നടിയെ ആക്രമിച്ച കേസിൽ അറസ്റ്റിലായ ദിലീപ് ആദ്യമായി പൊതുവേദികളിൽ പ്രത്യക്ഷപ്പെട്ടു. കൊച്ചിയിൽ നടന്ന തീയേറ്റർ ഉടമകളുടെ സംഘടനയായ ഫിയോക്കിന്റെ യോഗത്തിലാണ് ചുവന്ന ഷർട്ടും നീല ജീൻസും ധരിച്ചെത്തിയ ദിലീപ് ശ്രദ്ധാകേന്ദ്രമായത്.

ദിലീപാണ് ഫിയോക്കിന്റെ സ്ഥാപകൻ. ജയിലിലാകുന്നതിന് മുമ്പാണ് ദിലീപ് സംഘടനയുണ്ടാക്കിയത്. ഉദ്ഘാടന ചടങ്ങിൽ മമ്മൂട്ടിയും മോഹൻലാലും അടക്കമുള്ളവർ പങ്കെടുത്തിരുന്നു. ലിബർട്ടി ബഷീറും സംഘവും തീയേറ്ററുകൾ അടച്ചിട്ട സമയത്താണ് അവരുടെ കുത്തക പൊളിക്കാൻ ദിലീപ് സംഘടനയുണ്ടാക്കിയത്. സംഭവം സിനിമാലോകം ഹർഷാരവത്തോടെ സ്വീകരിച്ചു. സിനിമയിൽ അതു വരെ നിലനിന്നിരുന്ന എല്ലാ പ്രശ്നങ്ങളും പരിഹരിക്കുമെന്ന് സിനിമാലോകം ആശ്വസിച്ചു. അപ്പോഴാണ് നടീ ആക്രമണ കേസിൽ ദിലീപ് അകത്തായത്.

ഫിയോക്കിന്റെ ആദ്യ ജനറൽ ബോഡി യോഗമാണ് കൊച്ചിയിൽ നടന്നത്. ഫിയോക്കിന്റെ ആദ്യ പ്രസിഡന്റായിരുന്നു ദിലീപ്. കേസിൽ പെട്ടതിനെ തുടർന്നാണ് ദിലീപിനെ മാറ്റിയത്. തുടർന്ന് ആന്റണി പെരുമ്പാവൂർ പ്രസിഡന്റായി. ദിലീപ് ജയിൽ മോചിതനായതോടെ ആന്റണി മാറി കൊടുത്തെങ്കിലും ദിലീപ് സ്ഥാനം ഏറ്റെടുക്കാൻ തയ്യാറായില്ല. ആദ്യ ജനറൽ ബോഡി യോഗം ദിലീപിന്റെ സൗകര്യം കണക്കിലെടുത്താണ് തീരുമാനിച്ചത്. ദിലീപ് ക്യത്യസമയത്ത് തന്നെ എത്തി. യോഗത്തിൽ ആദ്യാവസാനം പങ്കെടുക്കുകയും ചെയ്തു.

പ്രണവ് മോഹൻലാലിന്റെ പ്രഥമ ചിത്രത്തിന്റെ വൻ വിജയം ആഘോഷിക്കാനും യോഗം ' തീരുമാനിച്ചിരുന്നു. ഇത് ദിലീപിന്റെ നിർദ്ദേശമായിരുന്നു. ചിത്രത്തിന്റെ നിർമ്മാതാവ് ആന്റണി പെരുമ്പാവൂരാണ്. ആന്റണിയുടെ ചിത്രം സൂപ്പർ ഹിറ്റായതിനു പുറമേ തന്റെ പ്രിയപ്പെട്ട ലാലേട്ടന്റെ മകൻ സൂപ്പർ ഹിറ്റായതിലുള്ള സന്തോഷം ദിലീപ് പരസ്യമായി പ്രകടിപ്പിച്ചു. ചിത്രം റിലീസായ ദിവസം പ്രണവിനെക്കാൾ ടെൻഷൻ തനിക്കായിരുന്നു എന്നും ദിലീപ് പറഞ്ഞു.

ആദി എന്ന് എഴുതിയ കേക്ക് മുറിക്കാൻ ദിലീപിനോട് ആവശ്യപ്പെട്ടത് ആന്റണിയാണ്. സംവിധായകൻ ബി.ഉണ്ണികൃഷ്ണനും ഇവർക്കൊപ്പം ഉണ്ടായിരുന്നു. പ്രസന്നമായ മുഖത്തോടെയാണ് ദിലീപ് പൊതുവേദിയിൽ പ്രത്യക്ഷപ്പെട്ടത്. ആരും കേസിനെ കുറിച്ച് ദിലീപിനോട് ചോദിച്ചില്ല. എന്നാൽ ചിലരെങ്കിലും ഉടൻ സിനിമയിൽ സജീവമാകുമെന്ന് ദിലീപിനോട് പറയുന്നുണ്ടായിരുന്നു.

മമ്മൂട്ടിയുടെ വിശ്വസ്തനായിരുന്നു ദിലീപ്. എന്നാൽ കേസിനിടയിൽ മമ്മൂട്ടിയുമായി തെറ്റി. ദിലീപ് മോഹൻ ലാലുമായി അടുത്തു . പ്രണവിന്റെ ചിത്രം ആഘോഷിച്ചത് ദിലീപ് മനപൂർവമായാണ്. ആന്റണി പെരുമ്പാവൂരിന്റെ വായിൽ കേക്ക് നൽകിയാണ് ദിലീപ് ആദിയുടെ വിജയം ആഘോഷിച്ചത്. ദിലീപ് പതിയെ പതിയെ സിനിമയിൽ സജീവമാവുകയാണ്. രാമലീലയിലെ നായകനെ പോലെ.എന്നാൽ സിനിമ ഇപ്പോഴും ദിലീപിനൊപ്പമാണെന്നാണ് കൊച്ചി സംഭവം തെളിയിക്കുന്നത്. മോഹൻലാലിന്റെ ക്യാമ്പിലാണ് ഇപ്പോൾ ദിലീപ്.