അന്തരിച്ച പ്രശസ്ത ഗിറ്റാറിസ്റ്റ് ജോണ്‍ ആന്റണിയെക്കുറിച്ചുള്ള ഓര്‍മ്മകള്‍ പങ്കുവെച്ച് നടിയും ഡബ്ബിങ് ആര്‍ട്ടിസ്റ്റുമായ ഭാഗ്യലക്ഷ്മിയെഴുതിയ കുറിപ്പ് വൈറലാകുന്നു. ഇന്ത്യന്‍ സിനിമയിലെ തന്നെ പ്രഗല്‍ഭനായ സംഗീത വ്യക്തിത്വതമായിരുന്നു ജോണിയെന്ന് ഭാഗ്യലക്ഷ്മി ഓര്‍മ്മിപ്പിക്കുന്നു. ഏആര്‍ റഹ്മാനും ശിവമണിയുമായിരുന്നു അടുത്ത സുഹൃത്തുക്കള്‍.

ഭാഗ്യലക്ഷ്്മിയുടെ വാക്കുകള്‍:

ഞങ്ങളുടെ പ്രിയപ്പെട്ട ജോണി(ജോണ്‍ ആന്റണി)നാളെ യാത്രയാവുന്നു.. ജോണി എപ്പോഴും പറയുമായിരുന്നു ഇതൊരു കപട ലോകമാണ്,സ്‌നേഹത്തിനും ആത്മാര്‍ത്ഥതക്കും യാതൊരു വിലയുമില്ല ഇവിടെ,അതാണ് ഞാന്‍ 24മണിക്കൂറും എന്റെ ഗിറ്റാറുമായി സംസാരിച്ചു കൊണ്ടിരിക്കുന്നത് എന്ന്.

35 വര്‍ഷത്തോളം സിനിമാ സംഗീതലോകത്ത് പ്രവര്‍ത്തിച്ചിട്ടും ജോണിയുടെ മനസ്സിന് സന്തോഷം തരുന്ന സംഗീതം തേടി അലഞ്ഞു.ഒടുവില്‍ ജോണിക്ക് മനസ്സിലായി സിനിമ ഉപേക്ഷിക്കണം,അങ്ങനെയാണ് 2011 ല്‍ ഇനി സിനിമാ സംഗീതം എനിക്ക് വേണ്ട എന്ന തീരുമാനവുമായി ജോണി ചെന്നൈ ഉപേക്ഷിച്ച് തിരുവനന്തപുരത്ത് താമസം ഉറപ്പിച്ചത്.(ഒടുവില്‍ ചെയ്ത സിനിമ വിണ്ണൈ താണ്ടി വരുവായാ).

സത്യത്തില്‍ 'പൊന്‍വീണേ എന്‍ ഉളളില്‍' എന്ന പാട്ടില്‍ ഒടുവില്‍ കേള്‍ക്കുന്ന ഗിറ്റാര്‍ സംഗീതം ജോണിയുടേതാണെന്ന് ആരെങ്കിലും പറയുമ്പോള്‍ ജോണിക്ക് ദേഷ്യമായിരുന്നു..അതാണോ എന്റെ കഴിവ്, എന്റെ കഴിവിനെ എത്ര ചെറുതായി കാണുന്നു എന്ന് പറയുമായിരുന്നു..മലയാള തമിഴ് സിനിമാ സംഗീത ലോകത്തെ എല്ലാ കപടതകളും ജോണി എന്നോട് പറയുമായിരുന്നു...

ജോണിയെ ഏറ്റവും നന്നായി മനസ്സിലാക്കിയ രണ്ട് സുഹൃത്തുക്കള്‍ ആണ് എ ആര്‍ റഹ്മാനും ശിവമണിയും..1985 ല്‍ ഞാന്‍ ജോണിയെ ആദ്യമായി ചൈന്നെയില്‍ വെച്ച് കാണുമ്പോള്‍ സാലിഗ്രാമത്തിലെ ഒരു വീടിന്റെ മുകളിലത്തെ ചെറിയ വാടക വീട്ടിലായിരുന്നു താമസം.

അന്ന് A R REHMAN, SIVAMANI,JOJU എന്ന SOUTH AFRICAN സുഹൃത്ത് എല്ലാവരും ചേര്‍ന്നുളള കളിയും ചിരിയും സംഗീതവും ഞാന്‍ നേരില്‍ കണ്ടതാണ്.കൂട്ടത്തില്‍ ഏറ്റവും ചെറിയ പയ്യനായിരുന്നു A R REHMAN.

ജോണിച്ചേട്ടാ ജോണിച്ചേട്ടാ എന്ന് വിളിച്ചു എപ്പോഴും കൂടെയുണ്ടാവും. അതുകൊണ്ടാണ് ഈയടുത്ത കാലത്ത് റഹ്മാന്‍ ആരുമറിയാതെ ജോണിയെ കാണാന്‍ വന്നതും ഒരു ദിവസം മുഴുവന്‍ ജോണിയോടൊപ്പം ചിലവിട്ടതും..

അന്ന് റഹമാന്‍ പറഞ്ഞുവത്രേ എത്ര നല്ല കാലമായിരുന്നു നമ്മുടെ ചെന്നൈ ജീവിതം, ഇത്രയും വലിയൊരു സിനിമ ലോകത്ത് നല്ല തിരക്കുളള കാലത്തും അത് വലിച്ചെറിഞ്ഞ് സ്വന്തം ഇഷ്ട സംഗീതത്തിനായി ജീവിക്കാനുളള ധൈര്യം എല്ലാവര്‍ക്കും കിട്ടില്ല എങ്ങനെ ജോണിച്ചേട്ടന് അത് സാധിച്ചു എന്ന്.

തിരുവനന്തപുരത്തെ ജീവിതം ആസ്വദിക്കുന്നുണ്ടായിരുന്നു ജോണി.
ഈ വര്‍ഷം വിദേശത്ത് നിരവധി പരിപാടികള്‍ ജോണിക്ക് ഉണ്ടായിരുന്നു..അതേക്കുറിച്ച് ജോണി ആവേശത്തോടെ എന്നോട് പറഞ്ഞിരുന്നു. ഒരുപാട് ആഗ്രഹങ്ങള്‍ ബാക്കി വെച്ചാണ് ജോണി പോയത്..യാതൊരു ദുരാഗ്രഹവുമില്ലാത്ത ആരേയും ദ്രോഹിക്കാത്ത സംഗീതം സംഗീതം സംഗീതം എന്ന ലോകത്ത് മാത്രം ജീവിച്ച ജോണി,എന്റെ സുഹൃത്തും സഹോദരനുമായിരുന്നു എന്നതില്‍ ഞാനഭിമാനിക്കുന്നു..

പുനര്‍ജന്മത്തില്‍ വളരേയധികം വിശ്വാസമുണ്ടായിരുന്നു ജോണിക്ക്.
എല്ലാ ജന്മത്തിലും ഞാന്‍ ഈ ഗിറ്റാറുമായി തന്നെ ജീവിക്കും എന്ന പറയുമായിരുന്നു.അങ്ങനെയെങ്കില്‍ ജോണി വീണ്ടും ജനിക്കും...