ്ഞത്. കഥയും കഥാപാത്രവും ഇഷ്ടപ്പെട്ട മോഹൻലാൽ ഉടൻ തന്നെ ഡേറ്റ് നൽക്കുകയും ചെയ്തു. തിരക്കഥ പൂർത്തിയാക്കുന്നതിന്റെ തിരക്കിലാണ് ഭദ്രൻ. പൂർണമായും കാടിന്‍റെ പശ്ചാത്തലത്തിലാണ് ചിത്രം ഒരുങ്ങുന്നതെന്നാണ് വിവരം. മറ്റ് താരനിർണയം നടന്നു വരുന്നതേയുള്ളു.അടുത്ത വർഷം ആദ്യം ഷൂട്ടിങ് ആരംഭിക്കും.

'ഒടിയൻ' എന്ന ചിത്രത്തിന്റെ ഷൂട്ടിങ് തിരക്കിലാണ് ഇപ്പോൾ മോഹൻലാൽ .മോഹൻലാൽ ഭദ്രൻ കൂട്ടുകെട്ടിൽ പുറത്തിറങ്ങിയ അവസാന ചിത്രമാണ് 'ഉടയോൻ' ഇതിലെ മോഹൻലാലിന്‍റെ ഇരട്ട കഥാപാത്രം ശ്രദ്ധ നേടിയെങ്കിലും ചിത്രം ബോക്സോഫീസിൽ പരാജയപ്പെട്ടു. ഇന്നും മലയാള സിനിമ പ്രേക്ഷകരുടെ ഹരമായ 'സ്ഫടികം' ഭദ്രൻ മോഹൻലാൽ ടീമിന്റെ സൂപ്പർ ഹിറ്റ് ചിത്രമാണ്.