ഡിസ്കവറി ചാനലിലെ വളരെ പ്രശസ്തമായ പരിപാടിയാണ് മാൻ വേഴ്സസ് വൈൽഡ്. പരിപാടിയുടെ അവതാരകനായ ഹോസ്റ്റ് ബിയർ ഗ്രിൽസ് കടുത്ത വെല്ലുവിളികളെ നേരിട്ട് ലോകമെമ്പാടുമുള്ള വിദൂര സ്ഥലങ്ങളിലൂടെ സഞ്ചരിക്കുകയും അവിടെ നേരിടുന്ന വെല്ലുവിളികളെയും അതിജീവന തന്ത്രങ്ങളെയും പ്രേക്ഷകർക്ക് പങ്കുവെക്കുകയും ചെയുന്ന പരിപാടിയാണിത്. 2019 ലെ പൊതുതെരഞ്ഞെടുപ്പിന് ശേഷം പ്രധാനമന്ത്രി നരേന്ദ്ര മോദി പ്രത്യേക അതിഥിയായി ഈ ഷോയിൽ എത്തിയിരുന്നു. ഇന്ത്യയിലെ ജനങ്ങൾക്ക് ഈ പരിപാടി കൂടുതലായും സുപരിചിതമായത് നരേന്ദ്ര മോദി അതിഥിയായി എത്തിയതിന് ശേഷമായിരുന്നു. ഇപ്പോൾ പരിപാടിയെകുറിച്ചുള്ള പുതിയ വാർത്തകളാണ് പുറത്തു വരുന്നത്. അവതാരകൻ ബിയർ ​ഗ്രിൽസിനൊപ്പം പ്രത്യേക എപ്പിസോഡിൽ അതിഥിയായി എത്തുന്നത് തമിഴ് സൂപ്പർ സ്റ്റാർ രജനീകാന്ത് ആണെന്നാണ് പുതിയ റിപ്പോർട്ടുകൾ. കർണാടകയിലെ ബന്ദിപ്പൂർ ദേശീയ പാർക്കിലായിരിക്കും പരിപാടിയുടെ ഷൂട്ടിം​ഗ് എന്ന് പ്രമുഖ മാധ്യമമായ ടൈംസ് നൗ റിപ്പോർട്ട് ചെയുന്നു.

കഴിഞ്ഞ വർഷം മോദി ഈ പരിപാടിയിൽ എത്തിയത് നിരവധി ട്രോളുകൾക്കും വിമർശനങ്ങൾക്കും ഇടനൽകിയിരുന്നു. എന്നാൽ അവതാരകനായ ബിയർ ഗ്രിൽസ് പരിപാടിക്ക് ശേഷം മോദിയെ പ്രകീർത്തിച്ചു കൊണ്ട് ദേശീയ മാധ്യമമായ എഎൻഐ യോട് വെളിപ്പെടുത്തിയത് ഏറെ ശ്രദ്ധ നേടിയിരുന്നു. ''ശക്തമായ കാറ്റിനെയും വഴിയിലെ വലിയ കല്ലുകളെയും കടന്നാണ് ‍‍അന്ന് ഞങ്ങൾക്ക് സഞ്ചരിക്കേണ്ടിയിരുന്നത്. ഞങ്ങൾ ടീമം​ഗങ്ങൾ എല്ലാവരും വളരെ ആശങ്കയിലായിരുന്നു. എന്നാൽ യാത്രയിലുടനീളം ശാന്തനായി നിലകൊള്ളുന്ന പ്രധാന മന്ത്രിയെയാണ് അന്ന് ഞങ്ങൾ കണ്ടത്. ഒരു പ്രതിസന്ധി ഉണ്ടാകുന്നത് വരെ ഒരാൾ എങ്ങനെയായിരിക്കും എന്ന് പറയാൻ സാധിക്കില്ല, എന്നാൽ ഏത് പ്രതിസന്ധിയിലും മോദി ശാന്തനാണ് എന്ന് തിരിച്ചറിയാൻ സാധിച്ചു' ഇതായിരുന്നു ബിയർ ഗ്രിൽസിന്റെ വാക്കുകൾ. ഏതായാലും ബിയർ ഗ്രിൽസ് ഈ വാക്കുകൾ സ്റ്റൈൽ മന്നൻ രജനിക്ക് വേണ്ടിയും ആവർത്തിക്കുമോ എന്ന ആകാംക്ഷയിലാണ് തമിഴ് പ്രേക്ഷകർ. തമിഴകത്ത് ഏറ്റവും കൂടുതൽ ആരാധകരുള്ള താരം ഡിസ്‌കവറി ചാനലിൽ എത്തുന്നതോടെ ഹോളിവുഡ് ആരാധകരുടെ എണ്ണവും വർധിക്കുമെന്ന പ്രതീക്ഷയിലാണ് പരിപാടിയുടെ അണിയറക്കാർ.