തന്നെ ഇഷ്ടപ്പെടുന്നവര്‍ക്ക് ഗദ്ഗദത്തോടെ നന്ദി പറഞ്ഞ് മഞ്ജുവാര്യര്‍. മഞ്ജുവിന്റെ ഫെയ്‌സ്ബുക്കില്‍ 30 ലക്ഷം ആരാധകര്‍ ആയതോടെയാണ് മഞ്ജു നന്ദിയുമായെത്തിയത്. തന്റെ പേജിലൂടെ മഞ്ജു തന്നെയാണ് ഇക്കാര്യം അറിയിച്ചത്. 

മുപ്പതു ലക്ഷം പേരുടെ പിന്തുണ അത്ഭുതത്തോടെയാണ് നോക്കി കാണുന്നതെന്നും എല്ലാവരുടെയും സ്‌നേഹത്തിന് മുന്നില്‍ ശിരസ്സ് നമിക്കുന്നെന്നും നന്ദി അറിയിച്ചുള്ള കുറിപ്പില്‍ മഞ്ജു പറഞ്ഞു. മലയാളത്തില്‍ ഏറ്റവും കൂടുതല്‍ പിന്തുണയുള്ള പേജുകളിലൊന്ന് മഞ്ജുവിന്റേതാണ്. പ്രമുഖ താരങ്ങളേക്കാള്‍ കൂടുതലാണിത്. വിനോദമെന്നതിലുപരി തന്റെ സാമൂഹ്യ പ്രവര്‍ത്തനങ്ങള്‍ക്കുള്ള വേദി കൂടിയാണ് മഞ്ജുവിന്റെ പേജ്.

മഞ്ജുവിന്റെ ഫേസ്ബുക്ക് പോസ്റ്റിന്റെ പൂര്‍ണ രൂപം

ഫേസ്ബുക്കിലെ ഒരു ആഹ്ലാദദിനത്തിന്റെ മധുരം പങ്കുവയ്ക്കുകയാണ്. ഈ പേജിന്റെ ലൈക്കുകള്‍ 30ലക്ഷം കടന്ന ദിവസമാണിന്ന്. മൂന്നുദശലക്ഷം എന്ന സംഖ്യയിലേക്ക് നോക്കുമ്പോള്‍ അത്ഭുതമാണ് തോന്നുന്നത്. നിങ്ങള്‍ സ്പര്‍ശിച്ചത് എന്റെ ഹൃദയത്തിലാണ്. ഓരോ സ്‌നേഹവിരല്‍ത്തുമ്പിനും കീഴേ ശിരസ്സ് നമിക്കുന്നു. ഇന്നേവരെ കണ്ടിട്ടില്ലെങ്കിലും ഈ നിമിഷം നിങ്ങളോരുത്തരെയും ഞാന്‍ കാണുന്നു. ഈ വാക്കുകള്‍കൊണ്ട് ഞാന്‍ നിങ്ങളെയും തൊടുന്നു. ലോകത്തിന്റെ ഏതൊക്കയോ ഭാഗങ്ങളിലിരുന്ന് നിങ്ങള്‍ തരുന്ന പിന്തുണയാണ് മുന്നോട്ടുള്ള യാത്രയിലെ കൈ വിളക്ക്. ഇഷ്ടമറിയിക്കുന്ന ആ കൈവിരലിന് ശാസിക്കാനും വഴികാട്ടാനുമുള്ള പരമാധികാരമുണ്ടെന്നും ഞാന്‍ തിരിച്ചറിയുന്നു. ചൂണ്ടുവിരലില്‍ നിങ്ങള്‍ എന്നെ നയിക്കുക... ഇത്രയും കാലത്തെ എല്ലാ നല്ലവാക്കുകള്‍ക്കും വിമര്‍ശനങ്ങള്‍ക്കും ഒരിക്കല്‍ക്കൂടി നന്ദി... പകരം നിറഞ്ഞ സ്‌നേഹം...