സിനിമകളില്‍ കാസ്റ്റിംഗ് കൗച്ചിനെപ്പറ്റിയുള്ള ചര്‍ച്ചകള്‍ സജീവമാകുന്ന സാഹചര്യത്തിൽ നിരവധി നടിമാർ പല അനുഭവങ്ങളും പങ്കുവച്ചുകൊണ്ട് രംഗത്തെത്തിയിരുന്നു. എന്നാൽ സ്ത്രീകൾക്ക് മാത്രമാണോ ഇത്തരത്തിലുള്ള അനുഭവങ്ങൾ ഉണ്ടാകുന്നത്..? ഏറ്റവും ഒടുവിലായി കാസ്റ്റിംഗ് കൗച്ചിനെപ്പറ്റി പറഞ്ഞിരിക്കുന്നത് നടനും മോഡലുമായ കരൺ താക്കർ ആണ്. നേരത്തെ ഒരു അഭിമുഖത്തിൽ രൺവീർ ബോളിവുഡിലെ പ്രശസ്തനായ ഒരു കാസ്റ്റിംഗ് ഡയറക്ടർ തന്നോട് ലൈംഗിക താൽപര്യം പ്രകടിപ്പിച്ചതായി വെളിപ്പെടുത്തിയിരുന്നു. ഇത് ആരാധകരെ ഏറെ ഞെട്ടിച്ചിരുന്നു. അതിനുപിന്നാലെയാണ് കരൺ താക്കറിന്റെ വെളിപ്പെടുത്തൽ.

രൺവീർ സിംഗിനോട് ലൈംഗിക താൽപര്യം പ്രകടിപ്പിച്ച അതേ വ്യക്തി തന്നോടും മോശം താത്പര്യം പ്രകടിപ്പിച്ചുവെന്നാണ് കരൺ താക്കർ ഒരു അഭിമുഖത്തിൽ പറഞ്ഞത്. ലൈംഗിക താൽപര്യമുണ്ടെന്ന് വ്യക്തമാക്കുന്ന രീതിയിലായിരുന്നു അയാളുടെ സംസാരമെന്ന് താരം പറയുന്നു. അയാൾ ഇപ്പോഴും സിനിമാമേഖലയിലുണ്ടെന്നും ഇപ്പോഴും കാസ്റ്റിംഗ് അടക്കമുള്ള കാര്യങ്ങൾ ചെയ്യുന്നുണ്ടെന്നും കരൺ പറഞ്ഞു. ഇതുപോലുള്ളവരെ എനിക്ക് ഇന്നും അഭിമുഖീകരിക്കേണ്ടിവരുന്നുണ്ട്. നമ്മൾ ഏത് വഴി തിരഞ്ഞെടുക്കുന്നു എന്നതാണ് പ്രധാനം. നല്ല വഴി തിരഞ്ഞെടുക്കണം എന്നാണ് എനിക്ക് ആളുകളോട് പറയാനുള്ളത്- കരൺ താക്കർ പറഞ്ഞു.

പ്രശസ്തനായ ഒരു കാസ്റ്റിങ് ഡയറക്ടർ തന്നെ വീട്ടിലേയ്ക്ക് ക്ഷണിച്ച് മോശം കാര്യത്തിന് പ്രേരിപ്പിച്ചുവെന്ന് രൺവീർ സിംഗ് വെളിപ്പെടുത്തിയിരുന്നു. സിനിമാ മേഖലയിൽ പിടിച്ചുനിൽക്കാൻ കൂടുതൽ മിടുക്കനും സ്മാർട്ടും സെക്സിയുമാവണമെന്ന് അയാൾ പറഞ്ഞുവെന്നും രൺവീർ പറഞ്ഞു. അയാളുടെ ഉദ്ദേശ്യം എനിക്ക് വ്യക്തമായിരുന്നു. ഞാൻ നടക്കില്ലെന്ന് പറഞ്ഞപ്പോൾ ഒരു കാമുകനെപ്പോലെ ഹൃദയം തകർന്ന അവസ്ഥയിലായിരുന്നു അയാളെന്നും രൺവീർ അഭിമുഖത്തിൽ വ്യക്തമാക്കിയിരുന്നു.