ആദ്യ പ്രസവത്തെ തുടര്‍ന്ന് സിനിമയില്‍ നിന്ന് തല്‍ക്കാലം വിട്ടുനില്‍ക്കുന്ന കരീനാ കപൂര്‍ രാഷ്ട്രീയത്തിലേക്ക് ഇറങ്ങുന്നെന്ന് അറിയുന്നു. കോണ്‍ഗ്രസ് സ്ഥാനാര്‍ത്ഥിയായി താരം മത്സരിക്കുമെന്നാണ് വാര്‍ത്ത. ഭോപ്പാലില്‍ കരീനയെ മത്സരിപ്പിക്കണമെന്ന നിര്‍ദ്ദേശം കോണ്‍ഗ്രസ് നേതാവ് യാഗേന്ദ്രസിംഗ് ചൗഹാനാണ് പാര്‍ട്ടിക്ക് മുന്നില്‍ വെച്ചത്. എന്നാല്‍ മറ്റ് നേതാക്കള്‍ക്കൊന്നും ഇതിനോട് യോജിപ്പില്ലെന്ന് അറിയുന്നു. അവരാരും പ്രതികരിക്കാനും തയ്യാറായിട്ടില്ല. അടുത്ത കാലത്തൊന്നും കോണ്‍ഗ്രസ് വിജയിക്കാത്ത മണ്ഡലമാണ് മധ്യപ്രദേശിലെ ഭോപ്പാല്‍. പൊതുസമ്മതരെയും താരങ്ങളെയും ഇറക്കി എങ്ങനെയും അധികാരത്തിലെത്തുകയാണ് കോണ്‍ഗ്രസ് ലക്ഷ്യം.

എന്നാല്‍ രാഷ്ട്രീയത്തിലേക്ക് ഇല്ലെന്ന് കരീന വ്യക്തമാക്കി. ആരെങ്കിലും പ്രചരിപ്പിക്കുന്ന ഊഹാപോഹങ്ങള്‍ക്ക് മറുപടിയില്ലെന്നും താരം തുറന്നടിച്ചു. വാര്‍ത്തകളില്‍ കഴമ്പില്ലെന്നും താമസിക്കാതെ ക്യാമറയ്ക്ക് മുന്നിലെത്തുമെന്നും സിനിമ തന്നെയാണ് തന്റെ ലക്ഷ്യമെന്നും അതില്‍ മാറ്റമില്ലെന്നും കരീന നിലപാട് വ്യക്തമാക്കി. കോണ്‍ഗ്രസ് ഉള്‍പ്പെടെയുള്ള ഒരു രാഷ്ട്രീയ പാര്‍ട്ടികളും തന്നെ സമീപിച്ചിട്ടില്ല. കുട്ടിയേയും നോക്കി വിട്ടിലിരിക്കുകയാണ് താരമിപ്പോള്‍. സിനിമയിലെ രണ്ടാംവരവിന് മുന്നോടിയായി തടി കുറയ്ക്കാനുള്ള ശ്രമത്തിലാണ് താരം. കോണ്‍ഗ്രസ് അനുകൂല കുടുംബമാണ് കരീനയുടേത്.

മാധുരി ദീക്ഷിത് കോണ്‍ഗ്രസ് സ്ഥാനാര്‍ത്ഥിയായേക്കുമെന്ന് റിപ്പോര്‍ട്ടുണ്ട്. നിരവധി താരങ്ങള്‍ ബി.ജെ.പി സ്ഥാനാര്‍ത്ഥികളാകുമെന്ന് അറിയുന്നു. ക്രിക്കറ്റ്താരം ഗൗതംഗംഭീര്‍, സിനിമാ നടന്‍മാരായ സണ്ണി ഡിയോള്‍, അജയ് ദേവ്ഗണ്‍, അക്ഷയ് കുമാര്‍, അനുപം ഖേര്‍ എന്നിവരുടെ പേരുകളാണ് ബി.ജെ.പി പട്ടികയില്‍ ഇടം പിടിച്ചിരിക്കുന്നത്. ഇത് മനസിലാക്കിയാണ് കോണ്‍ഗ്രസ് കരീന അടക്കമുള്ള താരങ്ങളെ തങ്ങളുടെ വലയിലാക്കാന്‍ നീക്കം നടത്തുന്നത്.

കേരളത്തില്‍ മോഹന്‍ലാല്‍ ഉള്‍പ്പെടെയുള്ളവരെ സ്ഥാനാര്‍ത്ഥികളാക്കാന്‍ ബി.ജെ.പി അണിയറ നീക്കം തുടങ്ങി. എന്നാല്‍ മത്സരിക്കാനില്ലെന്ന് മോഹന്‍ലാല്‍ വ്യക്തമാക്കിക്കഴിഞ്ഞു. എന്നാല്‍ മോഹന്‍ലാലിനെ രാജ്യസഭാ എം.പിയാക്കാന്‍ കേരളത്തിലെ ബി.ജെ.പി നേതാക്കള്‍ ശ്രമിക്കുന്നുണ്ട്. കഴിഞ്ഞ ലോക്‌സഭാ തെരഞ്ഞെടുപ്പില്‍ ക്രിക്കറ്റ് താരം ശ്രീശാന്ത് ബി.ജെ.പി സ്ഥാനാര്‍ത്ഥിയായി തിരുവനന്തപുരത്ത് നിന്ന് മത്സരിച്ച് പരാജയപ്പെട്ടിരുന്നു.