കന്നഡ സിനിമയില്‍ ചെറുവേഷങ്ങളില്‍ അഭിനയിച്ചിട്ടുള്ള, 5 വര്‍ഷമായി ബെംഗളൂരുവില്‍ താമസിക്കുന്ന നിയാസ് എന്ന മലയാളി കന്നഡ താരങ്ങളും വിദേശികളും ഉള്‍പ്പെട്ട നിശാപാര്‍ട്ടികളില്‍ ലഹരി എത്തിച്ചിരുന്നതിന് അറസ്റ്റിലായി. സെന്‍ട്രല്‍ ക്രൈം ബ്രാഞ്ച് പൊലീസ് (സിസിബി) ആണ് ഇയാളെ അറസ്റ്റ് ചെയ്തത്.

നടി രാഗിണി ദ്വിവേദിയുടെ സുഹൃത്ത് രവിശങ്കര്‍ നല്‍കിയ വിവരങ്ങളുടെ അടിസ്ഥാനത്തിലാണ്, സിനിമാ മേഖലയിലെ പ്രമുഖരുമായി അടുത്ത ബന്ധമുള്ള നിയാസിനെ അറസ്റ്റ് ചെയ്തത്. വെള്ളിയാഴ്ച നഗരത്തിലെ എസ്ജി പാളയയില്‍ നടന്ന റെയ്ഡില്‍ കോഴിക്കോട് സ്വദേശികളായ പി.കെ ഹരികൃഷ്ണനും മുഹമ്മദ് യാക്കൂബും പിടിയിലായിരുന്നു. ഹരികൃഷ്ണന്‍ ബിബിഎ വിദ്യാര്‍ഥിയാണ്. 15 ലക്ഷം രൂപയുടെ ലഹരിമരുന്നും റെയ്ഡില്‍ പിടികൂടി. ലഹരിമരുന്ന് വിതരണവുമായി ബന്ധപ്പെട്ട് മലയാളികള്‍ ഉള്‍പ്പെട്ട ഈ 2 സംഘങ്ങള്‍ അറസ്റ്റിലായതിനു പിന്നാലെയാണ് നിയാസിന്റെ അറസ്റ്റ്.

അതിനിടെ, വെള്ളിയാഴ്ച അറസ്റ്റിലായ കന്നഡ നടി രാഗിണി ദ്വിവേദിയെ വിഡിയോ കോണ്‍ഫറന്‍സിങ് വഴി കോടതിയില്‍ ഹാജരാക്കി. കടുത്ത നടുവേദനയെന്നു പറഞ്ഞ് ചോദ്യം ചെയ്യലുമായി സഹകരിക്കുന്നില്ലെന്നും 10 ദിവസത്തേക്കു കൂടി റിമാന്‍ഡ് നീട്ടണമെന്നും സിസിബി കോടതിയോട് ആവശ്യപ്പെട്ടു. വിവിധ സ്ഥലങ്ങളിലെത്തിച്ച് തെളിവെടുക്കേണ്ടതുണ്ട്. നടിയെ 5 ദിവസത്തേക്കു കൂടി സിസിബി കസ്റ്റഡിയില്‍ റിമാന്‍ഡ് ചെയ്തു.