കോവിഡ് ചികില്‍സയിലിരിക്കുന്ന ഗായകന്‍ എസ്.പി. ബാലസുബ്രഹ്മണ്യത്തിന്റെ ആരോഗ്യ റിപ്പോര്‍ട്ടുകള്‍ സംബന്ധിച്ച് ആശയക്കുഴപ്പം. അദ്ദേഹത്തിന്റെ കോവിഡ് പരിശോധനാ ഫലം നെഗറ്റീവായി എന്ന് റിപ്പോര്‍ട്ട് വന്നിരുന്നു.

എന്നാല്‍, ജീവന്‍ രക്ഷാ ഉപകരണങ്ങളുടെ സഹായത്തോടെയാണ് അദ്ദേഹത്തിന്റെ ജീവന്‍ നിലനിര്‍ത്തുന്നതെന്ന് വിവരിച്ചുകൊണ്ട് മകന്‍ ചരണിന്റെ വീഡിയോ ഇതിനു പിന്നാലെ പുറത്തുവന്നു.

എസ്.പി.ബിക്ക് ഈ മാസം അഞ്ചിനാണ് കോവിഡ് സ്ഥിരീകരിച്ചത്. ആരോഗ്യനില വഷളായതിനെ തുടര്‍ന്ന് അദ്ദേഹത്തെ ഐ.സി.യുവില്‍ പ്രവേശിപ്പിച്ചു. ചെന്നൈ എം.ജി.എം. ഹെല്‍ത്ത് കെയര്‍ ആശുപത്രിയിലാണ് അദ്ദേഹം ചികിത്സയില്‍ കഴിയുന്നത്.