വിമാനത്തിൽ കയറിയിട്ടില്ലാത്ത എഴുപത് കുട്ടികൾക്കായി സൗജന്യ വിമാന യാത്രയൊരുക്കി തമിഴ് നടൻ സൂര്യ; വിമാനയാത്ര താരത്തിന്റെ പുതിയ ചിത്രത്തിന്റെ ഭാഗമായി
കുട്ടികളുടെ സ്വപ്നങ്ങൾക്ക് ചിറക് നൽകി തമിഴ് സൂപ്പർ താരം സൂര്യ.ഇതുവരെ വിമാനത്തിൽ കയറാത്ത കുട്ടികൾക്കായി ആകാശ യാത്ര ഒരുക്കിയാണ് താരമിപ്പോൾ വാർത്തകളിൽ നിറയുന്നത്. താരത്തിന്റെ ഏറ്റവും പുതിയ ചിത്രമായ സൂരറൈ പോട്ര് എന്ന ചിത്രത്തിന്റെ പ്രമോഷന്റെ ഭാഗമായാണ് വിമാന യാത്ര ഒരുക്കിയത് . 70 കുട്ടികൾക്കാണ് സൗജന്യ വിമാന യാത്ര സൗകര്യം ഒരുക്കിയിരിക്കുന്നത്. സൂര്യയും മറ്റ് താരങ്ങളും കുട്ടികൾക്കൊപ്പം യാത്ര ചെയ്യും. ഏകദേശം 45 മിനിറ്റോളം കുട്ടികൾ സൂര്യയ്ക്കൊപ്പംവിമാനത്തിൽ ചിലവഴിക്കുന്നത് . കൂടാതെ സുരറൈ പോട്ര് എന്ന സിനിമയിലെ പുതിയ ഗാനവും ഈ സ്പൈസ് ജെറ്റ് ബോയിങ് 737 എയര് ക്രാഫ്റ്റില് റിലീസ് ചെയ്യും. തമിഴ്നാട്ടിലെ സർക്കാർ സ്കൂളുകളിൽ സിനിമയുടെ അണിയറ പ്രവർത്തകർ കുട്ടികൾക്കായി ഉപന്യാസ കഴിഞ്ഞ ദിവസം മത്സരം നടത്തിയിരുന്നു. ഈ മത്സരത്തിലെ വിജയികൾക്കാണ് വിമാനയാത്ര ഒരുക്കിയിരിക്കുന്നത്.
സൂര്യയുടെ മൂപ്പത്തിയെട്ടാമത്തെ ചിത്രമാണ് സൂരറൈ പോട്ര് . മലയാളി താരം അപര്ണ ബാലമുരളിയാണ് ചിത്രത്തിൽ സൂര്യയുടെ നായിക. 2ഡി എന്റര്ടൈന്മെന്റ്സും സീഖ്യാ എന്റര്ടെയ്ന്മെന്റിന്റെ ബാനറില് ഗുനീത് മോംഘയും ചേര്ന്നാണ് ചിത്രം നിര്മ്മിക്കുന്നത്. സുധ കൊങ്ങര സംവിധാനം ചെയ്യുന്ന ചിത്രം ഫെബ്രുവരി 21 ന് തിയറ്ററുകളിൽ എത്തും . എയര് ഡെക്കാന് സ്ഥാപകന് ക്യാപ്റ്റന് ജി.ആര്. ഗോപിനാഥിന്റെ ജീവിതകഥയെ അടിസ്ഥാനമാക്കിയാണ് ചിത്രം ഒരുക്കിയിരിക്കുന്നത് . മോഹന് റാവു, പരേഷ് റാവല്, ജാക്കി ഷ്രോഫ് എന്നിവരാണ് ചിത്രത്തിലെ മറ്റ് താരങ്ങള്. ജി.വി. പ്രകാശാണ് സംഗീത സംവിധാനം നിർവഹിച്ചിരിക്കുന്നത്.
https://www.facebook.com/Malayalivartha