സോഷ്യല്‍ മീഡിയയില്‍ തന്റെ പേരില്‍ പ്രചരിക്കുന്ന അശ്ലീല വീഡിയോകള്‍ വ്യാജമാണെന്ന് വ്യക്തമാക്കി സീരിയല്‍ താരം അഞ്ജു രംഗത്ത്. ആ വീഡിയോയിൽ കാണുന്നത് ഞാനല്ല, ദയവുചെയ്ത് ഇനിയും എന്നെ ഉപദ്രവിക്കരുതെന്നായിരുന്നു അഞ്ജുവിന്റെ അപേക്ഷ. നടി സുരഭി ലക്ഷ്മിക്കൊപ്പം ഫേസ്ബുക്ക് ലൈവില്‍ വന്നാണ് അ‌ഞ്ജുവിന്റെ വെളിപ്പെടുത്തല്‍. സ്വകാര്യ ചാനലില്‍ സംപ്രേക്ഷണം ചെയ്തിരുന്ന എം 80 മൂസ എന്ന സീരിയലില്‍ സുരഭിയുടെ മകളായി വേഷമിട്ടിരുന്നത് അഞ്ജുവായിരുന്നു അശ്ലീല വീഡിയോയുടെ പേരില്‍ വേട്ടയാടപ്പെട്ടത്.

അ‍ഞ്ജുവിന്റെ ചിത്രങ്ങള്‍ ഉള്‍പ്പെടെ പങ്കുവച്ചാണ് ഇൗ വിഡിയോ വാട്സ്‌ആപ്പ് ഗ്രൂപ്പുകളില്‍ വ്യാപകമായി പ്രചരിച്ചത്. ആദ്യമൊക്കെ അത് സീരിയസായി എടുത്തില്ല. എന്നാല്‍ ഇപ്പോള്‍ വീണ്ടും ആ വീഡിയോ പ്രചരിക്കുകയാണ്. അതില്‍ ഉള്ള പെണ്‍കുട്ടിക്ക് അഞ്ജുവിന്റെ ചെറിയ മുഖസാദൃശ്യം മാത്രമേ ഉള്ളുവെന്നും അത് അഞ്ജുവല്ലെന്നും സുരഭി പറഞ്ഞു.

വീഡിയോ പ്രചരിച്ചതോടെ പല ഭാഗത്തു നിന്നും ചോദ്യങ്ങള്‍ നേരിട്ടു തുടങ്ങി. അതോടെ അഞ്ജു പൊലീസില്‍ പരാതി നല്‍കി. എന്നാല്‍ അധികൃതര്‍ ഇതുവരെ വേണ്ട നടപടി സ്വീകരിച്ചില്ലെന്നും താരം പറയുന്നു. പൊലീസില്‍ നിന്നും ഇതിന് വളരെ കൃത്യമായ ഒരു ഇടപെടല്‍ ഉണ്ടായിട്ടില്ലെന്നും അഞ്ജു പറയുന്നു. ഫേസ്‌ബുക്ക് വഴിയാണ് പ്രചരിക്കുന്നതെങ്കില്‍ നടപടിയെടുക്കാമെന്നും വാട്ട്‌സാപ്പ് വഴി പ്രചരിക്കുന്നതിനാല്‍ തടയാനാകില്ലെന്നുമാണ് പൊലീസിന്റെ നിലപാടെന്നാണ് താരം പറയുന്നത്.

ഇതിന്റെ പേരില്‍ അഞ്ജു ആത്മഹത്യക്ക് ശ്രമിച്ചിരുന്നെന്നും അമ്മ കണ്ടത് കൊണ്ട് മാത്രമാണ് രക്ഷപ്പെട്ടതെന്നും തങ്ങളുടെ നിരന്തരമായ പ്രയത്‌നം കൊണ്ടാണ് അഞ്ജുവിനെ പഴയ പോലെയാക്കാന്‍ സാധിച്ചതെന്നും സുരഭി വ്യക്തമാക്കി.വീഡിയോ പ്രചരിക്കുന്നവര്‍ക്കെതിരെ നടപടി എടുക്കണമെന്നും താരം ആവശ്യപ്പെട്ടു.

കോഴിക്കോട് പൊലീസ് കമ്മീഷണർക്കും പൊലീസ് സ്റ്റേഷനുകളിലുമായി ഒട്ടേറെ പരാതികൾ നൽകിയെങ്കിലും നടപടിയൊന്നുമുണ്ടായില്ലെന്ന് അഞ്ജു പറയുന്നു. തന്‍റെ ചിത്രമുൾപ്പടെ ഉപയോഗിച്ചാണ് സമൂഹമാധ്യമങ്ങളിൽ വീഡിയോ പ്രചരിപ്പിക്കുന്നതെന്നും അവർ പറഞ്ഞു.