മാസ് ഹിറ്റുമായി മമ്മൂട്ടി തമിഴിലേക്ക്. മലയാളത്തിന് പുറമെ തമിഴ് പ്രേക്ഷകരുടെയും ഇഷ്ടതാരമാണ് മെഗാ സ്റ്റാർ മമ്മുട്ടി. മാസ്റ്റര്‍പീസ് എന്ന ചിത്രത്തിനു ശേഷം അജയ് വാസുദേവ് സംവിധാനം ചെയ്യുന്ന ഏറ്റവും പുതിയ ചിത്രമാണ് ഷൈലോക്ക്. തമിഴില്‍ കുബേരന്‍ എന്ന പേരില്‍ മൊഴിമാറ്റപെടുന്ന ചിത്രത്തിന്റെ തമിഴ് ടീസറിനും വന്‍ വരവേല്‍പാണ് തമിഴ് പ്രേക്ഷകരിൽ നിന്നും ലഭിക്കുന്നത്.ഇത് മൂന്നാം തവണയാണ് മമ്മൂട്ടി അജയ്യുടെ ചിത്രത്തില്‍ നായകനായി അഭിനയിക്കുന്നത് . പണം പലിശയ്ക്കു നല്‍കുന്ന കഥാപാത്രവുമായി ശക്തനായ പ്രതിനായകനായാണ് ഇക്കുറി മെഗാസ്റ്റാർ എത്തുന്നത്.

ഒരു മാസ് ത്രില്ലര്‍ ചിത്രത്തിന്റെ എല്ലാ ചേരുവകളും ചിത്രത്തിനുണ്ടെന്ന് ടീസര്‍ സൂചന നൽകുന്നു . മീനയും തമിഴ് നടന്‍ രാജ് കിരണും ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നു.അനീസ് ഹമീദ്, ബിബിന്‍ മോഹന്‍ എന്നിവര്‍ ചേര്‍ന്നാണ് ചിത്രത്തിന്റെ തിരക്കഥ രചിച്ചിരിക്കുന്നത്. റെനഡിവ് ആണ് ഛായാഗ്രഹണം. ബി കെ ഹരിനാരായണന്റെ വരികള്‍ക്ക് ഗോപി സുന്ദര്‍ സംഗീതം പകരുന്നു. ജോബി ജോര്‍ജ് നിര്‍മ്മിക്കുന്ന ചിത്രം ജനുവരി 23ന് പുറത്തിറങ്ങും എന്നാണ് റിപ്പോർട്ടുകൾ.