താന്‍ ചെയ്യുന്ന ജോലിക്ക് തുല്യവേതനമെന്ന് വിശ്വസിക്കുന്ന താരമാണ് ദീപിക പദുക്കോണ്‍. 'ദ ഡോട്ട് ദാറ്റ് വെന്റ് ഫോര്‍ എ വാക്ക്' എന്ന പുസ്തകത്തിന്റെ പ്രകാശനചടങ്ങില്‍ സംസാരിക്കുകയായിരുന്നു താരം. യഥാര്‍ത്ഥജീവിതത്തില്‍ ഹീറോ പരിവേഷമുള്ള 51 വനിതാരത്‌നങ്ങളെ പരിചയപ്പെടുത്തുന്ന പുസ്തകത്തില്‍ ഒരു അധ്യായം ദീപിക പദുക്കോണിനെ കുറിച്ചാണ്.

'ഇന്ന് സിനിമയില്‍ അവസരങ്ങള്‍ക്ക് കുറവില്ല. സിനിമകളുടെ സ്വഭാവവും സിനിമകളിലെ സ്ത്രീകളുടെ സ്ഥാനവും ഒരുപാട് മാറിയിട്ടുണ്ട്, തീര്‍ച്ചയായും പ്രതിഫലവും. ഞാനെന്നെ കുറിച്ച് സംസാരിക്കാന്‍ ആഗ്രഹിക്കുന്നു. സിനിമകളില്‍ നായകനു നല്‍കുന്ന അതേ പ്രതിഫലം തന്നെ എനിക്കും ലഭിച്ചതിലൂടെ വേതന കാര്യത്തിലെ വിടവ് നികത്താന്‍ കഴിഞ്ഞിട്ടുണ്ടെന്നാണ് വിശ്വാസം.'

അടുത്തിടെ പ്രതിഫലത്തുകയെ ചൊല്ലി ഒരു ചിത്രം നിരസിക്കേണ്ടി വന്ന സംഭവവും താരം ഓര്‍ത്തെടുത്തു. നായകനു ലഭിക്കുന്നതിലും കുറഞ്ഞ പ്രതിഫലം ഓഫര്‍ ചെയ്യതുകൊണ്ടാണ് ആ സിനിമ നിഷേധിക്കേണ്ടി വന്നതെന്നും ദീപിക കൂട്ടിച്ചേര്‍ത്തു. 'അടുത്തിടെ ഒരു സംഭവമുണ്ടായി. ആശയപരമായി എനിക്കിഷ്ടം തോന്നിയ ഒരു സിനിമയായിരുന്നു സംവിധായകന്‍ എനിക്ക് ഓഫര്‍ ചെയ്തത്.

എന്നാല്‍, പ്രതിഫലത്തെ കുറിച്ചു പറഞ്ഞു തുടങ്ങിയപ്പോള്‍ ഇതാണ് എന്റെ ചാര്‍ജ് എന്നു ഞാന്‍ പറഞ്ഞു. കുറച്ചു ദിവസങ്ങള്‍ കഴിഞ്ഞ് അവര്‍ മറുപടി തന്നു, നായകനു തരുന്നത്രയും പ്രതിഫലം എനിക്ക് തരാന്‍ കഴിയില്ലയെന്ന്. എന്റെ 'ട്രാക്ക് റെക്കോര്‍ഡ്' എനിക്ക് നന്നായി അറിയാവുന്നതുകൊണ്ട് ഞാനവര്‍ക്ക് ടാറ്റ കൊടുത്തു യാത്രപറഞ്ഞു. എന്റെ മൂല്യം എനിക്കറിയാം. തുല്യ ജോലിക്ക് തുല്യവേതനം നല്‍കാതിരിക്കുന്നതില്‍ അനീതി തോന്നി ഞാന്‍ ചിത്രത്തില്‍ നിന്നും പിന്മാറുകയായിരുന്നു,' ദീപിക പറയുന്നു.

നായകന്‍ ഒരു സിനിമയ്ക്കു വേണ്ടി നല്‍കുന്ന അത്രയും തന്നെ അധ്വാനം ഒരു നായികയും സിനിമയ്ക്കു വേണ്ടി നല്‍കുന്നുണ്ടെങ്കില്‍ പിന്നെ എന്തുകൊണ്ടാണ് വേതനം തുല്യമാവാത്തത്? എന്നാണ് ദീപിക ചോദിക്കുന്നത്. സ്വന്തമായൊരു വാല്യു തനിക്കായി നല്‍കാനും താരം മടിക്കുന്നില്ല.

'ഇപ്പോള്‍ ഞാനെനിക്കു വേണ്ടി തീരുമാനങ്ങള്‍ എടുക്കുന്നുണ്ട്. കാരണം രാത്രിയില്‍ എനിക്ക് സമാധാനത്തോടെ ഉറങ്ങാന്‍ സാധിക്കണം. നിരാശ തോന്നിക്കുന്ന ചിന്തകളോടെ എനിക്ക് ജീവിക്കാന്‍ സാധിക്കില്ല. ക്രിയേറ്റീവ് കോണ്‍ട്രിബ്യൂഷന്‍ തുല്യമാണെന്നിരിക്കെ ഒരേ ജോലിക്ക് എന്റെ മെയില്‍ കോ സ്റ്റാര്‍ വാങ്ങുന്നതിലും കുറഞ്ഞ വേതനം വാങ്ങുന്നതില്‍ ഞാന്‍ ഓകെ അല്ല,' ദീപിക പറയുന്നു.