രാഖി സാവന്ത് തനുശ്രീ ദത്തയ്‌ക്കെതിരേ മാനനഷ്ടക്കേസ് നല്‍കി . നാനാ പടേക്കര്‍ക്കെതിരേയുള്ള മീ ടൂ കാമ്ബയിനില്‍ തനുശ്രീ തന്നെ വലിച്ചിഴച്ചുവെന്നാണ് രാഖിയുടെ ആരോപണം. തനുശ്രീയുടെ ആരോപണം തന്റെ പ്രതിച്ഛായക്ക് മങ്ങലേല്‍പിച്ചുവെന്നും രാഖി പറയുന്നു. 25 പൈസയ്ക്കാണ് മാനനഷ്ടക്കേസ് നല്‍കിയിരിക്കുന്നത്. തന്റെ പ്രതിച്ഛായക്ക് മങ്ങലേല്‍പ്പിക്കാന്‍ ശ്രമിച്ചുവെന്ന ആരോപണം ഉയര്‍ത്തുകയാണ് രാഖി. അതുകൊണ്ട് തന്നെ മാനനഷ്ട കേസ് കൊടുത്തുവെന്ന് രാഖി വെളിപ്പെടുത്തിയത്.

പത്തു വര്‍ഷത്തിനുശേഷമാണ് തനിക്ക് നേരിടേണ്ടി വന്ന ദുരനുഭവത്തെക്കുറിച്ച് വെളിപ്പെടുത്തലുമായി തനുശ്രീ രംഗത്തുവന്നത്. 2009ല്‍ പുറത്തിറങ്ങിയ ഹോണ്‍ ഒ.കെ എന്ന ചിത്രത്തിന്റെ സെറ്റില്‍വച്ച് നാന പടേക്കര്‍ തന്നോട് മോശമായി പെരുമാറിയെന്നാണ് തനുശ്രീയുടെ ആരോപണം. സംവിധായകനോട് പരാതിപ്പെട്ടപ്പോള്‍ തന്നെയും മാതാപിതാക്കളെയും ഒരു കൂട്ടം ആളുകള്‍ ആക്രമിച്ചുവെന്നും കാര്‍ തകര്‍ത്തുവെന്നും തനുശ്രീ പറഞ്ഞിരുന്നു. തനുശ്രീയെ ഗുണ്ടകള്‍ ആക്രമിക്കുന്ന വീഡിയോ ഫൂട്ടേജും പുറത്ത് വന്നിരുന്നു.

പിന്നീടങ്ങോട്ട് അരങ്ങേറിയത് നാടകീയ സംഭവങ്ങളായിരുന്നു. തനുശ്രീ തന്നെ പീഡിപ്പിച്ചുവെന്നാരോപിച്ച് രാഖി വാര്‍ത്താസമ്മേളനം വിളിച്ചുചേര്‍ത്തു. മനസ്സുകൊണ്ട് തനുശ്രീ പുരുഷനാണെന്നും തന്നെ ബലാത്സംഗം ചെയ്തുവെന്നും രാഖി പറഞ്ഞു. തന്നെ നുണച്ചി എന്ന് വിളിച്ചുവെന്നാരോപിച്ച് രാഖിക്കെതിരേ തനുശ്രീ മാനനഷ്ടകേസ് ഫയല്‍ ചെയ്തിരുന്നു.